|
مرثيـــــّه "مشاركة أولى"
[c] * مرثية في بدر بن ذيبان الدعجاني [/c]
واطـيري اللي مات لا واحسـافات X X عـلى القطامي نادر العش ياكليب طير السعد صيده من الجول جزلات X X عطب الضرايب من حرار معاطيب مرحـوم يانطـاح صعب المـهمات X X مـــرحوم ياشيال حــمل المواجيب تكسرت عليك في الصدر عـبـرات X X والـكبد يشظاها سـوات المشاهيب كنـّـيتها وأبـديتها عقب حسرات X X وحـامي لظاها حرّق الخد والجيب على بلـيهي الحــمول الـثقيلات X X يـقلط على حوض الـمنايا لياهيب تـبكي عليك المـرجله والمـروّات X X في ماقـف تـعزّ فيه المـطالـيب تـذكرك في وقت القسى والـملمات X X تصيح بأعلى صوتها وين أبو ذيب عـليك يبـكن الـبني العفيفــات X X شامن عن العشاق والكحل والطيب زاد العـويل وصاخن الدمـع ونات X X بيّح عزاهن ستر بيـض الرعابيب يفقدك في شهب اللـيالي المحفـّات X X ربـع مرامـيل يبـون الـمعازيب ويفقدك من يشكي من الوقت ميلات X X حاديه من صكـات بقعـا مصاليب يويّ رجـــال ليـا قام قـومات X X يشفي غليل اللي بـصدره لواهيب ياصـل بعيدات الهقـاوي الصّعيبات X X ويرد الموارد نازاحـات المجاذيب ياخـوي ما يكـفيك تعديد الأنـعات X X المعذره يامـنقع الـجود والطـيب كلـّت بواكـير القـوافي والأبيـات X X أرقـيتها في عالـيات المــراقيب وأتعبت من يبغي من المجد طولات X X تـقصر حبـاله ماورد لك مشاريب إن قيل وين الجود هو حيّن أو مات X X قالوا دفنا الجود في قـبر أبو ذيب بدر سطع بين النـجوم الـمطلات X X والبـدر في دور الفلك لازم يـغيب والبـاقي اللـي شد سبع السموات X X رب الـبريه عالـم السر والـغيب عساه يغفر لك جميع الخطّيـّــات X X وعساه يسمع دعوة العبد ويـجيب [l]عبدالله عثمان العتيبي[/l] * (لم تنشر من قبل) |
رحم الله الفقيد واسكنه فسيح جناته
واطال الله عمر الحي ومتع بايامه اخووي نمرود شكرا على إيرادك لهذه القصيده للشاعر عبدالله بن عثمان العتيبي وقصيده لها تاثيرها في النفس 00 وعبدالله بن عثمان شاعر معروف وجزل ان لم تخن الذاكره وعلى العموم في كلا الحالتين شاعر هذه القصيده جزل جزل وامد الله بايامه ورحم الله الفقيد تحياتي لك |
السلام عليكم ........
اخوي نمرود بالاول ....... حياك الله بين اخوانك .......
ايه هالقصيدة وربي نادرة ومن أجزل المرثيات اللي قريتها ...... وحفظتها عندي بدون تردد الله يعيطك العافيه وشاكرين انك نشرتها لاول مرة واخترت شعبيات ....... تسلم يا بعدي تسلم وبيض الله وجهك .......... الله يرحمهم جميع وينولهم مبتغاهم جنة ماهي كما جنات الدنيا ...... تحياتي العاطرة أخوي ويا هلا فيك ويا مرحبا ...... أخوك/جاسر الحربي |
رد على المرثية
يا كليب لاتكثر على القلب ونات,,,,وما قدر الله جا بليا مطاليب
الواحد المعبود رب السموات,,,,,اللي قضبهنه بليا مقاضيب دنيا تطوى مثل طي السجلات,,,,,ولا دايم ألا عالم السر والغيب يوم ان راس المال فيها المروات,,الله يرحم من تسميه ابو ذيب وعسى البقا لأهل الوجيه السفيرات,,,شرواكم اللي يفعلون المواجيب واهلاعدد ما اقبل زمان وما فات,,,واعداد ما سال المطر بالأداعيب واعداد نجم تحتويه المجرات,,,,بين الجدي وسهيل هو والمشاهيب ومن عقب ذا يا راكبين الهد يات,,,حراير ما مونة للمناد يب حمر مواطيها على الخد عجلات,,,ما فوقها ألا كورها والمزاهيب تلفي على اللي له على العز وقفات,,,زبن الدخيل اللي يفك المناشيب في دار ابو عثمان للطيب نفحات,,,,ريف الضيوف اللي يبون المعازيب يعطي ولا ينشد عن اهل العطيات,,,حر مكانه فوق روس المراقيب واليا وصلته باشره بالتحيات,,,,وعطه السلام اللي لغيره فلا جيب وقل له ترى قصدي لقافك مجارات,,,والا فعولك تتعب اللي يبا الطيب والمعذ رة ابا اختصر باقي الابيات,,,لو كان ما اكفتنا التماثيل ياكليب |
السلام عليكم .........
حياه الله غلاب ..........
تسلم اخوي في مكانها ........ ورد شافي ........ صح السان القايل ولا هنت ......... تحياتي اخوي جاسر الحربي |
رد على غـــــــــــلاب
يا كليب لاتنكى الجروح القــــــديمات.......... يضيع فيها مـــشرط الطـب يا كــليب
إرفق بقلبن هيّضه ذكر مافـــــــــــات............كنّ الــنداوي يشــلعه بالمخـــــالــيب إدله عن الماضي ولو بعض الأوقات .......... لو دكّ في قــلب المـعـنـّى دوالــيب وإلعب على الدنيا مزوحن وســـجّات ..........واتبع مراميها عسى سهمك يصـــيب ومن عقب ذا ياراكبن صيــــــعريات.......... شيب المحاقب كاسرات المصــاليب سلم على غلاب زبــــــن الونــــــيات ..........مني تحـيّه يا مـــهدّى الأ صــاعيــب اللي بدع قافــــــن لـــقافي (مجارات).......... ماقصده الا الرد ومزارق الــــطيب أطريتني وأرقيتني في العــــليــــــّات ..........الله يعلّي شــان غـــــوج الأ طــالـيب يامرحـــبا في دارنــــا لك كرامــــات...........ومع القرى طيب النبا والــتراحــيب مضحّى ومقيالــن وممــسا ومــبــيات..........حط الرحال وريّح الـــفطر الشـــــيب وليا لـــفيتونا نــــــسوق البـــــشارات.........وأسلم وسلم لـــي على الربع يا كلـــيب [l]أبو عثمان[/l] [l]( نمرود )[/l] |
رد على قصيده أبو عثمان
السلام عليكم ورحمه الله وبركاته................أمابعد
اللي جذبني للقوافي مناجـــــــــاة 0000000000000000 كلن رفع بالصوت ياكليب ياكلـــيب ياخال قافك حط فالصدر لوعـــــات 0000000000000000 وابياتك اللي هيضن الهناديـــــــــب جاء للوفا فيما نظمته علامـــــــــات 0000000000000000 يالوافي اللي ضاق من غيبة اصحيب هذي طبوع الحر بالذات بالــــــــذات 0000000000000000 يوفي مع ربعه بطيب الاسالــــــــيب اللي رحل جعله عن النار منجــــــاة 0000000000000000 في جنان خلد وحور عينٍ واكاعـيب والناس لو طالت لياليهم افــــــــوات 0000000000000000 وعلى البنادم دايرات الدواليــــــــب وانا تراني عقب ماشفت الابيـــــات 0000000000000000 مع الثلاثه قلت وين انت ياكلـــــيب؟ وسلامتكم واسمحلنا في القصور ياخال |
رد على راعي المغــــــاتـيـر
ياكليب هيّــضت الــقلوب المـــغلاّت..... وألهبت فيها جذوة الـشـوق ياكليــب
رفعت صوتن عالين فوق الأصـوات.....يسمع صداه اللي ورا النيل ونخــيب وتواردت غر الــقوافــي سريــعــات..... من كل فـجّن عــاوين دونه الـذيــب يامرحبا باللي نظم عـذب الأبـــيــات.....الشـاعر اللي هذّب الــقاف تــهذيــب يقول في صدره من القاف (لوعات) .....لاباس ياخيــال حــرش العــراقيــب يــذكر فـعول أهل الوفـى والمـروّات..... مثل المنادي في الخلا ماله مـجيب اللي لــهم في ذروة المــجد جــولات.....على الرمك ولاّ على شـمّخ الـــنّيـب ساروا على الــبيدا قوافل ودقــــلات..... وعاثت بسيرتهم عصوف الأهابيب عســى لهم في جنة الخـــلد مـــيقات..... ولعل يحيي ذكرهم صالح الــصّـيب والحيّ جعل سنين عمره طـــويلات..... ويمــد في رزقـه مــلبّي المــــطالـيب والعــفو كان الــقول جـا فــيه زلاّت..... وسـلّم على راعي المغاتير ياكـليـب [l]نمرود [/l] [l](أبو عثمان)[/l] |
السلام عليكم ورحمه الله وبركاته
حياك الله ياأخوي نمرود
ونشكرك على النقل المباشر وصح لسانك ياخال نسأل الله أن يطيل في عمرك ويجعلك ألنا ذخر والسلام ختام |
| الوقت المعتمد في المنتدى بتوقيت جرينتش +4.
الوقت الان » 05:44. |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع ما يكتب في الموقع يعتبر حقوق محفوظة لموقع شعبيات- شبكة الاقلاع