هاذي محاورة بين بوش وحاكم الصين جيانق زيمين
 

محاورة بين بوش وحاكم الصين جيانق زيمين

جورج بوش

سلام رديه على حاكم الصين .... بالخير ياراعي النظام الشيوعي

ياجيانق بن زيمن نبى معك قافين .... والبرق عانه في المخايل يزوعي

جاينق زيمن

يامرحبا ياقايد الغرب واهلين .... ترحيبتن ترضي غفير الجموعي

البرق عانه يبرق يسار ويمين .... يوم الرعد حدر السحايب يروعي

جورج بوش

ماجيتنا ليلة لفونا المهنين .... يومن واشنطن تشب الشموعي

ليلة حكمت الكون في عام الالفين .... جوني هل الطالات غصبن وطوعي

جيانق زيمن

ارسلت لك يابن النشامى خطابين .... جت لك مناديبي تبارك فزوعي

وانا حكمت الشرق من عام سبعين .... ما اعلنت للحكام قبلك خضوعي

جورج بوش

انته تحسب الكون باقي بقطبين .... الراسماليه وطت كل شوعي

يانايم اصحى مرت اعوام وسنين ....ماعاد فيها يابن زيمن رجوعي

جيانق زيمن

يابوش حنا بالسياسه ملمين .... ومن دون هيبتنا بنينا الدروعي

ليتك تحل المشكله في فلسطين .... عز الله ان ابوك ماهو طقوعي

جورج بوش

ياجيانق انا طوفت وحده وثنتين .... والثالثه بتكون بين الضلوعي

الطايره وش علمها فالها شين .... اللي لها بحماك حول السبوعي

جيانق زيمن

الطايره ماردها غير بكين .... جانا يقالبها خبيث الطبوعي

وين احترام الانظمه والقوانين .... مثلك عن سلوم الدول مايتوعي

جورج بوش

ماهيب يمك رايحه للفلبين .... فوق المحيط الها نزول وطلوعي

مار اعترضتوا دربها يالشياطين .... عز الله اني من سواتك جزوعي

جيانق زيمن

يابوش يابن بوش تلعب على مين .... ماهوب انا اللي بالكلام مخدوعي

يابوش وطتها في الارض الشياهين .... كانت تجسس وهزعتها هزوعي

جورج بوش

هات الادله كان عندك براهين .... يومك تقول ارخت علاك السموعي

مخطين ياهل الصين منتم بمقدين .... وشيهانكم عود غرابن خروعي

جيانق زيمن

ركابها يابوش خمسه وعشرين .... عسكر من الجيش النظامي نزوعي

حاصرتهم يابوش بالجيم والسين .... حتى خذيت العلم منهم قطوعي

جورج بوش وهو يضحك ..

عينت طيارك غدا راسه طحين .... وامه على قبره تهل الدموعي

الطايره ترجع لنا بعد يومين .... اخذ الكلام ولاتطول تعوعي

جيانق زيمن

خل العلوم قصار واسمع لنا زين .... عسكرك جولك يالسنافي رجوعي

والطايره لاعاد تنشد لها وين .... راحت ديه في واحدن من ربوعي

:cool: <IMG SRC="cwm11.gif" border="0"> <IMG SRC="cwm11.gif" border="0"> :cool:

[ نوفمبر 05, 2001: تم تعديل الموضوع بواسطة : مطرح القعدان ]

اخوي مطرح القعدان

مشكووووووور طال عمرك على هالاختيارات الرائعه

والصراحه انك ماقصرت

واعتقد ان هالمحاوره اذا مانيب غلطان انها لواحد من زملائنا في شعبيات وفي ساحة الاقلاع

واذا تاكدت انا من الشي هذا سوف اعقب على الموضوع

الاخ مطرح القعدان 00 لك تحياتي :) :) :)

اخوي عكاشه الظاهر انت ملخبط انا اعرف الي

انت تقصده في فرق بين محاورة بوش وبن لادن الي

كتبها العتيبي في شعبيات والثانيه الي هي بوش

وحاكم الصين الي انا كتبتها
رح تأكد ياخوي
ولك تحياتي
:cool: <IMG SRC="cwm11.gif" border="0"> <IMG SRC="cwm11.gif" border="0"> :cool:

هذي القصيده لشاعر الاقلاع المبدع المعروف لدينا شخصيا وسبق لها وان نشرت باحد المجلات المحليه وحقوق الشاعر محفوظه واستغرب من الاخ مطرح القعدان هذا الادعاء ونسبتها لنفسه الا اذا كان يقول ذلك من باب الدعابه لان القصيده هذي اشتهرت بالاقلاع بشكل كبير

يا اخوي ضاري با العطا ياخوك انا لاقي المحاوره في موقع من المواقع وانت تقول في الاقلاع انا ماشفتها في الاقلاع

:cool: <IMG SRC="cwm11.gif" border="0"> <IMG SRC="cwm11.gif" border="0"> :cool:

[ نوفمبر 05, 2001: تم تعديل الموضوع بواسطة : مطرح القعدان ]

الي كتب القصيده شاعر الاقلاع المبدع ونشرت بالاقلاع وبفواصل وارجو منك ثاني مره اذا نشرت قصيده ماهي لك انك تقول اسم قائلها او تقول انك ماتدري من الي كتبها للحفاظ على حقوق الشعار الادبيه

على فكره فيه تناقض بكلامك اول كنت تقول :

اخوي عكاشه الظاهر انت ملخبط انا اعرف الي
انت تقصده في فرق بين محاورة بوش وبن لادن الي

كتبها العتيبي في شعبيات والثانيه الي هي بوش

وحاكم الصين الي انا كتبتها
رح تأكد ياخوي

والحين تقول :
يا اخوي ضاري با العطاى ياخوك انا لاقي المحاوره في موقع من المواقع وانت تقول في الاقلاع انا ماشفتها في الاقلاع


بردك الاول على عكاشه كنت تقول انك انت الي كاتبها والحين تقول انك لقيتها بموقع من مواقع النت ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ عموما رح دور بالاقلاع زين وتلقاها !!!!!!!!

عموما ارجو ان الموضوع هذا مايتكرر مره ثانيه وحنا مسؤولين عن الحفاظ عن حقوق شعارنا الادبيه ولن نجعل احد يتعدا عليها كائن من كان ولن نجامل بذلك ابدا

ضاري بالعطا - مراقب عام شعبيات