[يزيد بن غشيّان]

السلام عليكم ..

المقدمات لفواصل والمختلف , لكم منا القصيد فقط .

من قديمك نديمك واعذرونا ع القصور !


وقّفت . بين الضلوع العوج في وسط الحنايا
تسأل اللي كان لازم يوم غابت : تسأله

عن خفايا هاجس ٍ او هاجس ٍ كله خفايا
او عن الذكرى في ليل ٍ كم سهرت اتأمله

او ظلام الوحشه اللي تسكن بهاك الزوايا
بعد ما كانت تضج بنور . وبشوق و وله

اه يالوجه العبوس اللي اشوفه في المرايا
غيّره حزن المكان .. وصرت كني اجهله

يا خفوقي ما هقيتك تدّرج عند المنايا
وانت من ادناك لين اقصاك تنبض مرجله

رح وخبرهم انا : كيف انقضى عمري عطايا
كنت اشيل الورد . وانثر للحبايب اجمله

جت بتنشد عن قصيد ٍ مات مع ذكرى وفايا
وشافت السطر الاخير : اللي اثار البلبله

( نجمة ٍ لاحت وغابت والقمر يضوي سمايا
والعمر رحله . وهي كانت مجرد مرحله )

كان هذا البيت اخر ما كتبته : في هوايا
ولو ما جتني فانا والله .. ناوي ارسله

لين هاك الارصفه تاخذ على هجر البرايا
او يموت النور في غدرا دروب ٍ مهمله

صاحبي روّح فمان الله .. ما باقي بقايا
غير قلب ٍٍ كلما يحياك .. ترجع تقتله !

وقّفت . يوم اغتيال العشق في وسط الحنايا
تحسب اللي مات . في وسعه يرد الاسئله !


يا مال السلامه جميعا