[بنت شمّر]

خبزة احساس الفقير للشــــاعر .... خلف الكـريّع


اشعلي يانجمة العشاق ليلك واسهري
امشي بنفس الطريق وجرّبي نفس المصير

وبلّغي صادق تحياتي /لحزني وقهري
يوم كان الشوووق لايرحم ولاعندّه ضمير

وان تعبتي من دروب العشق واضناك سفري
اذكريني ..تستريح :الريح /ويطيب :المسير

واذكري..تاريخي الموؤود بانقاض دهري
شهقة الخطوه ( الأخيره ) /طيحة الحلم ( الكبير )

رحلة آمالي..فتات اوراقي..اطلال صوري
سكرة اشعاري..رماد ضلوعي ..احساسي الوفير

وغدرك اللي..ما احترم صدري ولاصان ظهري
وطعنة ٍ من يومها مامرّت ايامي بخير

السواد اللي على جفوني من آثار سهري
لو عرفتي كيف كحّلني به الليل المرير

كنت لاجا الليل..قلّطته على الجفن الطري
لين نصّبني السهر لعيون خلق الله سفير

وان نفاني للسهر -يامترفه - حكم قدري
هالسهر ياما نفى لي من ضحاياه الكثير

والبياض اللي تشوفينه تنامى بشْعري
من مظاليمه هلال اعرج ونجم ٍ مستجير

يارُفات الطيش في تابوت الاحلام البري
من خذلني بالبدايه كيف اصونه بالأخير ؟!

مابقى لك غير بعضي واستميحك باكثري
ضاع مثل النور لما ضاع عن عين الضرير

مثل ماضاعت عصافيرك عن اغصان شجري
مثل ماضاع الامل عن صبح شباكي الصغير

وما بقى لك غير سالفتي .وشعري ..وصوري
سولفيهن للشموع الحمر .. والفرش الوثير .

واوعدك وقت الحصاد اتجاهل الجوع \العُري
بس لاجل اكتب حروف اسمك بحبات الشعير


ولاجل اعلّم هالزمان المستبد العنصري
كيف يحتاج الغني لخبزة احساس الفقير





الرجــــــوله .. لشــاعر الغـــربه سليمان المانع

كان الرجولة بالمظاهر والاشكال
عزالله اني ماعرفت الرجوله

وكان الرجوله بالمواقف والافعال
عز الله اني مرتوي يالخجوله

ياجارحة احساس شاعر ورحال
غريب تايه من زمان الطفوله

ماكل من يكشخ من الناس رجال
الشخص جوهر وأفهمي ما اقوله

سطحية النظره ومعبودة المال
مايعجبك شكل الغريب ونحوله

شكلي غلط لكن على الكود حمال
ودرب الفخر نفسي عليه معلوله

والشاطر اللي يفتهم رمز الامثال
كم داس وقتك من سلايل جموله

لاني بمغرورٍ ولاني بحيال
لي روح عن باقي الخبول معزوله

باني لي اهدافٍ عظيمات وآمال
والغيم من شافه ترجى هطوله

ولايندمج درب الدناسه والافعال
والاصل يعرف من يتم بأصوله