.
خلاص ماعاد تعني لي ولا حاجه
...........رح جعل ربي يوفــقك ويوفقني
من بعد ماكنت نور العمر وسراجه
............اليوم صرت الظــلام اللي يطوقني
عطيتك أكثر من اللي كنت تحتاجه
........أسرفت في الحب لين الحب وهقني
خلاص مالي ومال الحب وإزعاجه
...........مالي ومال الدروب اللي تضايقني
تعبت أضم البحر وأهدّي أمواجه
......تعبت أجامل وأشوف الوقت يسرقني
شكواي للي عليه الضيق وإفراجه
..........اللي إذا شــاء يرحمــني ويرزقني
النــاس كــلٍ على دربه ومنهــاجه
..........وأنــا عن الناس مابه شي يفرقني
إلا إني دايم أحب الصدق وأواجه
.........مخلوق والله على هالوضع خالقني
حتى رفيقي ضماد القلب وعلاجه
..........على كثر ماأتمسك فيه صــدّقـني
لو أدري إنه مرافقني على حاجه
..........لــ أمسّـكه حاجته وأقول فارقني
( فهد المساعد)
.