الطريق اللي مشاني رغم رفضي رغم خوفي=يبتدي مثل النهاية لاانتهى حلم بصياحي
اه...يا عتمة نهاره كنّها ظلمى الكهوفي=ظلمى كهفٍ ماتزاور فجوته شمس الصباحي
هاجسه ينبت سنابل..روسها تمسح كفوفي=تلمس الرعشة بطرفٍ فيه بات البرد صاحي
حفته من كل جانب..لين وصلت للكتوفي=مثلما حفت شكوكه فكر من كل النواحي
الحذر ماكنه الا قيد والهمة سيوفي=قيد الخطوة ولكن حدتي تطلق سراحي
والرجا يمشي الخطاوي كلما ارتب صفوفي=واتلفت مابه الا وحشة بصوت الرياحي
فجاةٍ طارت عصافير الخطر لحظة وقوفي=وانكسر غصن الامان وضاع بالظلمى سلاحي
ضمت عروقي فتات الغصن وابتلت كفوفي=وافتح الكف والاقي طير مكسور الجناحي
اقتربت وبان قصرٍ تاج محل ياخذ وصوفي=منه لكن فيه بابٍ مستحيل الانفتاحي
وحال سور الصين دونه مثلما حالت ظروفي=دون شوف الفاتن اللي ضمته تبري جراحي
وسط حصنه شع ضيٍ للقمر وقت الكسوفي=جزء غطته الغيوم..وجزء للاعيان لاحي
يجهر الاعمى ونظيري لو يشوفه مايشوفي=وانفتح بابٍ روماني نبرته تشبه صياحي
دام عيبي قو باسي وكان ذنبي (اني اوفي)=كيف ما اقدم باتجاهه؟ والعمر لا راح راحي
ماتوانى دون حلمي لو وقف دونه الوفي=(ابلغه ولا اتوفى) والله ان هذا وشاحي
لجل عينه صرت حاتم واعذب اشعارٍ ضيوفي=يكفي لامن قلت بيتٍ ذاب قطب وقطب ساحي
من قراني مانساني! بالضلوع انحت حروفي=هزت عروش المجرة لين عرش الشعر طاحي
الوكاد اني دخلت ومانظر للخلف شوفي=وشفت حورٍ تبتسم لي وابتسامتها ارتياحي
فوق ارجوحة قديمة شفتها اجمل هنوفي=واقبلت والرمش صوّب خافقي كنه رماحي
و قبل ايادينا تلامس اختفت مثل الطيوفي=وطلت بروق النهاية بالسما والرعد صاحي
وانتهى حلمي ب لا لا وعضة ابهام وحسوفي=وقمت من نومي وكفي قابض وسادة نياحي!

-

*

/
خالد الدوسري
رائع مل كتبت .جميل ما نسجت

كلمات عذبه .. جزله

صح قلبك

-

*

/


مع التحيه
دم الغدددددددددر

شاعرنا الحالم العذب / خالد الدوسري

إسلوب قصصي صب في قالبٍ من شعر .. وحلمٌ غريب بغرابة روحك وإحساسك

و قبل ايادينا تلامس اختفـت مثـل الطيوفـي
...................وطلت بروق النهاية بالسما والرعـد صاحـي
وانتهى حلمي ب لا لا وعضة ابهام وحسوفي
...................وقمت من نومي وكفي قابض وسادة نياحـي!


حتى في الحلم ما حصل !!
عزتي لك :)


هروب من الواقع وعودةٌ له بطريقة جميلة
دمت بخير