صلو على النبي
" وأنا البارحه ما أمسيت يوم العباد رقود "=عيوني سباها السهر والطـرف مانامـي
سرت بي هجوسي تالي الليل دون حـدود=مداها يفوق الهنـد والصيـن والشامـي
أوّرد فرايدهـا علـى عيـلـمٍ قـرهـود=أوّرد وأصّـدر جلهـا حامـي بحـامـي
أقود المعانـي والمعانـي بحـر وعـدود=معانٍ صداهـا يـروي الـوارد الضامـي
أساير هجوس الفكر لى غايـه المقصـود=فنوبٍ على البيّن ونـوبٍ علـى ابهامـي
ونفسٍ مضريها على الجود وأهـل الجـود=ورثها الفتى من رأس حـرٍ وضرغامـي
كسبها الفتى وأكـد نباهـا عليـه العـود=كسبهـا وبيّنهـا علـى نـزف الاقلامـي
والى من طرى مدحٍ وجاء للمديـح نـدود=طرت لابةٍ تارد علـى المـوت درهامـي
رقينـا صـروح المجـد للنايفـه بالفـود=وعشقنا شموخ الكايده جهـل واسلامـي
نضيم العدو لـى غيـم الجـو بالبـارود=ونادى المنادي نصرة القـوم مـن يامـي
نقود العدو قـود ونسوقـه سـواة الـذود=انجره على وجهـه ونخطّمـه باخطامـي
وحدب السيوف اللي شفت علة المضهـود=تخلد فخر يـام العريضـه فخـر سامـي
نقشها المؤرخ والدهـر بالفعـل مشهـود=ولا يشهد ألا رمح ورصـاص وحزامـي
ومن سابق الدنيا الليالـي علينـا شهـود=بقـت يـام سـمٍ للعـدو صالـيٍ حامـي
وعلى الجزله اللي ريحها شبه مسك وعود=تعطر سطور الطيب فـي عـز واكرامـي
واليّا دلهم الليل الطويـل وتمايـل عـود=يطيح الشجاع واليّا برك طاح مـا قامـي
يجر العِشق نظمه وذا الجود من الماجـود=وحكم القـدر والدّهـر للعِشـق ظلامـي
تـدور الليالـي والليالـي غثاهـا يعـود=تّلوع حزيـن القلـب ساعـات وأيامـي
هموم الصدر لجت وضيم الحشا فـي زود=تقِّطع عروقه لـى جـذب ون الانسامـي
تلوح البروق اللي فهقهـا حنيـن رعـود=وأنا أخيل نوض البـرق واعالـج الامـي
أمد النظر وأشوف بـاب الفـرح مسـدود=من العام قفّا وانقضى الصبـر والعامـي
أجاذب ونيني وأهتني مـن هبـوب النـود=ذعاذيـع نـودٍ تبـري الخافـق الدامـي
وأنا بين حرق الجاش يتلاه حـرق كبـود=غدرني زمانـي وأحكـم القيـد بأقدامـي
تتالت علي وأوصى بها حظـي المقـرود=صروف الدهر تنوي على كسرة عظامـي
ولكنّهـا تجهـل كيانـي عـزم وجهـود=عـزومٍ علـى غيـب المقابيـل حُكامـي
ودرب الهوى جـر المعاليـق والمنقـود=رماني وأنا غافل علـى رميـة الرامـي
أمد الحبل وأظـن حبـل الوصـل معقـود=تبور السنين ويخلـف الوقـت باحلامـي
خذّته الليالي فـي غيـابٍ علـي معـدود=أعـد الليالـي بعـد مـاغـاب قـدامـي
وعرفت الفراق انه غرابيـل مابـه فـود=نوى بالضلـوع العـوج كيـه بيمسامـي
وزول الجسد موجود وألا الفكـر مفقـود=ألا ليت قلبـي ماعـرف حـب وهيامـي
عسى مزنةٍ غـرا تخالـف نفـل وورود=تعاِنّقه بديـاره وتسقـي ظمـا الظامـي
وليفٍ سماه الصدق وأرضه غـلا ممـدود=ألا يالغـرام الصافـي العـذري السامـي
وليفٍ حبـاه الله بدعـج العيـون السـود=الى سلهم برمشه نوى الروح باسهامـي
وقد حال من دونه من أهل القلوب السـود=ألا جعـل مـن فـرّق هوانـا للاعدامـي
وصدوا به اللي في عملهم خباث حسـود=عواذيـل تنقـل هـرج كـذاب نمـامـي
وكأس العنا ذقته وليـت القـدر مـردود=يموت الغـرام وموتتـه عـف منضامـي
وحكم الليالي مـا لنـا دونهـا مرصـود=رضينا على حكم الدهر طـوع وارغامـي