اريد اسأل
عن اخبارك
وعزة نفسي تمنعني
ويش مسوي
وكيف ايامك بدوني
وكيف تمر لياليها

ترى اعيوني
خذت طيفك
طفل يلعب
يحب يسهر كل ليله
يسهرني
ما بين اشواقي واظنوني
ونار الشوق
عجزت اني أطفيها

مثل هالوقت
تكون صاحي؟
تكون نايم؟
تفكر فيني أو فيها
تحاتيني ... تحاتيها؟
أمر لحظه على بالك
وتسأل طيفي اشلوني
وكيف اسهر مع اعيوني
وبين اللهفه ويا الخوف
كيف انه لذيذ النوم يجافيها؟

تراني بخير ... ولكني
كل شي عنك يسألني
لفتاتي... ابتساماتي
دموعي ويا ضحكاتي
رصيف الشارع المنسي
صوت الريح على الشباك
سوالفنا.. صداها اهناك
أمانينا .. أغانينا
التسامرنا بليل الحب
وال كنا ... نرددها ونغنيها

علمني
عن اوقاتك.. كيف تمر
وكيف تموت
عقارب ساعتك فيها

لحظاتك
كيف تقدر تلونها
صدى فرحه
علمني
طويله تمر ثوانيها؟

كل ليله
يمر شوقي على بابك
ما شفته
ما حسيته واعرفته؟
أو إنك تجاهلته
حيث نامت احلامك
وصار حبي .. صدى ذكرى
تحاول يوم تدفنها
من ايامك وتمحيها

وينك انت؟
طمني
إلك تشتاق أيامي
صدى صوتك
يمرمرني بأحلامي
خبرني.. كيف تمر أيامك
وكيف تنام
من دوني لياليها

إلي تشتاق؟
وهل أطري على بالك
علمني كيف تقسى
وكيف تنسى
علمني
جراحاتك كيف تقدر
بالقسوه تداويها؟

طويل الوقت من دونك
وحتى ساعتي تبكي
عقاربها ف تباعدها وتدانيها
أحس انها
بحور بصمتها أغرق
ترميني .. تلقفني
تقربني وتبعدني
تنكر لي وترفضني شواطيها

مشتاقه
ورب الكون مشتاقه
ويا ليت اقدر
أشواقي أداريها

اريد اسأل
عن اخبارك
وعزة نفسي تمنعني
اريد اسأل
كيف تمر أيامك
وكيف النوم
يفز ... يجرح لياليها

أنا نومي يعذبني
لأن طيفك
طفل يسهر .. يسهرني
وحنيني لك
قلب ثكلى
فاس الموت
كسر كل أمانيها

وليل الفقد
شموع ذابت من الأحزان
دموع وصمتها أكفان
نار تشعل بوجداني
عجزت اني أطفيها

وتسألني عن اخباري
ويش اخباري
أنا ف بعدك
حياتي تكون
مراكب في الغرق تاهت
حنين الوقت..
ضيع كل مراسيها