السلام عليكم ورحمة الله وبركاته


اسعد الله مساءكم جميع ..


اتمنى ان تحوز على رضاكم واستحسانكم ..




لا سالت ادموعي على الخد يا سيف
ما هي بيديّه مير والله غصيبه

/

لان الصبر ماهوب دايم على الكيف
فاللي بقى من دمع عيني اجيبه

/


والبارحه يا سيف فوق المشاريف
جريت انا الونات حالي كئيبه

/

وهيجنت بفياض الألم رحلة الطيف
حسبي على من هو تسبب حسيبه

/

العشق مركب والمصايب مجاديف
وشط الهوى ما يرحم اللي مشي به

/

يحرم علي الزاد وقتي غدى مخيف
يوم الرجا جاه الأسى شق جيبه

/

ملّكتها روض الحنايا لها ريف
صارت لي الافراح واغلى قريبه

/

سلّمتها ما سلمته الموالايف
ثم انكفت ما كنها الا غريبه

/

قالت عرفت انسان تاجر وثقيّف
وانته فقير وصرت انا له حبيبه

/

وقالت فمان الله كب السواليف
كل ٍ على ما قيل يأخذ نصيبه

/

واليوم اشوف الطيب وآقول يا حيف
في وقتنا طيب المشاعر مصيبه

/

يبست عروقي والضما نفحة الصيف
ما هو بيديّه مير والله غصيبه

/

متعب فهد