شعبيات - فيزياء الكيمياء ..

الله يجازي الفار يا مأرب مع سيل العرم
والا انت يالهرش الفحل .. بنّوخك بنوّخك

راحت (ارم ذات العماد ) بلا عماد ولا إرم
لومك على التاريخ يالجغرافيا .. ماأرّخك

تبغى الصراحة ياقزم .. اي والله ان تبطي قزم
يضحك عليك بذمتي من عملقك واستنسخك

بعض العرب يشهد علي الله مثل كيس الفحم
ان طحت فوقه وسّخك.. ان طاح فوقك وسّخك

..

يافيزياء .. الكيمياء
فيها اختلافٍ بـ النٍّسب

يامؤرخين المومياء
يامصدقين اللي كذب

ياليل محتاج لضياء
تعبت ادوّر عن سبب

شقي ومن ضمن اشقياء
عودٍ ومن حزمة حطب

الوحي وحي الانبياء
الله عطى والله وهب

شبب ولا لقي اوفياء
يستاهلونك يالشبب

لالاتغابا الأذكياء
وتزيد معطوبة عطب

اتّق وكن من الأتقياء
شرّ الحليم اذا غضب

من مسح جوخ الأثرياء
لاحدّ ( حامض ياعنب )

عذرٍ يوفّي الأوفياء
وعذرٍ ترى مايحتسب

تبّاً لبعض الأخوياء
وتبّت يدين ابو لهب

تبغى الصحيح بلا رياء
وبلا ملامة او عتب :

بعض الأدب قلّة حيا
وبعض الحيا قلّة ادب