سمعنا كثيراً بهذه البرتقاله التي سلبت عقول الكثير ولكن هل هي بالفعل تستحق هذا ؟!!
اترككم مع هذه الأبيات علها تنال على إعجابكم ..
غركم مظهر جمال البرتقاله = ما عرفتوا وش حسبها من نسبها
لو بها حشمة وتخضع للعدالة = كان بين النـاس ما هزت ذنبها
هافي أصله وعمه وآخواله = همها ترقص وتلهى في طربها
الجهالة من يناظر هالجهالة = ما يميز وش محرم من رجبها
واحسايف كيف يخدعكم جماله = والبضــاعة كل شّرايٍ قلبـها
البنات الحور في نجد الأصالة = الحيا والستر من ربي وهبها
الفخر بالدين ما هو بالخمالة = والنحاس نحاس يفرق عن ذهبها
شف بالي واحدٍ مبغا بداله = عرضها مصيون ما زوالٍ سلبها
ما مشت عريا وداجت بالبقاله = العـقل والدين هو غاية طلبها
والله اني كلما شفت الرذاله = كن جوفي يصهره حامي لهبها
حالة صرنا بها ما هيب حاله = العقايب لا تجــينا من سـببها
النمل لا طار ينذر في زواله = كم ديـــار منعمه ربي نكـــبها
مثل جنة عاد يوم الريح جاله = صب ربك فوقهم حامي غضبها
العرب غنت على يالال لاله = والقدس تبكي وتنخى في عربها
صارت إسرائيل تقتل بالعماله = الشـجاع من العرب منهو شجبها
والعراق اليوم وضعه يـّرثاله= سـلط الله بوش دمرها نهبها
يالله احفظ دارنا مهد الرساله = من أمور تشعل النار بحطبها