شعبيات - مهمتي اطير النوم عن الديوانيه

السلام عليكم

يالله انك تحييني وتخليني لاميمتي وتحيطن باسمه العظيم الا عظم

اول شي هذا اول موضوع لي وقبل ما اكتبه فكرت وين اكتب قلت مالي الا العجز والشيبان هم اللي يبي يقدرون السالفه

المهم ما ودي اطول بالحتسي وابزخ بالسالفه على طول

بينما كنا مجتمعين حنا يالبني وقاعدات هالبنات اللي مايستحن يسولفن بالعرس يعني كل وحدتن منهن تقول ابي رجلي مواصفاته تسذا وابيه يكون تسذا ( والله من زين الشرح ) يعني اللي تقول ابيه وسيم واللي تقول ابيه طويل ( ياشين القصر :mad المهم واللي تقول متعلم ومعه شهادتن تسبيره تبي تكشخ به عند اهله واللي راضعتن مع مصريه تقول اهم شي معه دراهم ومريش واللي عاقله وتقول اهم شي اخلاقه وانا ابد ما سولفت معهم وما مديت لساني ولا دخلت بالسالفه ابد وبينما نحن كذلك كل واحدتن لسانه يلوط اذانه وقرق واذا بالمفاجأه امي حصيصه فوق روسنا وتشير برويسها يمنة ويسره وتصفق بيدينها وتقول ( ايييييييييييييه الله يخلف راح الحيا وينكن عنا منول الوحده ماتطري اسم الرجل ولا العرس من الحيا اللي بنا واذا خطبت الوحده ما تنشد ولا على اسم رجله ولا تدري منهو الا يوم العرس ) وانتن هالحين تجاهرن بالمعصيه ( المعصيه عند امي حصيصه الحتسي بالعرس للبنت ) المهم قالت وحدتن من هالبني اللي قاعدات يمه اصلا مايمديكم تحتسون بالعرس منول البنت من يكون عمره عشر سنين وهي بيت رجله )

عاد امي حصيصه اشارت بعصاها وفدغت هالبنت الفاهر وقالت له ياملا الدقم

امي حصيصه تخش جو معنا

المهم انا سويت نفسي استحي ولا حتسيت معهن وقلت يمه اقعدي معنا وسولفي بعدها حسيت امي جازت له السالفه و وقالت ههههههه ياحليلكن وحتسيكن ( تو ما جاز له الوضع وهالحين صار زين )

عاد ما بغت شي العجيز خقت كل اللي عنده وقامت تقول اييييييييييييييه زكروتني باللزي مضى

وبدت تسولف عن سالفة خوات ثنتين مااعرسن و..........

الى القصه

كان فيه بنتين خوات كلهن ملح من بنات الاولين قامن وراحن مره على البير بيبون يجيبون المويه(ياي ياي )

وقامن ورون القربه بالماء وجت وحدتن منهن وقالت خلينا نقعد ياخيتي هنيا نسولف قبل ما نستأنف الكرف قامت اخيته وقالت مالتس لوا وقعدن حول البير وخذ ياسواليف وطق حنك وسلهمت الصغيره سويره وانشدت هالابيات

نفسي تمنيني رجال الشجاعه
ودي بهم مير المناعير صلفين
ودي بمندس يبن الجماعه

يرعى البهــم هن والبعـــــاين

لاقلت سو الغدا قال طاعه

دن الهوادي والقدح والمواعين

وابضربه مشتدة(ن) بذراعي

مااحد(ن) محاسبني ولا الناس دارين

قامت اخته لولوه الكبيره والعاقله وردت عليها بقولها :

الهيس وان جا في مطوعتس ساعه

يجمع على تسبدتس من المر نوعين
دايم خسيس بوجيه الجماعه

ويجيتس نسل منه ما يسعد العين

شرح ابيات الخبله سوير :

تقول في البيت الاول انها تمنى رجل (ن) سنع وسنافي بس ان هالنمونه صلفين يعني جفسين وما من رومنسيه
وقالت ياليتي بواحد خكري فيما معناه راعي ابل وغنم يرعى بهن وابتشرط عليه وذلك يتضح من البيت الثالث حيث انها تتامره بتصليح الغدا والعشا وتبي تكرف امن جابته واذا شب تسبده وابلشه تبي تضربه وتهبده باي شي ولا احد معاتبها لضربها او ليه مسحت به الارض لانه واحد مال امه داعي بالقبيله

اما ذيك العويقله لولوه الله يرزقكم بوحدتن مثله ومثل ذهانته قامت وبينت لاختها مساوئ هالخكري والدلخ اللي تتمناه اختها المرجوجه سوير وقالت : الهيس وهو وصف من اجمل الوصوف التي يستحقها هذا الخكري ان جا ياخيتي بمطوعتس وبأمرتس وصار على هواتس

ساعه او مجرد ايام لكن فكري بعدين وش بيصير ؟
يبي يجمع على تسبدتس من المر نوعين وفصلت هذا المر اللي يبي يصير بتسبده وهو انه يبي يكون خسيس وذليل ويعايرونه بالخكري والدلخ والهيس وانواع التهزئ وبعد كم سنه يبي يجون ذرتس ( عيالتس) مثل ابيهم ماهناش ومامن مرجله ولا سنع

انتهت القصه

بعدها سألت : يمه اثر حتى بنات الاولين يحتسن بالعرس

ما يستفاد :
1_ لامانع من تشرط البنت بمواصفات رجله بس تكون بحدود المعقول
2_ كثرة الخكاريا والدلوخ في المجتمع تحتم على انكن تصبرن لما تلقن واحدن سنع
3_ عيب يابنات لا تحتسن بالعرس

تراني لاطشه من الاقلاع من السعلوووووه لاتقولون ما علمنا