[عبدالمجيد الحقباني]

الى شعبيات ...

الى اذواقكم المرهفه ...

الى اجمل الناس ..

لكم انتم ...


------------------------------

عندما تصبح المقدمه قصيده


والنهايه قصيده


افضل شي افعله هو السكوت




غريب الوقت برقع وجه وفاته نظرة عيونه _______

الا وش حاجة البرقع وكل زبدة كلامك عين؟

يبرقعك الزمن قسوه وزخرف وجهك فنونه _______

وعجز ازميل ومطراق الزمن عن زخرفة لحظين!!

حبيبي مهما جلد الحرف بدّل شكله ولونه _______

يظل العظم في حرفك بياض ٍ يفضح التلوين

ذكرتك يوم صاح الغيم وهل الدمع بمزونه _______

على طاري الدمع فزيت ألعن كل طواري البين

وجيتك لاهث الاشواق يبللني المطر دونه ________

نحرت البرد لعيونك و سـكيني حمر تدرين

وكني طفل خواف ٍ جزوع ٍ صكصك سنونه ________

يخاف الليل في غرفه لو العابه على الرفين

وظهرتي مثل وهج الشمس يلهب بالشتا سكونه _______

ياكيف الشمس والانوار مع هالبرد مجتمعين؟

أبسأل هو بقى للحرف يسأل قلبك اشلونه ________

ابسأل هو بقى لكفي مساحه وسط كف الزين ؟

وقلتي والغنج ينطق وهالمره طغى فتونه ___________

ترى شدّيت من قلبي وجو غيرك يا هالمسكين

لمحت عيونك وقالت: تراها فيك مجنونه __________

و لا تهمك شفايفها ترى فيني كلام ٍ زين ..

ضحكت وقلت يا عمري يا عالم قلبي وكونه _______

بغنيلك ثلاث اشيا .. وقلتي لو سمحت الحين

ثلاث ٍ هي (غرابة وقت) (برقع) (عين مفتونه) _______

وقلت الغنوه يا ( -----) مطالعها بها البيتين


(غريب الوقت برقع وجه وفاته نظرة عيونه ________

الا وش حاجة البرقع وكل زبدة كلامك عين

يبرقعك الزمن قسوه وزخرف وجهك فنونه ________

وعجز ازميل ومطراق الزمن عن زخرفة لحظين )

ومازالت الاغنيه لم تنتهي ...!!!


ولكم كـــــــــل الشكر