واعيني اللي يزف الحزن دمعاتها = من غايبٍ عيت الايام بوفاقه
اللي على قلبي الملهوف سيرتها =.من ميلة الشمس لين الشمس شعاقه
ما غير شغله يسوق الشوق يمتها =لي كن يهجي حروف الزين دقاقه
انا اشهدن كسرة افوادي بذمتها = والقلب فرقى الحبيب اتعب اخلاقه
اتلا العهد يوم لاقتني بسلامتها .=لدت بخدن يخطف الشوف براقه
وقامت تهرج ولا ادري ويش هرجتها =. العبره اللي بعين الشوق خناقه
قالت بعيد المدى والناس وذتها = وان العهد باق في بنده وميثاقه
وراحت وهي تلتفت وتسوق مشيتها = فرير ظبي لحقها صوت تفاقه
وش حيلتي يابدر ودي بشوفتها =. النفس للزين ملهوفه ومشتاقه
حوريةٍ ما بعد لمست انوثتها =توها لخنت عبير الشوق نشاقه
وكسرة بخور الهوى يابدر ما جتها =. الا من يدي معاها اورود في باقه
عنقا تقاسيمها يفرض مهابتها .=للقلب والعقل جذابه وسراقه
كن العسل ينتثر من فوق شفتها = والكلمه اليا لفظتها جات براقه
واليا تحققت شفت اشلون سكبتها = يالعنبوها ياخي ذربه وذواقه
ماهي من اللي تزيف لي مودتها = ناس على سيرة الاشواق بواقه
لكن الاقدار حالت دون وفقتها = صيور الايام جماعه وفراقه
ولا بيح سدي ولو اذوق حرتها = سدي على حبها قدر ومطباقه