قصايد للشاعر محمد الدحيمي
ليلة البارح رقد بعضي ينازعه اغلبي
ليلة باخر ليالي الحج غدرا مظلمه
كني اللي نايم مابين داب وعقربي
هي حقيقه هي خيال سج؟ هي حلم احلمه
قمت من صوت دعاني وانثنيت على ركبي
والا انا اناظرقبالي (ناقة متكلمه)
يانيازك لوعرجتي فوق دخان اشهبي
علقي في زئبقي في مارج متنجمه
قلت وش قومك وش انتي واصدقي لاتكذبي
جاوبتني شاعره من الجن وانظم مبهمه
وقبل تنشدني ترى اسمي ابكمه ياصاحبي
وادّر كانك مادريت ان اشعرالجن ابكمه
اسكن "البرلس"على وادي يسمى المحلبي
في نهاية طور موسى جل رب كلمه
جيت اباسمع منك شعر الوصف واشب لهبي
كان توصف مثل جدك ياعسى الله يرحمه
جدك اللي من سمع شعره ذهل واستغربي
مثل وصفه لآجمل سنينه ب نوق مدرهمه
قلت حياك ارحبي ثم ارحبي ثم ارحبي
في ضيافه شاعر يثني القصيد ويلجمه
شاعر ورد هواجيسه على ماهو يبي
واعذب الشعر اصدقه في اغربه في اجهمه
من شيوخ دحيم جدانه وخاله تغلبي
ان طلع عز وشرف والا طمن في مكرمه
قد ورثت الطيب قبل الشعر من جدي وابي
ولابتي سيل الحقوق اللي تزابر مرزمه
واشهد اني من سنام الشعر دسمت شنبي
وهاتي اشعر شاعر من الجن نذر لآفحمه
ودام يستهويك شعرالوصف ب انظم واطربي
ع القوافي نفسها قدامك الحين انظمه
واصف حلو الترايب والقوام الاكعبي
وابتدي بسم الله الرحمن سمعي ياابكمه
جادل بحجاجها فجر زبنه المغربي
عنز ريم نثرتني بين خرز وسلهمه
في سواد عيونها فاجر يقول انه نبي
كل صابي يتبعه ويصدقه يهدر دمه
وفي لحظها حاكم سفاح متهور غبي
يطلب الرحمه لميته يوم شبع من لحمه
وفي هدبها مدهل راعيه شيخ يعربي
اجودي نوب يعزمني ونوب اعزمه
راعني خال بوجنتها تقل عبد مسبي
حارس روض الزهر من كل يمنا مجرمه
ومن قليب اللون جا ثعبان فضي لولبي
من لعق سمه يقول الشهد مر وعلقمه
كلما بلل شفق عنابها قال عجبي
راح ينشد لولها هي مشركه هي مسلمه
يوم جاا للول بيجاوب قلت ربي روف بي
ن اض براق الثمان وسال وادي عكرمه
الندى عود غدا بأوجانها طفل يحبي
والعطر راعي بأثرها يحدي ابله وغنمه
ومن جدايلها تجلا فارس قال العبي
واستفزي الريح يابنت الهبوب المدهمه
وفي نحرها كافر لعيوني يقول اذنبي
كل ماياكل رطب شوفي حذفني بعجمه
في ترايبها ثمر طاح بنهم عين اشعبي
جا يقول لخصرها المياس حذرا مااتهمه
انثنى الخصر وتمايل قال قلبك مربي
توه اللي كان ضيفي وانظر اثار قدمه
الجمل هج وتذير يوم شاف الاحدبي
الحدب قال اش معه ماينظر الحدب سنمه
كل نظره روحت حبلى تجي معها صبي
راح جوعه ينشد امه وش بلاها تفطمه
لامشت في مشيها خطو الكحيل الاشهبي
انثنت حايل ثنيه لارباع ولاقحمه
كنها لالدت النظره خجل عالمنكبي=
صادق يستودع الفتان سر يكتمه
في خجلها بنت شيخ طاحت بحب اجنبي
في غنجها مهرة تتلي الصهيل بهمهمه
في رضاها حصني يتلذذ بمحض عنبي
في عتبها ظالم حطوه قاضي محكمه
لااقبلت مثل الحمام ولا ادبرت مثل الظبي
لا اوقفت طير الهداد ولاجلست تقل رخمه
لاوردتي يامغاتيري على العدا شربي=
وهيجني ياحي ذا المبسم ومنهو مبسمه
مبسم يوم يتبسم كل عرق صاح بي
و تلني قوم الثمه نذر علي ان تلثمه
اذن الفجر ووقفت الاابكمه (تقول طلبي)
يالدحيمي هالقصيده سمها (بالملــحمه)
ــــــــ
ليل وكريستال .. نوض زمـام مضنونـي
يبرق زمامه .. ويسري بـي كريستالـه
ليـلٍ غداريـه ودونــي .. وجابـونـي
من شارب أعوره طحت .. بدقـن دجالـه
ياعزوتـي .. عاتبونـي .. لاتعذلـونـي
والاّ عذولي .... ( فـ.. فال الله ولا فاله)
لا مرزقي في يدّْ اللـي يشـري غبونـي
ولا أبيه جدي .. ولانـي بأصغـر عيالـه
وش له ومن يستبيـح العمـر ويمونـي
اليا استباح الدحيمي كيـف يحـلا لـه؟!
شاعر يغنّـي .. وكـم شعّـار سبقونـي
غنّوا برووس النوايـف .. ( يالالالالـه )
واللي على طرقتي غنّـى مـن لحونـي
ماهـو علـى قدّهـا لـو ميّـل عقالـه
وناسٍ على ( موتة الجمعه ) .. يحسدوني
ياصبر قلبي عليهـم .. والله اقـوى لـه
قدلي وأنا أحدي لهم وضحي .. وحدّونـي
أضيّـع الفاطـر أم خــزام وشمـالـه
السوق سوقـي ... وعيّـوا لايبيعونـي
والطيـب مشـراه .. مايحتـاج دلاّلــه
ويوم إنهم بالردى عالطيـب .. جازونـي
خليت للطيـب جالـه .. والـردى جالـه
يبطون في فتنتـي .. والتـرف مفتونـي
ويبطي ببالي .. ويبطي بـي علـى بالـه
ويبطـون لوّامتـي .. مهمـا يلومونـي
إمّا خذانـي غـلاه ... أخذتنـي القالـه
ياقبلة الله ليا اقبـل .. وأنخطـف لونـي
ماكن دقّـات قلبـي دقّـت .. الاّ .. لـه
لبّـا مراسيـل عطـره يـوم زارونــي
قبلـه .. يزفّـون لـي بشـراه بقبالـه
لبيّه كلّه .. ولبّـا البعـض .. والدونـي
لبيّه مـن هامتـه .. ليـا حـد خلخالـه
لبيّـه يالمستـه .. ومصافـح شجونـي
لبيّـه يافزعتـه .. فـي فـزّة جفـالـه
لبيّـه ياخثرتـه .. تنشدنـي شلـونـي؟
لبيّه ياسجّتـه .. ليـا عـضّ سلسالـه
ليا قال لي: (ويش حالك ) قلت : ياعوني
يلعن ثوى الحب .. يلعـن جدّهـا حالـه
أن جيت اباأضحك ..حظوظي فيك بكونـي
وإن قلت ابانسى غرامك .. أتعنـى لـه!!
ويضحك .. وأنا أنشد عيوني وأنشد جفوني
من شاف لول الثمان..؟؟وبارق هلاله؟؟!!
في ضحكته .. يرجـع الديّـان مديونـي
وفي فرحته .. من غنجه يداعب ضلالـه
وبعتابه .. يجيك مخطي قـال : خطّونـي
واليا زعل .. تقـلْ طفـلٍ ضيّـع ريالـه
تكفـون لا سـجّ قلبـي عنـه خلونـي
في سجّتـي عنـه .. لا ذاكـر ولا دالـه
حذرا لو الشـوق هبّـل بـي تطيعونـي
وأضوي بدون الجمل .. والبـدو جمالـه
وإذا غلبنـي هـواه وقلـت : ودونــي
لا تتركوني كـذا .. والحـال يرثـى لـه
وش عاد عذري لـو الجيـران شافونـي
خامس سنه .. يابن عمّه! .. ياولد خاله!
مايكفـي اربـع سنيـنٍ فيـه ساقونـي
ورجعت رجلي .. وأنا من صلـب خيّالـه
أمسي وأنا للعرق وسـمٍ علـى ردونـي
وأصبـح والأحـزان .. نزّالـه ونقّالـه
ورّدت وأول طعونـي .. أجمـل طعونـي
وصدّرت .. وآخر منافي داره .. أطلالـه
والعمر .. عشقٍ جمع منفى ومسجونـي
والعشق .. من قال طاله .. مات ماطالـه
يامال سقوى البَرَدْ من عـذب المزونـي
ياليلةٍ .. رحت مـن الصبـح اتهيّـا لـه
ليلٍ تّمايل غصونه .. ومالـت غصونـي
واليا تثنـى دلـع .. قمـت اتثنـى لـه!
وشـلال شعـره .. وقذلتـه ايتبلونـي!
ومن جور قذلته .. رحت بوجه شلالـه!
سرّاي من نحره .. لخاله علـى هونـي
الله .. وشلون أضيـع بنحـره وخالـه!
فديت عذْبه .. وسحـره شعـر وفنونـي
فديت سحره .. وعذب الشعـر وأمثالـه
وفديـت ذبـح اللواحـظ يـوم خزونـي
فديـت غيـم الرمـوش وفـيّ مقيالـه
وفديت لثغة حكـاه .. بضحكـة سنونـي
فديـت ضحكتـه .. يـوم يمـدّ بشمالـه
وفديت خوفي عليه ان راح مـن دونـي
فديت عضّة شفاه .. ليـا مشـى لحالـه
وفديـت جـدران بيتـه يـوم يرثـونـي
فديت حوشه .. فديت البـاب .. وأقفالـه
وفديت عمره .. بعمـرٍ لأجلـه يهونـي
وفديت ريـح اقهوتـه .. ونكهـة دلالـه
الله يبيحه .. وأنا بـه محسـن ظنونـي
إليـن يـدرون عـذّالـي .. وعـذّالـه
ويـدرون غيّابـي اللـي يـوم يقرونـي
إن أجمـل اللـي ألبّـي .. وأتفـدّى لـه
ضحكة كريستـال .. وزمـامٍ لمضنونـي
زودٍ علـى حسنـه القتّـال .. قتّـالـه
اليا التفت لي .. جهـر بزمامـه عيونـي
واليا ضحك لي .. ذبحنـي بالكريستالـه
ـــــــــ
للترف خيـــل ٍ غدا مركــاضها صدري
وطيــــور شــوقي غدا مقيالها .. عيونه
لبا جفونـه ولبا .. طبعــها الخـدري
ولبا ســــوادٍ رقد في خدري جفونه
اثره بضحكة سنونـــه حافر ٍ قبري
ولا كنت اظني بامــوت بضحكة سنونه
شرهة متونه على شــلالها الخمـــري
وان نثـــرته الهبـــوب .. مردّه متونه
جيت اجبر الكسر لكنــه .. كسر جبري
مجنـــون والحـظ ساقــه يم مجنــونه
يتفنن بلوعتــي .. واتفنن بصبري
حتى غــدت لوعتــي من اجمل فنونه
لا رحم ابوالحظ ساق الهجر من بدري
وشيّد جســـور الجفا من دونـي ودونـه
واقفيت لاني ضرير .. ولاني ببصري
اليا منعني الحيا ... ساقتـــني المــــونه
وجهمت اسوق الخطا في الدرب واهذري
( تكفـــون ياللي خـذوا خلّي تــــردونه )
ابطى .. وخلّى سؤال ٍ يلهث بفكري
مادري يصون الغلا ؟ .. مادري هو يخونه؟
ويوم اني اسجّ بين ادري .. وما ادري
عقب البطا .. جاء يقول : الدار وشلـونه
قلت انت : دارك هنا.. واْشِر على صدري
قال انت : دارك هنا .. واَشّر على عيونه
ـــــــ
وهذي قصيدة في ابوه
لعن ابوه الشعر كانه بـس فـي شقـر الذوايـب
لعن ابـوه ان كـان قاصيـه الغـزل والنرجسيـه
يايبه .. والهاجس اللي كان مخطي جـاك تايـب
إغتسل من نزعة ذنوبه .. وتـاب مـن الخطيـه
يالحقوق اللي سنا برقـه فتـق صـدر السحايـب
يالبياض .. اللى غفـر كـل الذنـوب السرمديـه
يوم شفتك بالسرير الابيض عـن الوعـى غايـب
كل عرقِِ صاح فينـي جعـل هـاك الضيـم فيّـه
آه ليـت الضيـم رجـالِِ واشـد لـه الركـايـب
والله انّـي ل نحـره وآورده حــوض المنـيـه
ياعسي نذلِِ هقي بـك يرجـع .. بهقـواه خايـب
ضايـعِِ مثـل القحـم لاهـو ربـاع .. ولا ثنيّـه
قلت لى مره.. ترى النشمـي ليـا خـاواه عايـب
مثـل دهـن العـود لا خالـط رمـاد الشاذلـيّـه
ودامني .. رجلِ خرج من بين صلبـك والترايـب
والله ..ان يبطي القـدم مـا يمشـي دروبِِ رديّـه
يايبه .. ودحيم تنشـد ويـن حـلاّل النشايـب ؟
راس قومِِ جالهـا .. مـن القيـظ مقيـالِِ وفيّـه
يابعد .. راسي وروس .. احبابي وكـل القرايـب
يابعـد مـن زّهـب المجنـد ولبـس الحضرميّـه
قم !! دخيلك عقبك الديـره غـدت جـردِِ خرايـب
عّجها ..غطّـي سماهـا .. وستـوت بالمهمهيّـه
كلمتيـنِِ فـي شفاتـي حايـره راحـت ذهايـب
ماقوت .. تعبيرهـا كـل الحـروف .. الابجديّـه
اخدعتني .. بكـرةِِ ماهـي مـن ابكـارِِ نجاايـب
ولا غفـالِِ وصفهـا عنـد النّبـيـه ولا مطـيّـه
درهمت بي .. في دجي ليلِِ نهب شوفـي نهايـب
ويوم افيق .. الاّ وانا بأحضـان قفـراً جرهديّـه
واتركتني .. ظامـيِِ والمـاى للقيـض الزهايـب
واغبنتني يـوم .. هجّـت بالقلـص والزمزميّـه
يايبه .. وان قصرت ايديني .. ودارت بي المصايب
بـارمي اعذاري علـى الغربـه وقـلّ المقدريّـه
هاجسي .. المذنب رجع دمعة طفل بعيون شايـب
وإغتسل .. من نزعة ذنوبه وتـاب مـن الخطيّـه