ياالله لا اطيح في قوم ٍ تمناني= اطيح وسيوفها مسلوله لطعني
وجيه تضحك بوجهي ضحكة اخواني=وكفوفها للبلا بالدس تدفعني
كنها من الضيق والصكات تدراني=ولو يستوي غاربي للقطع تقطعني
اطعونها بالخفا ماهي بتخفاني=وماغرني لو بوجهي انها تلمعني
وانا اعرف قدر نفسي واعرف شاني =وادري بـ ( خل الفهاني ) صعب ينفعني
واللي قصر عن كلامه وان تقفاني= هرجه يسبعه وافعالي تسبعني
ابرك له يصون نفسه ويتحاشاني= ( كم كلمة ٍ قالت لمن قالها دعني )
والشعر لو هو رصيدي بين خلاني=وما يصدقه فعل للعليا يطلعني
نذر ٍ علي نذر لقطع بيدي لساني=لني ما ابا غير فعلي شي يرفعني
ولا الشعر من كلام وحكي مجاني=شي ٍ سجعته وشي ٍ كنه يسجعني
الشعر ما هو حصيل لفعل ذرعاني = لكنه الهام فوق الطرس يطبعني
الله عطاني .. له الحمد انه اعطاني=من سلسبيل القصايد ما يمتعني
ويمتع الذائقه للي بيقراني=اللي للاحساس يدري الشعر وش يعني ..!
شعر ٍ حشمته يلينه رز نيشاني=في المرقب اللي به الشعار تتبعني
ولا حسودي سلاتي عنه سلواني= باللي بكف النوى والبين يصفعني
الصاحب اللي تحريته ولا جاني=ولقياه عندي تشبعني / وجوعني
ما يدري ان شوفته في ناظر اعياني= عن سكرة الموت والحرمان تردعني
وان غيبته هي شقاي وقمة احزاني = وان حوت همي لما انه غاب يبلعني
اللي لعيـنه اجر الصوت وحداني= باعذب قصيدي لعله بس يسمعني
يسمع قصيد ٍ رسم من نبض وجداني= لوحة شقا الروح في بعد ٍ مجرعني
كاس السهر وانسكابة دمعة اجفاني=في جوف ليل الغياب اللي يروعني
ولا خيالي رسم لي عالم ٍ ثاني=فيه التقي بالحبيب اللي مطمعني
ياتي بليله وبيده يقطف اشجاني=واقطف ثمر صبر في فرقاه موجعني
ليله بها البعد والحرمان ينهان ِ=والكون من فرحتي ما عاد ياسعني
بدر السما يفرك ايده ويتحراني=ما الوم كل الكواكب لو تطالعني
لا اقبل وفل الجدايل فوق الامتاني=قالت كفوفي بليله جازف وضعني
وان قلت خايف ضياعك قالت اماني=للموت لاجل انسكاب الليل ذا بعني
ابغى انثره في مهب الريح بالعاني = حتى على كل خصلاته توزعني
واهيم في منحر ٍ لو يمن العاني=ما جيت عاني ورحت آقول ما اقلعني
واعانق العين واحذر رمشها الجاني = اللي يترقب متى اغفل عنه يجبعني
كسووول .. لكن في الطعنات متفاني=وسلهامته لعنباها كم تلوعني
لو بين ثوبه وصدره يدفن الفاني=ما اصد وابعد قبل لا الرمش يصرعني
وازور مبسم كما خاتم سليماني = شفته كن توتها بالموت يشفعني
وانا لي الله حلمي مره اغراني=شربت كاسه وذاك الكاس ضيعني
في صوته السحر.. ( ميت فيه واحياني ) = لا ابعدت ناوي الفراق بحرف رجعني
من زين نطقه لو اعطي بس شيطاني= فرصه / من الفسق والعصيان رصعني
ان مال .. سلِّم على غضات الاغصاني= من لين قده بعذري يوم طوعني
و ان سار في غنج رد الشيخ علماني = يمسح بدقنه ورمقاته تشجعني
ابيع عمري لعين اللي يتهجاني=في كل بيت اكتبه ويقول دلعني
انا اعشقك واحترق لك شوق واعاني= واقول وانا احبك .. بس هه يعني ...!!
ويضمني وانثر اجمل طيف باحضاني=وليا انتثر .. قال تكفى سالم اجمعني
رحت اجمعه واطلب الرحمن ياقاني=نار المفارق ولا انه فيه يفجعني
اللي كما الدم يجرى وسط شرياني=اخر بشر آتمنى انه يودعني
اشهدك يارب لو راح وتنساني=انه معي لين ذكرانا تشيعني