ياسلام الله سلاِمِِ مثل هل السحاب = والعلوم الطيبه باديِ مشوارها
هيه يامحسن ليا جاك قولي لاتغاب = مد يمناك الطويله وكف يسارها

تسبق البرقه تراحيب للظميا شراب=للمشاكيل الدواهي أهَلْها وْ دارها
الزم الفنجال ودْرِج عِلومك والجواب=ماتعدّى شايبٍ داهلٍ فاعبارها

شفتلك جره وعوت فتشت الزهاب = أثرك اللي سابقه مايشاف غبارها
لا يورالك بنفسك وتاكلك الذياب = مس بدلتك الجديده وزر زرارها

خوصها مخضر ومرصوصةٍ فيها الجعاب=باسقة قدّ و طواريفها..أسرارها
ضاق من في ظلّها قيّل و لحقه عذاب=سوسها حيٍّ تساعى بجوف اصغارها

لد عينك يمي الله يعطيك الذهاب = نخلةِ من سوسها يابسِ جمّارها
مس رجلك لا تقيل لبا شفت الخراب = الديار وساع دور على تجارها

من يودّ العـَدّ لزْمِ يتوثـّل فالحساب=زلـّته عظمى ومثله يشبشب نارها
يدفي الملفوح عود السمر خلّ الغـِلاب=انصد اللبق المشهّر لكثْر اشوارها

بارك الله فيك غادي وتطردلك سراب = لاتجي للملعبه ونت تجهل كارها
أرفعك يم السماء ونت تنزل لتراب = طحت في دوارتً ماظهردوّارها

من ترف هلّك رحلنا لوديان الشعاب=نرقب المبطي علينا بِبِيْض اخبارها
انهدم بيتك وجارك توزّى فالهضاب=ناحت الهامة على بْلادكم وشنارها