[صُــدفه]

قصيدة . . .<<الحسايف>>. . .!!


ل
ص.ع

يا عسى جـفن ٍ تقزوى لحظة النـوم الهنيـه
يلتقي بـ اللـّي طيوفه بين خـدّه و المخـدّه


ايط بـ القاع وتثيقل لو على الوضـحا منيّـه
لا رحم ربي نفـوس ٍ ما لهـا بـ الطـيب شـدّه


ولعنبوها من كــبود ٍ مابهـا مـرّ وحـميـّه
كـان مـا تـاقف بماقــف يتعب الملتاع ردّه


يـا ربيع القـلب هــذي دنيـتك دنـيا دنـيّه
واعــذاب اللّي تحـدّه للردى والطيـب حـدّه


سلوتي هـ الوقت محــد ٍيبتسم من طــيب نيّه
كود ما يلقى بـ آخر ضـحكته ضـلـع ٍ يجــدّه


الزمن غــدار واهـلـه يا رفيق الدرب زيـّـه
دامـنا صرنا نـميّز طاهــر القـلـب ونـعـدّه


لو حسـبـنا للحــسايـف في دروب المقدريـه
كان ما كانت غــميضـه طيحت اللّي باح سدّه


ولو عرفنا للدروب المقفـيه في غـير جـيـّه
كان ما متـنـا وباقـي في سنين العمر مـدّه


ولو بذرنـا لليـالي فـي زمـان الجـاهـلـيـه
كان ما جانا نهـار ٍ يـسـتوي مزحـه بـ جـدّه


ابتـسم للناس واغــضي واكتب الخـيره خفيّه
واجمع دموع اليتامى في وسط عين ٍ مصـدّه


واكتم الاهات واخفــي في ضلوعي نار حيـّه
والظروف اصعب علىاللّي طـيب جروحه بندّه


كل هـ الدنيا خطايا ونبتـت ابن ادم خطـيّه
واهـني اللّي لـقـاله بـ الفرح ثوب ٍ يقــدّه


ايـه يا نـزف المشاعر ما بقــى فيني بقـيّه
كافي انّـي صرت نـدّ لحـاجـةٍ ماني بـ ندّه!


جار زيــف الــوقت واسرف في ملذّاته وغـيّه
في وجـه رجــال ٍامسى يحظن دموعـه بيدّه


الهـقاوي ما تجــمّـل لو قــضـبته من يديّـه
دام عـمرالصبر غـلّـق في رجــى روحه وردّه


البـلا بـ انّي عــشـقت سلومنا غصـب ٍعليـّه
ابـدوي والنفــس تشـره لو بدى علـم ٍيضـدّه


ماني اللّي يسوق علمه ب الحروف الابجــديه
دايم ٍ فـعـلي وربي يــسبـق اقـوالي مـردّه



والعزا بـ انّي كبرت اليوم وشـروكي قويّه
ما تغيب وجيـه ناس ٍاشـرقت طيـب ومودّه

ص.ع