اخواني واهلي وربعي وشلتي ( احم )
شلونكم .. وشخباركم .. بشروني عنكم ؟
انا آسف اني طولت عليكم واني وعدتكم بالقريب العاجل بس صارت بالقريب الآجل
ولا تزعلون علي ( امممممممطح على نوزاتكم
) والله لا يحرمكم مني ( هيه يابو الشباب )
قصدي الله لا يحرمني منكم ويخليني لكم ويخليكم لي
اكيد قاعدين تنتظروني وتقولون وين راح هالعلة ذا كل هذي كتابة
بس ترا يا جماعة اعذروني لاني هونت عن الطريقة الجديدة اللي قلتها لكم لانه شفت تفاعل كثير من الاعضاء هذا غير الرسايل اللي امتلا منها خزان بريدي
( ايه يا ملحك ) عشان كذا قررت في الاجتماع
اللي عقدته مع نفسي العزيزة وربعها ووزرائها اننا نأجل الطريقة الجديدة لبعدين لاني اشوف بدري عليها
ما بعد خلصت حش في الشعراء
انا ادري اني حمستكم على غير سنع ( مهيب غريبة عليك يالمطفوق )
سامحوني ولا يجي بخاطركم علي شي ..........
ها سامحتوني .. ؟
الله يسلمكم داري انكم تحبوني مالكم غيري ( خل عنك بس )
المهم يا جماعة الخير هذا الفصل الثاني من الجزء الاخير من التخاريف واللي قسمته لـ خمسة اقسام
عشان ياخذ حش اكبر
في هذا القسم راح نتكلم عن 3 شعراء واحد منهم يتقطع قلبي اني اتكلم عنه لكن ما باليد حيلة زلة
وتحسب عليه لاني يعجبني الشاعر ذا لدرجة اني الاحقة وين ما ينشر ( خابرك وسيع وجهك )
نبدأ المقال مع اول الضحايا واللي اخذ مساحة اكبر في هذا الجزء ( الله يكون بعونه )
هذا الشاعر سلمكم الله روض ( Dad و Mam ) في قصائدة
شاعر يقول حبيبتي بدوية ما تعرف الـ dad والـ mam
شاعر لكتب قصيدة تلقاها في كل مطبوعة وقبل مدة نشر في جريدة مشهورة ( ترا مهيب جريدة الرياض
)
( يا شينك لقمت تلمح )
وبعد اسبوع لقيتها في المجلة الشعبية الأولى على مستوى العالم العربي ........... !!!
صراحة استغرب كيف هوس الشهرة وصل فيه لها الدرجة
الاكيد شاعرنا العظيم ذا تلقى قصائدة كلها ( حبيبتي ) حتى لو كانت قصيدته بدايتها يتكلم عن
شي ثاني لازم تلقى حبيبتي ........ !!
هذا الشاعر اعتقد ما يدري ان للشعر انواع واغراض غير الغزل اعدها لك ( مندي , مظبي , مثلوثة )
( والله شكلك تكتب المقال وانت جوعان )
بعد هالبربسة نستعرض بعض من قصائد الشاعر هذا ( خليفة المتنبي )
يا نور عيني .. يا رجايه .. بدنياي أبيك جنبي وادري انك .. تبيني
لاحظوا معي الشطر الثاني الشطر الاول مافيه شي ( سليم ومتعافي )
الشطر الثاني هو قاعد يترجاها وبعدين يقول بلغة الواثق ( وادري انك تبيني )
سبحان اللي خلق هالشاعر كل شعره تناقض في تناقض ما لقيت له قصيدة متقاربة كلها تناقض ( الله يهديك )
يقول
بيني وبينك حالوا عداك وعداي ناس تداحمنا بجنب متيني
يقول ناس تداحمنا بجنب متيني !!
حشا شكلك وسط ناس دببه مهوب عصلان ( مثلك يعني )
طيب انا ابفهم وش دخل الحب بمداحم الدببة ؟؟؟؟
ما صار حب ذا هواش
قايل لكم تناقض X تناقض
........................................... الله يصلحك وانا عمك
يقول الشاعر :-
ما ضربناك من تحت الحزام لن .. مالك حزام ولا ظهر
افا السالفة صارت ملاكمة مهيب قصيد
اقول انتبه لا تتوهق فيني لاعطيك مهوب تحت الحزام الا فوق الحزام ( يا شديد )
يعني بالله ضاقت الكلمات والالفاظ وما لقيت الا هالتعبير
وبعدين وش هالحب الاقشر ضرب وهواش وتكفيخ
والله هذي سواليف وهروج مهوب قصيد
صدق لقالوا الشعر يحتضر .............. والسبب الحداثة
الله يرحم زمان الوصل بالاندلس .................................. !!
تقول الشاعره :-
انت بس اكذب علي وقل أبيك لاعزم النجمات واهدي لك قمر
اللي انا اعرفه ويعرفه غيري ان الحب مابه كذب وخداع واللي يسوي كذا ماله في ام الحب
طيب كذب عليك وقال ابيك واحبك واموت فيك و .. و .. و ..
كيف تنعزم النجمات ؟؟؟؟؟؟؟؟؟
اخبر ما معهن جولاات ولا عندهن تلفون لانهم قدموا على الاتصالات لهم عشر سنين ولا طلعوا لهم رقم
والفضائي غالي سعره والبيجر ما يوصل هناك والمسافة من الارض لهن بعيدة ( يا شينك لقمت تتفلسف )
والله شي ما يدخل العقل ........
اقول كيف الحال بس ......
اخواني سنايدي انشاءالله للتخاريف تكملة وبقية لكن في المقال ذا استعرضت 3
والقادم اجمل انشاءالله
وتمنى اني ما طولت عليكم ( لا عادي متعودين يابن الحلال ادري انك غثيث )
عزوتي اشوفكم على خير
الله الله بالتفاعل
فمان الله