ياجر قلبي جر لدن الغصوني... وغصون سدر جرّها السيل جرا
دخيل الله بن مرضي الدجيما الروقي
ياجر قلبي جر لدن الغصونـــــــــــي
_وغصون سدر جرها السيل جـــرا
وأهله من أول بالورق يورقونــــــــي
_على غدير تحته الما يقــــــــــــرا
على الذي مشيه تخط بهونــــــــــي
_والعصر من بين الفريقين مـــــــرا
لا والله اللي بالهوى هوجرونــــــــي
_ هجر بها الحيلات عيت تســـــــرا
لامبعد عنهم ولاقربونــــــــــــــــــــي
_ولاعايف منــــــهم ولاني مــــــــورا
وأكثر عذاب القلب يوم سنحونـــــــي
_بيح بصبري لو بغيت اتـــــــــــدرا
لاضاق صدري قمت اباري الضعوني
_كني غريب بالدلوهة مضـــــــــرا
وقلبي عليه اشفق وتبكي عيوني
_والحال من ود الحبيب تبــــــــــرا
ياعزتا لي من تفرق شطونــــــــــــي
_يعزا لي ارمي بالسلب واتعــــــرا
ان مت في خد بعيد انقلونــــــــــــي
_على هدي الزمل مشيــــــــــــه تدرا
ان مت في دافي حشاه ادفنونـــــي
_في مستكن الـــــــــروح ماهوب برا
ياليتهم بالحب ما ولعونـــــــــــــــــي
_كان ابعدوا عنــــــــــــي بخير وشرا
ولا انهم يوم انهم قربونــــــــــــــــــــي
_خلوني اقضي حاجتي واتـــــــــدرا
وياليتهم في الدرب ماواجهونـــــــــي
_وياليتهم مازادوا الحر حـــــــــــــرا
وياليتهم عن حاجتي سايلونــــــــــي
_يون اني اقعد عندهم واتحــــــــــرا
الخد برق في علو المزونــــــــــــــــي
_تقول براق من الصيف ســــــــــــــرا
وقفت عنده شابحات عيونــــــــــــــي
_كني غرير باللهاوي مضـــــــــــــــــرا