إذا خوفك من المجهول جهل ٍ بانتصاراتك
تهادى من اطرفك
مِن ضحكتك لامرّتك، مِن هارب آهاتك
إذا وجهك يعرف إنك على الوجهة
ووحدك لو توجّه لك..
خذ ظلالك خويك
جنب ذاتك
في مدى جْهَاتك!
تحب اللي تحبه
ماتشابه لليْ يشبه لك!
من يشوفك من الداخل إذا إنك خارج بجهلك!
هو النسيان أطول من دروبك لاوصلت لآخرك من ذاكرة.. فجأة!
تسيّلك الشوارع مثل ما يسقط من أوراق الخريف أشجار!
و وحدك تنبت أفكارك وتنبت لك..
هو المجهول غيمة مالها موطن
والريح: نصف أعمار..
هو الخوف: الرعـَد
والبرق : كان النار..
وتركض رمشها كان الحطب:
أحلامك: النّوار..
تسامى، حاول إنك تجمع أنفاسك على مهلك!
هو التفكير وجه ٍ يشبه لجدّي قبل يقرا
هو محمّد
هذاك اللي يحب ولايقدر يختار..
يشاورني على تقبيل فمها!
قلت: يامحمّد على مهلك..
إذا تعشق بصدق ابعد
ومن يِعَشْقك من الداخل إذا في جرأتك جهلك!
هو الخوف الأساطير الغريبة بعضها مُهْلك
إذا خوفك من المجهول جهل ٍ بانتصاراتك
تهادى من أطرفك
مِن ضحكتك لامرّتك، مِن هارب آهاتك
إذا وجهك يعرف إنك على الوجهة
ووحدك لو توجّه لك..
وتبنيك الظنون بيوت
ويجون الصغار برملك يهدونك فـ أهلك
وتبنيك المواعيد المواعيد احتشام التوت
ويهدمك الشِّعر ..
تاقف على رسلك..
من اللي قال هاذي الأرض دمعة والسما منديل!
من اللي قال كل الغيم بحر مْن السما حَوَّل
بعد ما حنّ لـ ارضه ..لا على مهلك..
إذا خوفك من المجهول جهل ٍ بانتصاراتك
قل إنك خنت وجهك
.. وجهك يشبه لجهلك!