السفينة

ضاقت وساع الفيافي ، والوعد متن ( السفينة )
للطريق اللي دعاني بعد أمان الله ..وأمانة
لا تناديني ..وصوني قلبك الله لا يهينه
لا يراهن في رجوعي ..لجل ما يخسر رهانه
ليه ما ارحل عن غرامك..بعد ما ذقت الغبينة ؟
إذكري لي شي واحد يستحق اقعد عشانه
قلب ما حن لوصالي ..ماني بحاجة حنينه
واشهد انه ما يعزر بالرفيع الا هوانه
الهوى الغدر ..حد الله ما بيني وبينه
والرجل لا خير فيه ان ما حفظ قدره وصانه
واحد مثلي ليا من حدته عوجا سنينه
ما شكا لا قرب ابنا ادم لو هو اغلى من اخوانه
يوم قلبي ما عصاك ،وما قدرتي تذبحينه
ليه خنتي فيه وانتي معه من نفس الديانة؟
كان ذبحي بيدك ارحم ..لي من اللى تفعلينه
وان طلبتك تذبحيني ..ما ذبحتيني ..لعانه
كل جرح من جروحي :تذكرينه .. تنكرينه
كن مالك في نزيفه ( يد ) خانت بالأمانة
ينزف الخفاق تواضع لين لطختي جبينه !!
والا انا ماكنت ابيها توصل لحد الاهانة
قلت : ( من باب الميانة ) صاحبك وتعذبينه
لعنبوك ارخي معاي شوي ..ما صارت (ميانة)
طعت عقلك يوم قيل :ان العقل للبنت زينة
لكن الشرهة على ال..كنت احسب انك تكانة
من بعد ما كنتي انتي في حشاي اغلى سجينة
باوعدك ..باطلق سراحك ،واتهمني بالإدانة
وين رايح ..؟.لأي درب ما يرجع للمدينة
ليه رايح ..؟.لان قلبك ماترك قلبي وشانه
كيف ابا انسى ..؟.ربي اللي ملهم القلب السكينة
مثل ما عانه بقربك ..لا نوى فرقاك عانه
كان قاسي يجرح اطراف السكاكين السفينه
ما يطيح .وبنت مثلك حبها هزت كيانه
والا أنا خابر خفوقي ما يمد الا الثمينة
وان بغى يغيض الثريا..قعد القمرا وزانه
مزعل لجلك هنوف رجت عقول رزينة
وان تهادت بالطريق الجرهدي .. تزهر جنانه
جادل حتى (الجمال )ان شافها..كتف يدينه
و(القمر)لو شاورت له..ينزح وتقعد مكانه
كانت أول من تحكم في فروع الياسمينة
وان تعدتهن تثنن..خيزرانة ..خيزرانة
بعتها لاجلك ، وصارت لا صغر أطرافك رهينة
والا هي لفتة هدبها تغمزك ثقل ورزانة
والخفوق اللي تغذى من معزة والدينه
مشكلته انه تعلق في زمن ما هو زمانه
كل ما زادت جراحه،واكتشف غلطة ضنينه
صدفه ان قال:مابه شخص يستاهل حنانه
يوم نادي:يا فلانة !! مارضيتي تسمعينه
لين صوت :يا فلانة ،يا فلانه ،يا فلانة
كنت اشوفك زعفرانة تقرض الورد وتدينه
يمكن اني ما قطفتك ،،بس اشوفك زعفرانة
كنت اهاب البعد عنك..واطلبك لا تذكرينه
كان خوف من الفراق ..وخطوة الفرقا جبانة
ما اقتنعت ان ( الخيانة )للرجل تلوي يمينه
لين ما ربي بعثك ،وذقت طعم ( الخيانه)
إسمحي لي ..ما بقى فيني مكان تطعنينه
واقلبي فيني مكان من جوف قلبي كل عطفه..وامتنانه
والله الله في عذابك ..بتركك عينك بعينه
دلليه ،ولا يرده عن شقاك الا لسانه
ولا اناا قررت اسافر ،وامتطي ظهر السفينة
(لان ما به شي واحد يستحق اقعد عشااانه)........