مساكم الله بالخير و الرضى و العافيه
يعلم الله بأني مشتاق للجميع هنا
يا ثقل دمك .. يا ليالي الصيف=وقتك ممل .. و جدولك هادي
جيتي .. و جبتي الفشخره و الزيف=و مهايط البدوان الأجوادي
وشلون أجل هادي يروح جنيف؟=يا مال فرقا العين .. يا هادي
الكل غايب .. ينشد التصييف=و الدار لا ناشد .. و لا شادي
ما غير انا .. و أطراف ليل .. و طيف=و الحلم.. و التفكير .. و شدادي
من كثر ما كنت أتمنى الضيف=كنت أسمعه بالباب .. و ينادي
جاني وهم .. و الليل كان مخيف=زاد الوجع بأسلوبه السادي
من جد ذاك الليل مدري كيف !=أنشد .. و يِسمعني صدى أنشادي
و الله يا لولا الشعر و التوصيف=كان أنكسر قدامه اعنادي
و الشعر .. دله من دلال السيف=فاحت على ناري .. و بزنادي
فأن شانت الأيام .. زان الكيف=من عبرتي .. و أحساسي أقنادي
و اليا تساوت قلت ويش انضيف؟=هبت هبوب المسك و الكادي
يا جعل ما للشعر صدر معيف=شيخي .. و ربعي .. و أخر ابلادي
اغليه.. لو ما كنت به حريف=ماغير افرغ فيه رعادي
و انا ادري انه لو حصل تصنيف=فالشعر .. كنت الشاعر العادي
الشعر سيل الارض .. والتصريف = وجروحي .. الأخشاب فالوادي
له فالمحاني سلطه و تكليف = و أعمال خير .. ومنصب أقيادي
الله يديمه وسط قلب مريف = والله يقرّب حلمي الغادي
اخوكم
عبدالله