مسجات لامرأة من زمن الحب ..!
لو زادت جروحك على مرَّ الأيام
ماهي غريبة يسكن الجرح روحك
حتى الجروح تشوف فعيونك الهام
يا كثر من يحسد جروحك بروحك
------------
لا غاب صوتك صارت الشمس تزوير
الظل ميت والمدى دمعة النور
الغيم ينبت في سطوح المشاوير
والشعر يشرونه من بقالة البور
-----------
العام كنا أطفال في حارة الولف
ظلي لبس ظلك وحكيك لي كتابْ
والحين كل العابنا حلف في حلف
( والله ما تنطاق) ، ( والله كذّابْ ..! )
-----------
أدري محد غيرك له الأرض ترقص
وأدري محد غيري يشاغل عيونك
بس الحكاية قلب ما يقبل النقص
يبغاك كلك ..حكمتك مع جنونك
---------
نص السيجارة صار تاريخ مطبوع
على شفاتي من عصا في شفاتك
لا اشتقت لك دخّنت .. لو كان ممنوع
أجلد خطاية .. واحتضن ذكرياتك
----------
كل السجاير بعدها لعبة أطفال
تحرق ضلوعي وتهجى حروفي
الموت واحد .. بس الأيام غربال
تبقى بها الذكرى سيجارة بجوفي
----------
زار الحنين قلوب منزوعة الحقدْ
تخفي زعلها عن بشاشة هواها
حتى رماها الليل في غيهب الصد
جاع الهوى فيها واكل من وفاها ..!
---------------
ماعاد أقول إلا نصيبي بدنيايْ
أبكي على ميْت ولو قيل لي حي
الفقد واحد .. دام ماتفيد رجواي
ميت بعيد وحي ما يقرّبه شيء ..!
-------------
والله أحبك غصْب عن دمعة سهيل
اللي نثرتيها من عيون مسكينْ
أكتبك نجمة وأتمناك في ليلْ
تعمى عيونه ما يشوفك تصدِّين
-------------
تطمَّنت روحك عليك وعليّه
ما فيه غيرك يقدر يجور ويصد
حتى زرعتي في يديكْ ويديَّه
أحلى قصيدة ولف يختارها البعد
----------
أقابل الذكرى وانا بصدر مكشوف
أحكيلها عني بعد ما حكت عنك
ذكراك مني فيّْ تصوير وحروف
تنسب لتاريخي وهي كلها منك
--------------
( قلتي ) ترى رتَّبت وضعي على البعد
ما عاد تفرق عيشتك من مماتك
وحدَك قطفت الشوك في رحلة الورد
لا (يا بعدي ) .. وش همني في حياتك
-------------
مذهول من قسوتك وانتي على حق
كنتِ فعيني طول عمرك رقيقة
هي رغبة الملهوف في ساعة الصدق
ولا نسيتْ ان افتقادك حقيقة ..؟
----------
أول رسايلنا مواعيد الأشواق
أكتب لها عن شوق سوى الهوايلْ
لاصار كل الحب تاليه بفراق
لجل أيش أشاغلها بشوق الرسايلْ
--------------
رتَّبت وضعي ما تكون بحياتي
آنا أعز من اتهامك وأسمى
أدري محد مثلك نبت في شفاتي
بس الغصون تموت لا عافت الما
--------------
يا واقفة والكل يمشون حولك
وش غير عينك للكتابة نبيها
الله لو تدرين ساعة مثولك
لحروف قلبي كيف أعانقك فيها
----------
أسْتعذب غْرورك وأناديك منقاد
أثبت تفرُّد فيك وأنثر عبيرك
واللي جعل ما بيننا ( احدعش ) ميعاد
باقي مكانك لو طمع فيه غيرك
------------
احساسي افبعدك يخليك تبكين
واحساسك بغيرك يبكِّي عيوني
كأننا فالولف أكثر من اثنين
انتي وعِنْدكْ .. طيبتي مع جنوني
-----------
وحياة راسك ، يمضي اليوم مشتاق
أشتاق صوتك لو تململ بصوتي
لو تفهمين شلون شاعرك يشتاقْ
ما يبعدك عن ساعتي غير موتي
-----------
الحين وش يبقى نقوله ونبديه
أنا مثل ما آنا بنزوات روحي
أغليك دون الناس ، خاطرك أراعيه
وأكرهك يومكْ تفرحين بجروحي
----------
آخر ظلام الليل لاذاب صوتي
واستسلمت عينك لنومك ( وحيدة )
تذكَّري حزني وتاريخ موتي
وشلون قدَّمته مهر للقصيدة
----------
وشلون بتغيبين عني لشهرين
وانتي تعرفيني حنيني ربوعك
إما يموت الشعر حتى تردين
ولا أموت آنا أتحرى رجوعك
---------
أجمل بنات الكون أنثى لها شان
تشتاقها روحي وتتبع أثرها
من فيه غيرك يقدر يهز الاغصان
وتبقى عصافير الشجر في شجرها
------------
وانتي معي ؟ وشلون احسك بعيده
ضمي ضلوعي شوق ولا احتويني
أقصى طموحي في عيونك قصيدة
نفسي ولو مرة حنينك يجيني
---------------
يااااه .. انتظر بالله لآخر الصيف
مالقاك حتى حرف يروي حنيني
ماعاد لي الا تواصيف في طيف
لارمشت عيني غاب واعميت عيني
--------------
معقول بتغيبين ؟ (طيب عشاني )
خلي غيابك يوم وان زاد يومين
اما كذا .. ياحسرتي في زماني
وشلون ابصبر عنك بالله شهرين
--------------
تصدقين اليوم فكَّرت تفكير
خيال مايخطر فبال القصيدة
لونْ شوقي ضمَّني للعصافير
يمكن تبعتك للبلاد البعيدة
---------
ليتك تشوفيني بديت انتظاري
ابغى اجمع حضورك لموعد غيابك
ابغى اشتكيلك حرقتي وانكساري
لانهد حيلي منتظر عند بابك
------------
ياحبني لك غافية في سطوري
ليلك طويل وبسمتك فتنة الناس
وشلون لو يدرون وشهو شعوري
كان انثرولك ورد في درب الاحساس
----------
ضمي ضلوعي .. كلهم ما اشتهيهم
هذول عجزوا لايكونون ظلّك
والله يجوني بس انا ماابيهم
أرضى فبعضك واتمناك كلك
-----------
يغضب علينا الوقت مهما نهاديه
( الهاتف النقال رغم الخساير )
أحرص يمر الوقت وانتي معي تيه
ويحرص عناده ماشحنه قبل أسافر
----------
( أرقامك السبعة ) هواجيس مني
دايم تخبرني إذا صابني شي
الحين بتغيبين شهرين عني
وشلون ابعرف بعدها كانني حي
-------
لا تسأليني ليه حنّا هدينا
وصرنا نعانق بعضنا بالمشاعر
قلوبنا يوم استدلَّت علينا
تأكدت إنا قصيدة وشاعر
--------
هذي تواقيعي هدية زماني
للي يوقع ذوقها للقصيدة
أما احتفل فيها واحدد مكاني
ولا أتعداها وادور جديدة
--------------------
وش قولتك لو نتفق ونتراضى
أقدم اعذاري واراضيك هلحين
انتي تغاضي وأوعدك بتغاضى
لاحدتك لهفتك مثلي على الشين
---------
طيب .. بفكِّر كيف يمكن أراضيك
اش رايك اكتبلك رسالة جديدة ؟!
أصوغها وألفَّها في حكاويك
واكتب عليها خاص لأنثى القصيدة
----------
اقصى طموحي .. يوم تقفين عني
العب مع الاطفال لعبة جديدة
اما اسليهم بتاريخ مني
ولا اعلمهم كتابة قصيدة
----------
أحساسي انك لي ما فارق البال
واحساسك اني صعب يشغلك عني
يعني يظل الحال باقي على الحال
قربك وبعدك كله الحين مني
----------
سمي على روحك إذا طالعوا فيك
واقري كلام الله بدالي عليها
أخاف من عينٍ حسوده تشانيك
لابان حسْنك ينبت الشر فيها
-----------
سِمِعْتْ مرة في حديث الأماني :
( اشرب بعد غاليك تفرح بغاليك )
كاس العصير اللي بيدِّكْ عشاني
بقِّي شويّه فيه تراني أغليك ..!
----------
تأملي في خلقة الله فالناس
خص الجمال بناس كلاًّ يبيهم
وانتي بعد خصِّكْ برقة فالاحساس
وأعطاك منهم كل مزيون فيهم
----------
الوقت بالساعات مافيه تأويل
قصيرْ ليل الصيف مهما غفينا
الحين طال بغيبتك وأصبح الليل
مواسمه .. مواسم الحب فينا
----------
في مكتبي ساعة وفاليد ساعة
أقدِّم فهذي وأخَّر فهاذيك
أصور احساسي بلحظة قناعة
يسرع معك ويطول لاغاب طاريك
----------
عينكْ غشاها النوم .. لاعادها حالْ
وشلون أودِّعها بدمعة قهرها
واللي فتني فيك ما غيرها فالْ
مهما نبكِّيها ...نموتْ افحوَرْها
----------
ما أعتب علي عينك أبعتب على النوم
لجله سرقها وابتعد عن جفوني
بس الحقيقة لو تماديت باللوم
له حق يسرقها ويجفى عيوني
----------------
مأساتنا نحتاج مليون تبرير
لكل لحظة حلم لو نشتهيها
تخيليني مت وش ممكن يصير
حتى دموعك ما تبوحين فيها
----------
نمتي بعد ما فارق النوم عيني
جافى عيوني بس لجْلَ أتذكركْ
مليون واحد صار بينك وبيني
في كل لحظة يطعنوني بخنجرك
----------
مذبوح يستجدي بلحظة مماته
لو تنتظر ( ليَّه مع الموت ميعاد )!
الصمت قصة والعتاب التفاتة
والذنب قاضي والسواليف جلاَّد
----------
أستاذ أنا قدامهم بس قولي
بيني وبينك ( صدق أنا أستاذ روحك ) ؟
أعطيك من حرصي براءة فضولي
وآخذ بدالك لانجرحتي جروحك
----------
الدرب ظلمة ، والمواعيد شباك
والشارع الثاني ، تجاهل مكاني
وأنا بصمت الليل والنوم يغشاك
أهدهد أحلامي وأصبِّر حناني
----------
وآنا فقلبك لازم أغض طرفي
يومك لقيتيهم بلهفة حنينك
جميعهم تجَّار في سوق حرفي
ما يعرفون اني كتبته لعينك
----------
حطَّوا رسايلنا بصدر الجريدة
وأصغوا لقلبي يوم يشتاق قلبك
وشلون لو يدرون مين القصيدة
يمكن عطوني قلب ثاني يحبك ..!
----------
الصمت حاضر والحكي بعض الأحلام
وأرقام جوَّالك شواهد لقبري
الله كريم .. وكلها سبْعةَ أيام
والقى الحكي مطبوع في كتاب شعري
----------
حطي على وجهي قناع النهاية
غطي عيوني .. منهو الحين أراعيه
يكفي عرفت الدرب وانتي معاية
وواعدت طيفك كل مارحت أناديه
------------
أدري عنيدة ، والقصيدة عنيدة
والشاعر المفتون شابت قوافيه
أنثى القصيدة ( إيه ) أنثى القصيدة
( ملّتْ وشاعرها قديمة معانيه )
---------------
الليل شاهد والحقيقة فراشات
نور الصباح يبيّن اليتم فيها
ليه نتشهّى البرد لامنّها جات
والنار (تَبْرَد ) وهجها يحتويها
----------
كتبت للصورة ..وصورتك للحين
ماحد قدر يرسم عذوبة دلالك
الله خلقك احساس كل المحبين
كل من تغزَّل قال تِشْبِه جمالك
----------
نامي على فرشة غلاك وتعالي
بعد الفطور نقول وشلون كنَّا
من فيه غيرك مع مرور الليالي
يقدر يسولف للعصافير عنا ..!
يتبع
اخر تعديل كان بواسطة » إبراهيم الوافي في يوم » 04-10-2005 عند الساعة » 22:15.
|