قصيدة قديمة اتمنى ان تحوز على رضاكم
نشرتها في شعبيات عام 2002 م وها انا اعود وانشرها في ديواني في نفس شعبيات بعد اربع سنوات من النشر الاول لها
اللي تبي سمه
وش بي اذا شفت نجم ٍ ايتهيالي=
=وابحث عن الصاحب اللي ماظهر نجمه
ادورك في السماء ياعز الازوالي=
=واقول علّك تجي وتشتت الغمه
يرتاح قلب ٍتصافق فيه الاعلالي=
=تبراه من علته وتشيل من سقمه
ترا مكانك رفيع ومنزلك عالي=
=قدرك بقلبي ما تدري ويش هو حجمه
اي والله ان الذهب في معدنه غالي =
=وغلاك وسط الفؤاد موصل القمه
اذا عشقتك يا بنت الناس من بالي=
=عندي خبر بالهوى كم ذقت من سمه
انا على الحب عشت المر والحالي=
=اقتات من طيبته واقتات من ظلمه
مايورث الحب من عم ٍ ولا خالي=
=ولا خلق واحد ٍ والحب في دمه
احب صوتك ليا طرق وانا سالي=
=واحب حتى نفسك اجمعه واشمه
بتقول هذا جنون ...اعتبره هبالي=
=سمه جنون او هبال ...اللي تبي سمه