|
شفايف شوق
يمر قلبي .. على البيبان يرسمني سنابل شوق وكم غيمه .. وترنيمه شجر عريان ورق يابس واصفر تمد اعيونها روحي وصدى بوحي يبعثر شارع أحزاني أحس قلبي رصيف أخضر يضيع الشارع وحزني .. شفايف والعطش طيفك وكم غصه توقف بيني وبينك واحس عينك .. سحابه بس ما تمطر أحمل خطوتي همين واصبرني بصدى بعدين يكسرني حنين اليوم يجي بكره .. بقايا والأمل ذكرى يطيح الحظ ب احلامي ألمه ماي بيديني واكيد الما فوق اليد يتعثر واتكدر احبس صمتي المغبون واسألني ويش الي صار وكدرني؟ يجاوبني الصدى .. غابوا واحس اني جدار يطيح تهزه الريح .. ويتكسر واحن اشتاق لعيونك لجنونك للحيره .. لعذاب الشك والغيره واحس اني .. بلا صوتك وطن مهجور جدار بغربته مكسور بقايا سور يداوي وحدته ف الصمت بين العتمه والظلمه يتاني صبحه المغدور ووعد الصبح .. بليل الهم يتأخر واغص باسمك ادور لي دوا أبلع به التنهيد واصفق إيد حسافه ب إيد واعطش بك علمني .. شنو يداوي وقوف الما وكيف أقدر أسولف للحزن عنك وعلى فرقاك أتصبر واتكدر أنادي اسمك بلهفه ولا أبرد ولا أدفا أشوف الناس .. كل الناس بس طيفك تغرقني مجاديفك واحس القلب إلا عنك .. صار اعمى يموت بصرختي صوتي وأنخى هالصبر يصبر يمر قلبي .. على بابك يسألني عن غيابك يرسمني .. سنابل شوق وكم غيمه .. وترنيمه غصن يابس تعرى بك ورق أصفر يضيع الشارع وحزني على البيبان شفايف شوق تعطش بك واحس اني مع الغربه جدار يطيح ويتكسر .. |
رد : شفايف شوق
تمدين ارواحنا بالحب النقي غرقنا في مجدافيك لروحك الود ولنصك القمة |
رد : شفايف شوق
إقتباس:
عذوبة حروفك تحلق بي الى عالم الشوق واللهفه احس حتى في صمتك نسيج من الروح للروح احس بسكوتي يغلب حديثي وانبهاري يحاول يلملم نفسه تخيلت هذه الحروف بصوت محمد عبده .. منتهى .. ما اجمل حرفك |
رد : شفايف شوق
كانت اوراق تساقطت من شجرة التوت الشعريّة
وفي كلّ ورقة رسمة رمزيّة لـ حالة ما لملمنا هذه الاوراق لـ تسقط بين أيدينا توتة كانت هذه خاتمة هذا النصّ جميلة تلك الاحاسيس المبعثرة بـ برياح الخريف \ النزيف في دواخلنا اولتي تهزّ شجرة شعرك لـ تُسقِط من فوقنا الاوراق والتوت فنستظلّ بـ ظلّها وجوّ الخريف \ النزيف يحوينا ألف تحيّة لك |
| الوقت المعتمد في المنتدى بتوقيت جرينتش +4.
الوقت الان » 03:56. |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع ما يكتب في الموقع يعتبر حقوق محفوظة لموقع شعبيات- شبكة الاقلاع