انزفيني يا جراحي
اغسليني
اخرجيني من السواد
داوي قلبي اليحترق

كل شي أصبح غريب
الوطن أصبح رماد
والفرح..
وين الفرح؟
طيف لحظه وتنسرق

الحلم أصبح بعيد
والنوايا مُحزنه
علقوها
فوق أهداب الوريد
دموع تصرخ من أساها
كل مساحات الورق

كيف نرسم هالبياض
وجه أعمى
في مدى العتمه يضيع
يختنق.. يرتجف
وحده يتعلق بخوفه
يحمل أحزانه مواني
يصفعه صوت الغرق

لا شواطي
يرتحل فيها ويسكن
ويقول يمكن
نهاية الرحله قريبه
والحزن يوقف نحيبه
ويا عسى الليلات تزرع هالوساده
حضن دافي
والنوم يجفاه الأرق

.....................

انت يا وجهي الآخر
يا اشتعال الدم في عروقي
ليه يحرقني برودك
وليه أحسك في خفوقي
ألف طعنه..
ألف جرح.. وألف نزف.. وألف هم

ليه ساكت
مو إنت مرايتي؟
ليه تضحك وآنا أبكي
يعني هانت دمعتي؟
الجفا صار طبعك
وصار يغريك الألم

ديرتي روحك
كنت أتنفس هواها
كنت احسك
بيت يجمع كل شتاتي
كنت احسك
نبض يسري في حياتي
كنت اشوفك.. ضي مدينه
حروف مرسومه قصايد
ما كتبها أي قلم

ولما أتوجع وأصرخ
قبلي ينبض في عروقك هالألم
كنت احسك.. لو أغيب
تبقى ضايع
تسكنك كل المواجع
كنت حتى .. وانت نايم
غيبتي تصعب عليك
ويكون بُعدي
أشباح تكسر
كل شبابيك الحلم

كنت فيني
تشتهي لون الحياه
كنت آنا عالمك
من بداياته وحتى مُنتهاه
كنا نبني.. في الخيال
جنه نسكنها فرح
صارت الجنه سراب
وكل وعود القلتها
للأسف .. صارت عدم

....................

اليوم جيتك
قلت ادورني عليك
جيت اصور لك عذابي
قلت يمكن .. يمر طيفك
يذكر الماضي الي كان
واشتكي له كل مابي
لك خذتني خطوتي
متلهفه لنفس المكان

انتظرتك خايفه
الروح تتلفت حزينه
للقا متلهفه
انتظرتك.. وانتظرتك.. وانتظرتك
وآه يا بُعد المسافه
تعال يمكن .. لما اشوفك
احس بشوية أمان

ريحة أنفاسك
ضحكاتك
صوتك وعطرك
ولفتات الحنان
وهمسك الي يستفز الشوق فيني
وقلبي الي .. من سكنته
مره يضحك .. ومره يبكي
ومره يصرخ .. منك ويشكي
ومره يسأل
يا ترى الإنسان يغدر؟
أو إحنا من تعبنا.. نتهم غدر الزمان

..............................

قولي وينك
ليه طولت الغياب
عنك اسأل واحتريك
عيوني ملت من دمعها
وتعبت الشكوى بروحي
تشتكي منك عليك

حتى حرفي
صار ينزف لك حنين
وكلما جيت اكتب
ألقى طيفك في شعوري
واحن لك.. أصرخ أبيك
واحاول اهرب من خيالك
ابتدي بك م النهايه
وارجع انزف ذكرياتك وابتديك

كل شي حولي يسألني عليك
مرايتي
وجهي الي منكسر
ساعتي
كل دقيقه تمر فيها تنتحر
الزوايا والأماكن والسكون
ودمعي الي ما يفارق هالعيون
تصدق ؟
كل ما جيت أنسى
حتى صمتي.. يرجع يذكرني فيك

وآه يا الوطن
الوطن أصبح غريب
والفرح ومضه وتغيب
وآنا وحدي.. داخلي
اقترب من شواطيك البعيده .. وتبتعد
مدري آنا ابتدي بك
مدري آنا انتهيك

ليمتى ببقى أعاني
لا مدينه
ولا شواطي
ولا مواني
مرات ألقاني بروحك غايبه
ومرات اسافر في مسافات الغياب
احاول انسى.. واذكرك
وابتدي بك م النهايه
وارجع انزف كل جراحي وابتديك

وينك
ليمتى ببقى أدورني عليك
ليمتى ببقى أدورني عليك...