يافلسفة هاجسي وخلاصة افكاري = ياقلبي اللي نبض بالشعر وفنونه

لجلك شرب دفتري من صافي احباري = ولجلك هويت السهر والليل وسكونه

يامنتهى رحلتي في الحب واسفاري = عراوي القلب في يمناك مرهونه

أسهر على صورتك وأستنزف اشعاري = وانخى لك الهاجس اللي فاض مخزونه

مشاعري تتجه لك دون مااختاري = طيفك شمال المشاعر مالها دونه

غيثك على مهجتي ما بلل قفاري = عطشان وصلك يبا يشربك بعيونه

صوتك مزاجي وشوفة وجهك سكاري = اسكر على شوفة المزيون ولحونه

باحت سدودي على طاريك واسراري = إسمك يدكدك سدود الحب وحصونه

بانت عليّه مواري حبك الجاري = وسط العروق احتمى والقلب ماعونه

عزاي في غيبتك مراكي ووجاري = والدله اللي على مرفاه مركونه

هذي علومي بعد فرقاك واخباري = أن كان تنشد عن المشتاق وش لونه