يوووووه
لما تدخل في مدينه
وما تلقى فيها سكن
لما ترفضك الشوارع
تمشي فيها.. حلم ضايع
وتحس حتى ..
ثوبك الي تلبسه
ضايقن بك
ريحته مثل الكفن
لما صوتك يخذلك
لا انت قادر تدفنه
ولا انت قادر فوقه تعبر
وبين صمتك والكلام
يرتجف صوت الشجن
والمدينه الضايعه
تحاول انك
تلقى فيها لو جدار
فوقه تنشر
قسوة احزانك وظلك
فوقه تكتب:
كنت اسكن في عماهم
كانت اعيوني مداهم
وللأسف.. مات الوطن
لما نومك..
يصفع ارموشك سهر
لما همك يزرعك
خوف وآلام وقهر
لما وحدك تنترس
هموم واحزان وشجن
لما وحدك
في مدى الغربه تضيع
وهذا برد الشوق يلفح خاطرك
لما وحدك
في متاهات الضياع
تصير تسأل عن سكن
عن تواريخك.. عناوينك.. واسمك
عن بقايا أمكنه
كان يسكنها وجودك
وتضيع منك كل جهاتك.. كل حدودك
وتبقى وحدك..
تشتكي غدر الزمن
ويا البعيد الي كسرني
ليه نزفتك.. مثل حلمي
ليه حملتك.. مثل اسمي
اريد منك..
اقدر اهرب.. واتحرر
اريد اشوفك طيف دمعه
فوق جفني في سكوتي
في صدى حلمي وموتي
اريد طيفك يندفن
يا مدينه
ليه صرتي شاحبه
وليه احسك
مره ضحكه
ومره دمعه صاخبه
وليه طيفه
مره يرحل.. ومره يرجع
وبين شوقي والتياعي
ارجع لحضنه أحن
................
يا مدينه ..
ليه صرتي
كلما يصفعني اسمك
احس عمري..
والأماني كلها
تضيع مني وتنسرق
يا مدينه
ليه صرتي
فوق جفني عايمه
تغيرت فيك الأماكن
والي فيني كان ساكن
غادر بروحي واخذها
وماتت الأحلام فينا
بين هوجاس وأرق
ويووووووه وينك
قصدي ويني
ايش فيني يخذلني أنيني
يا مدينه
لاجل نزفي جاوبيني
وانقذيني من الغرق
ويا حنيني..
الي أخذني لكل رصيف
فوقه أهديتك جنوني
ويا حروفي.. الي بكتك
داخلي ترفض تموت
ولما أعياها السكوت
صار يغويها الورق
وآه يا صمت الشوارع
جيتك اسأل .. عن مواجع
ما عرفها غير قلبه
الي وعدني .. وكان كاذب
نموت لو مات الهوى
للأبد ما نفترق
وآه .. ابلع التنهيده غصه
وادخلك وحدي أتوه
لا عبرني هالرصيف.. ولا عبرته
حايره وسط الألم
وبعذابي أحترق
.................
ويا مدينه من دخلتك
صوتي أصبح
هم واحزان وشجن
ويا البعيد الي نزفته
منكسر في داخلي
شي أكبر من وجودك
شي أبعد من حدودك
وحتى موتي صار أشهى
وغربتي صارت وطن
صرت ادورني عليك
حلم ضايع
وكل ديره من مواجع
البستني الموت واكثر
صار يسكني خراب
والعمر أصبح كفن
................
آه يا مدينه من كدر
من سكنتي داخلي
انطفت كل الأماني
آنا وياه انطفينا
حلمنا أصبح بعيد
يصرخ بليل الأسى
تحرقه نار الهقر
وآه يا البعيد الي نزفته
مدري هو الي كسرني
او آنا الي كسرته
او باقي فينا شي ..
بعده ينبض
بعده شامخ ما انكسر