مافي القلوب الا سهر يابس نجوم ..... ومافي العيون الا قـلـوب تسيلك
ومافي الغياب الا كـريـم ومـحـشـوم ..... ومافي الذهاب الا ثناك وجميلك
ومافي الضلوع الا عطيب ومـثلـوم ..... ومافي القدوع الا: هن,الله وكيلك
يااللي انت كنت الاطيب علوم وسلوم ..... من جيت, .. ولما لانهاية رحيلك
وياللي انت كاسـبها بخـسـرانها دوم ..... حصيلك انك ماتـبـقـى حـصـيـلـك
الموت لو ماهو مقدر .. ومحسوم ..... ..وماكنه الا أنت وفزعتك لدخيلك !
ماكانت هموم , وهي ان خليت هموم ..... يافـهـد بن سـلـمـان ماتنبغي لك
ياسابق جيلك , ولا شـحـت قــروم ..... ويا لاحق أجيال , ولا هان جيلك
عطاك قبل الناس تجلس به تـقـوم ..... وغـطـاك قـبـل انك تحطه .. يشيلك
جاريت أبوك , اللي ماجارته حلوم ..... بالطيبات , وهو من اهداك خيلك
الطيبة قبل يتقرنس بها سوم: ..... ان كانها ماهي لسلمان .. هي.. لك!
لقحت له اليوم الحساني , وجت : توم!..... ودفن الحساني .. فعل أبوك وسبيلك
آخر دلايـل شـيـخـتـك بشت وهـدوم ..... واول دلايـلـهـا طـهـارة شـلـيـلـك
وآخر دلايل شيخـتـك حـبـة خـشـوم ..... واول دلايـلـهـا .. زادك وهـيـلك
واكرم دلايلها : كم أنصفت مظـلوم ..... واعظم دلايل شيختك : لادليلك !
مـتواضـع الا لا بـغـت كـل زيـزوم ..... ساحة وغا.. تفرق هناك في صهيلك
عز الله ان المــوت ماهـو بمليوم ..... ماأحد يلوم أحد على أنه يجيلك !
دنياك دنيا .. وانت بدلتها اليوم ..... الموت هو من وين يلقى بديلك