مرتادي منتدى شعبيات الكرام .. هذه قصيدة مختارة.. ولكن عجز قلمي عن نظم الكلمات لمقدمة هذا الموضوع .. فقوة القصيدة تعتبر مقدمتها ونهايتها .. ولمل فيها من بلاغة في التعبير ووصف متقن لحال ليس بعض بل أغلب مجتمعنا ومايسوده من مشاكل وأسبابها....
أتمنى أن يكون الاختيار موفق ويحقق الغايه المنشوده!!!!!!
بسم المنتدى وأعضائه هلا فيكم
ومديره وليلة غروب تحييكم
من خيمة ترسل الطيب لأذانيكم
واهل الوفا نارهم بالطيب مشبوبه
عندي كلام بوسط القلب بقوله
أشياء كثيره ولكن غير معقوله
أشياء تطيح قوي العزم من طوله
واهل الوفا نارهم بالطيب مشبوبه
ياناس كيف الحسد شب الفتن فيكم
إليا حسدتوا بعض يفرح معاديكم
يوّلع النار فيكم مايطفيكم
واهل الوفا نارهم بالطيب مشبوبه
حتى الأخو في زمنّا يحسد اخوانه
ماهمه الا حريمـــــــاته وعيـــــاله
وعلاقته مع عيال ابوه خربانه
واهل الوفا نارهم بالطيب مشبوبه
حتى الرفاقه تغير حيل رفقتهم
اللي من اول يجمعهم محبتهم
ان شفتهم قلت ياالله وش مصيبتهم
واهل الوفا نارهم بالطيب مشبوبه
مافرق الناس غير القيل والقالي
اهل النمايم عساهم مالهم تالي
اللي ينمون في قفايه وفي قبالي
واهل الوفا نارهم بالطيب مشبوبه
تلقى رسالة نفاقه وسط جواله
شيطان مايترك المستور في حاله
دايم على الشر تلقى هذي احواله
واهل الوفا نارهم بالطيب مشبوبه
مير أنصح رجال الوفاء حمالة القاله
اللي لثقل الحمل بالعزم شيّاله
لايقبلون المنافق هو وأشكاله
واهل الوفا نارهم بالطيب مشبوبه..