شعبيات - الف حارس وسور

آهـ يامـــن تقول إنـــي بطبعي عنيد
والله أنــــت العناد وكــــل مابــك غرور

أنت من حدني وأشعل فتيل القصيد
وأنت من حطّني بين الشقا والسرور

أنت من عاش في ظلما الليالي وحيد
ومن تعوّد على الظلما يخاف الظهور

أتعب القـلـب حــــبك يالغــــزال الفريد
أثر مانته على وصلي وعـشـقي غيور

لا تــــــــرد المواجع لا تـعــــيـــــد وتزيد
كـن بينـــي وبينك ألف حارس وسور

قلت أبرحل مــع أهل الزمل وأبعد بعيد
وأترك أهل الحضارة والترف والقصور

جيت لــــك يالشمال إستقبلن بالنشيد
مثل ما جيت لك بالمبــــخــــره والبخور

ودي أحضنك واشعل باقي الوقت عيد
واروي سنينك الضميّا بـكــل الحضور

فيك ريـح الخـــزامـــى والغـــلا لك أكيد
دام لي في صـــحــاريك الفضية جذور

عن دروب المراجل لا حــــشــــا مـا أحيد
اعذوي لا زهـمـــــتـــــه كل مـا بــه يثور

انتـــــثـــر طيب وبــــلادي ملاذ الشريد
ومن نخــانــا لقــانــا من حــرار الطيور

عدوان المنديل السرحاني
الجوف