[زياد بن فهد]

مساحة ..
اتخذها الحرف مني
ليترك العديد من علامات الترقيم ... فارغه بلا معنى ,

انا والله مااكابر
بس تدري
مايهون الدمع عندي..
وانت خاابر

آنا لااغرتني الدموع
رحت اركض للبحر
ارمي بوجهي عليه
ولا حضر وقت الرجوع
ما حدٍ يسألني .. ليه !
( ما ) .. ومالحها القدر..
هذي والله مو دموع
كلها موية بحر
وش كثر هالبحر غاادر
... انا والله مااكابر









رااح من عمري ليااالي.. ساابحٍ فوق الغيوم
. . . . .وما حسبت حساب للي في ضنا قلبي ضوت

عشت ف الحلم وصنعته وصانع الهقوى ظلوم
. . . . .بس عاد الطيب بلوى .. وحالي بالطيبه شقت

مااظن اليوم بـ اهنى.. يا سبب جرحي بنوم
. . . . .غيمة الدمعه تغني.. واطربت وجهي وملت

انكسر حالي ولا ادري..من يلوم! ومن ألوم؟
. . . . .ما به الا جروح قلبي..والكسور اللي شكت

كنت سارح في فضاي واجمع اصغار النجوم
. . . . .مادريت الا نجوم ٍ داخل ضلوعي .. هوت

صدمةٍ هدت كياااني وروّعت كل الحلووم
. . . . .صدمة شبت شجوني ومن غياهبها وعت

ماهقيت الكذبه اللي كنت اصدقها بيوم
. . . . .من بعد عِشرة سنينٍ .. تالي الكذبه صحت


هذا حالي.. رغم كسره راضي بهمه كتوم
. . . . .لو بغى ينطق بكلمه .. انكتب شعر وسكت








غلطان .. جيت اركض
اسابق اعذاري ,
لا تقول لي / بدري ..
لا تقول لي / مدري ..
والله انا داري ...
جمر الوله والشوق..
احرقني فغيابك ..
ومن كثر مااشتاقك ..
احرقتك بـ ناري ,
الا على الطاري ..؟
وينه نسيم الصوت
وينه دفا حسّك ؟؟
وينه ضيا شمسك !!
وشفيك ماتسأل ..
حتى عن اخباري !!








وليه ازعل من غيابك منت اول من يروح
ولا انت اول من يهيض دمعتي ويحيي جمرها

كان همك .. كثر همي! والا همتك الجروح!
ذكرى مرت وسط قلبي وانقشت فيني اثرها








شوف الألم واقراه
دوّنته .. بخطّي ..

تركني بمسراه
ابكي على حظّي..


ماانكر انه خاب ظني والهوى شلّت يديه
. . . . .ولا انكر انه من كبر جرحي تصاغرت الندامه

ايه اببعد .. وآخذه قلبي قبل لاتكسريه
. . . . .وش يفيده لا لامح بعد الخطا منك ابتسامه؟

علميني ليه طعنتي خافقي وانتي اللي فيه
. . . . .ما سألتي خافقك هالشخص جالك وش علامه !

ليه من بد الخلايق جاك .. وانتي تجرحيه
. . . . .ليه عاف قلوب تشري بالذهب حتى سلامه

الحماامه ..
وسط صدري
نور شمسك تحتريه

وامس رااح
ورااح نورك
والصدر ..
ويّا الحمااامه

وقلبي شلته في يديني .. آخذه ؟؟ لا .. اتركيه
. . . . .في يدينك لين يهلك من هواه ومن غرامه

هي كذا فالحالتين ان جيتي له والا اجيه
. . . . .بيشعل الليل ويغنّي كل لحنٍ في ظلامه

لين جيته ماسمعت الا " انا احبه وابيه"
. . . . .ولين جيتي قالها لك ثمٍ استرسل كلامه

هذا قلبي بين يدينك .. بس احكي واسأليه
. . . . .ليه لاجلك عاف ناسٍ بالذهب تشري سلامه









بكل الحب..
وبكل خجل ..
انثرها أمامكم ...

فاقبلوها بكرمكم ,


/


زياد بن فهد ,