شعبيات - إغتيال قلب كريم!!

كنت أحسبك بلسم جروحي ودواي
كنت أحسبك ياشقا عمري..هناي
بس حساااافة..
قلتها بغصة ومرارة..ماعرفتك
واعترف آني جهلتك..
جايز إني ساذج وطيب زيادة
وجايز إني منجرفلك فوق عادة
وجايز إني منخبل..
والله مدري..كل شي جايز
بس أكيد إني عشقتك
وفوقها ردتك..وردتك
لاني شفت أحلامي بيك
وقلبي هالظالم../يبيك/
وشوف تاليها اطلعت..
مثل الزرع وردة بصبخة
ومن دموعه .. كان يرويها
انتظرهااا.._من هباله_
يما وشقد انتظرها..تفوح!
مثل الأم الترقب وحيدها
لقمة قلى..باقته دنيا
مراقبة..وتبني صروح!
وانهدم كل شي بنته بلحظة الجاها
جنازة..
مثل غرقان وتعلق بقشة أمل
وكنت أحسبك لي أمل..!
النهر تيار اخذني
وانت تتفرج عليه
/تفكيري سطحي/!!
وتضحك..
وتضحك..
وتضحك..
يما ما اصعبها شماته
يما ما أقساها..بقلبي
أعترفلك..
قبل أعرفك..
كنت ميت..شبه ميت
كان قلبي مابه ايناس وحياة
ومن عرفتك صار ينبض بالحياة
ليه تخذلني..بلحظة
ليه تطعني..بلحظة
واعتذرت..
واعتذرت..
واعتذرت..
وفوق عذري شقد توسلتك
بكيتك!!
دمعتي حمرا..بكيتك
لاخصف قلبك عليه
ولارحم..كلو من ايديه!
أعترف..كلو من ايديه
وراضي بالصار وجرى
ومحتسب أمري.. ب سلامك
إي سلامك هالأخير..
إي وداعك هالأخير..
ب/سبته/..
أخر أنفاسه لفظ قلبي أمس
أعذب احساسه دفن قلبي أمس
وبعد ما انته حرقته..
من على جرف المحبة..
آني ذريته أمس.