تعالي شاعرك ولّع قصايد ..شمعه .. وجمره
. . . . . . . . تعالي واشعلي باقي القصيده وارفعي جوّي

تعالي يابعد ( أربع خناجر ) يابعد شعره
. . . . . . . . تعالي ياأسفل الضّلع الحدب ياقمّة علوّي

وش أسوي لو انك ماتجيني بأول السهره
. . . . . . . أمانه بس قوليلي وش أسوّي وش أسوّي

تحسبيني قوي وأقول عادي انتظر بكره
. . . . . . . غبيه ماعرفتيني ترى ماهوب من قوّي

مشاعل .. والهوى مثل الأدب يحتاج له خبره
. . . . . . . وانا بأوّل علاقه يامشاعل توني توّي

ماعرف ان الهوى لمسه .. اعرف ان الهوى نظره
. . . . . . . إلين انه دهشني الخصر هذا شلون متلوّي ؟

هنا .. بس طارت الفكره وجت ياضامي السكره
. . . . . . . . قضيت لكل جمله تبتدي (ياليتني ولوّي )

عرفتي ليه ماحب الظّهور وطاري الشهره
. . . . . . . . . حرام أرقى على كتف الحقيقه وأعلن سموّي

وانا شاعر كذوب ولا انكشف يتحجج بطهره
. . . . . . . . كثر مادنّس الواقع كثر ماشعره يدوّي

يبيع الوهم لعقولٍ غبيّه ( تدمن الفكره )
. . . . . . . . . يفلّون الحجاج إليا وصلت لـ نشوة دنوّي

تعالي بس يا (عصرة عنب ) يالبيضه السمره
. . . . . . . . . . أجل علْتي عليهم ياقمر يانور يامضوّي

لبستي الي على بالي أمانه شصار بالسهره
. . . . . . . . . سمعت أخبار هالعالم بعدها ويش بسوّي ..!