( اغـلـــِـق البـــال ) ..!؟

ثـق حبيبي

حتى لو : ابعدت عنـّي

تبقى ساكن في خفوقي

وتبقى اقرب .. لي .. منــي ..!؟


لاني منـّك

صرت اعرف انـّي انا

وصرت اعرف الفرق :

ما بين المحبّه

وبين تحقيق المـُنا



وكيف لا صار الخيار المر .. مر

غصب تعلكنا الظروف

وغصب يتفـلنا العمر ..!

ليه مستغرب ؟ عشاني جيت حافي !
........ انطبخ راسي .. قبل تطبخ رجولي ..!


اي ضربة شمس .. يا عمّي عوافي
....... زين قادر .. اصلب من الهم .. طولي


كافي ..! ظنّك يقلقك .. ترديد كافي
........ او اجي مقطوع .. حتى من حمولي


اصحى تطري ثنين .. وصلك والتجافي
....... انت تعرف .. حالتي .. من دون ذولي


الله اللي يدري .. شقـد .. إنتصافي
........ بين ضيقة خلقي .. ولحظة ذهولي


دام باقي بي عقل .. دوك اعترافي :
........ قبل لا اتعود .. على نسية نعولي


طعم حبّك .. هذا هو سر اختلافي
........ والأكيد انـّه بعد .. سبة نحولي ..!؟

لحظه .. وقـّف

لا تحرّك

مبطي ما جرّبت

شرّك !!


ماسكه هالليله اقلب طاولة حبّك عليك

ماسكه اخنق صراخك بيدي

واخنقك بيديك !

لين ما اطلّع عيونك

لين ما اجنّن جنونك

لين ما اخلّي السهر ما عاد له عيشه

بدونك ..!




لحظه وقّف .. لا تحرّك

خلني بالمرّه .. امرّك

بآخذك مشوار وادري انّه بعيد

ويتعّبك

بالبال .. ماهو بالخُطا

بتقليب اشكال العطا

بشوف وجهك أي الألوان يتخيّر

يمكنّه لون يصعّبك !


عاد انت الوانك كثيره

بتتكسف .. الله لا يضرّك !؟



بس لحظه .. وقف

لا تحرّك ..

شتقول

عدها علي

شتقول : تغليني

................... يا انّك امرك عجيب .. وحالتك حاله


في هالزمان انتبه .... لا تقول يمديني

................... ما تشوفني ناحل ٍ عودي من افعاله


شفني نصحتك .... مدامه بينك وبيني

.................. ما فيه عاقل ... يسابق بالخلا ظلاله


والله شعورك وصلني ..... وجد يحييني

................. ومثلك : يشرّف غلاه ... ورقة اقواله


صعب آتغير ...... وأنا مقطوعه يدّيني

................. صعب آتحرّك ...... وأنا متجمّد إبّاله


هذاك ....... والله احب بسبته عيني

................ لأنه تحبّه ..... وقلبي يحفظ وصاله


رغم انّه أعدم كثير أشياء .. تعنيني

................ إلا انّي ابقى : على ذكراه وأطلاله


تصدّق ..!؟ إنّي تعبت ومعرف شفيني

............... معاد اصدّق غلا المغلين .. وأسعاله


خذها نصيحة أخو ... والشاهد سنيني

.............. مدام توّك .. صغير ، وطيّب ، وداله :


خلّك حريص ....... وأنا ارجوك تعفيني

.............. بذا الوقت : كلً يعيش لنفسه احلاله .!!

عندما كُنت في مناسبه لأحد الزملاء
طيلة فترة المناسبه وانا لم يفارق عيني ذلك الشاب
كان صغير الى حد ٍ ما .. في عمر 19 او 20 سنه ..!

كان يتحدث في الجوال
تاره يمشي في الملعب المحيط بالإستراحه
وتاره يجلس في احدى زواياها الُمناره

لا اعلم لماذا شد انتباهي تحديداً وكأنني اريد التحدث معه
تيقّنت ان حالة عشق بدءت تتكوّر داخل جسده
كنت اراه وهو يتحدث ويرفع عينيه الى السماء :
واعتقد انها كانت تحدثه عن .. هل هو يحبها فعلاً .

وعندما اراه يخفض النظر الى الأرض وهو يمشي
فهو بدء يحلف لها بذلك ..!

واذا اعتقد انه ُ ابعد عن الأنظار قليلاً
و وضع يده الأخرى على فمه .. ادركت انهُ قبّلها بجنون ..!

كان ذلك وهو لم يتعمّد ان يراه احد
ولكن كانت كُلها دلائل لدي انهُ يُحبها كثيراً ليقيني التام بأن
العاشق هو من يتصرف ظناً ان من حوله لا يعلم
قد تكون تلقائيته التي رأيتها من وجهة نظره وهو حذر تماماً ؟

ولكن كان لقلبه ارجل يمشي بها ..!



في هذه الليله تحديداً لم اكن مع اي شخص آخر
حتى من كان يحدّثني .. اُخفض راسي كأني اسمعه واتبع الشاب
وصلت الى درجه اني لم اكن حتى مع نفسي ..!؟

حتى وصل بي الخيال :
اني اصعد فوق " احدى الطاولات التي وضعت عند بوابة الدخول"
واخطب بالناس .. عن العشق
اُحذّرهم من خادم الذات ..!؟

اقول لهم وانا اتجه بأصبعي نحو الشاب
هل ترونه .. ما تعتقدون يصنع به العشق ان صدق قلبه .!
يُمحى من الوجود وهو باقي .. ذلك قليل
تبدء عُقد التركيز تُصيبه حتى لا يكاد يُحسن بنفسه صنعاً .. ممكن

ولكن من المؤكد ان حاله سيكون مثل حال اهل القبور يوماً ما
لا يسمع إلا قرع نعال من دفنه ورحل ..!؟
ويكمل بقية حياته علّه يستطيع ان ينسى
ويُرجى مصيره ..!

بعد كل هذا التعب
ما في بالك غير ترحل
يعني لقيانا صعب
وما بقى معقوله حل

ليه نختار الهروب
ليه نبعد بالدروب
انت لو تصبر شوي
كل شي بيكون اجمل ..!


تصدّق
انه حيل ارحم لو نتوه
أو نعاني
شف عشانك كيف احلم
انت بس احلم
عشاني
دام دربك نفس دربي
ونبض قلبك .. نبض قلبي
فكّر بلحظة لقانا
ولا يهمّك شي ثاني ..

من متى :
نخاف السنين
واحنا ما خفنا الحقيقه
ما بقى للدمع عين
طاح من اول دقيقه

لا تغيّرك الجروح
كلّها وقت وتروح
بس لا تطري الغياب
والله مو ناقصني ضيقه


يا أول نبرات الحكي
يا آخر حدود الموالف
لابد يوم ونلتقي
بس انت قلّي ما يخالف

وانا اوعدك باللي تبيه
مالك بهالدنيا شبيه
ما اتخيل ايامي بدونك
وانت ماليها سوالف ..!

الكون ساق خطاه بالشوق يمّك

.................. ودّه يا عمري يشيلك .. ويقعد يدور


لك فرحة ٍ ما ياسعه صدر ضمّك

................... ولك طلة ٍ فاقت .. أحاسيس وشعور


واللي خلقك .. وفرّح آبوك وأمّك

.................. وجمّع بك أشباه الملا .. وهيبة الحور


انّك خلطتي بين دمّي ... ودمّك

.................. زود ٍ على ان عيوني بشوفك تخور !


الله خلق للتوت ..... معنى بفمّك

..................... وعين ٍ إلى من فتحت تخجل النور !


و.. وردٍ نبت في وجنتينك وشمّك

.................... ما صدّق إنّك جيتي ... وجاك بالدور


ما تعرفين إن القمر .. شال همّك

................... وفالحالتين : إنّه على الصبر ماجور


لأن كبرياءه .... مانعه لا يخمّك

............... ولأن غيرته لا دقق بوجهك ... تثور !


ولك صرخة ٍ تنثرك .. وبسمه تضمّك

............... اشبه بقصة غصن .. غازله عصفور ..!

يا زميل

لو كنّا ناخذ " كماسيون " لا كذبنا
كانت تجارتنا دليل
كانت ملامحنا حصيل

كان الزمن كلّه مُرتب
وكنت ابرد لك غليل

شاخت شوارعنا
ولكن ياخي ما شاخت عبث
ملت كثير من الحكي اللي تسمعه
واللي تشوفه
لا كثر فيها الخبث

مسكينه صدقني ترى
ما عاد به حمل .. وتشيل

يا زميل
احيان تاخذك الحقايق
للجنون
لا صارت ثيابك تخاط من العنا
ولا صارت جروحك تخيطها
الظنون

ومن تكون
ويعني بالله من تكون
إلا جسد مابه حواس
ومثلك ترى ماهم قليل
يا زميل

الوقت هذا ضاع من يد اهله
محدٍ بهم همّه يدوّربه عليه
وين راح
وين راح
او يطرحون الأسئله

محدٍ بهم خايف .. يبيه
محد ٍ بهم خاف الكلاب لا تاكله
وهم يسمعون صوت النباح

وإلا الأماني
يا كثرها ياخي الأماني
ويا مسهله
وبالآخر الكل بيشرّه
وتيبس على حبل الغسيل

يا زميل ..





‍‍‍

لا تحسس في يدك جرحي وتشقى

.......... وانت مثلك .. مثل هذا الوقت زايل



اذكر انك قايل ٍ لي الحب يبقى

.......... وادري انه باقي ٍ .. لو منت قايل !



بس فيني ضربة ٍ للحين زرقا

.......... لا لمسته .. قلت اويّه من دلايل



لنّي جيتك من بياض الغيم وانقى

........ وما حسبت حساب نفسي والمثايل



كنت اظن بترقى بأحساسي وابرقى:

......... معك بأحساسك لو ان الدرب مايل



يعني كثر اللي لقيته وش ابلقى

........ يا بعدهم .. وانت عامل بي عمايل



بس احبك كثر ما بالعشق غرقا

......... او كـثر ما عتـّم التاريخ حايل !؟



ما تخيّرتك عشان اختار فرقا

........ وما عرفتـك لجل ادوّر لك بدايل ..!

الألم

بس الألم قدّر وفاي
يوم جا يسألني عنّي ..!

صرت احبه :
لاني لا جيت اشتكي له
صعبه يخلف فيني ظنـّي
ودايم يوقـّف معاي !!

كنت اقول الوقت صعب يحدّني
اني اقفل يوم بابي
اني اذبحني بغيابي
اني احزن
لين احزن
لين احزن
لين احرق ما بقابي
والقى نفسي .. ضدّني ..!؟

وأثر كل اللي حسبته مو صحيح
وإلا اجل آصلك طيـّب
تردّني لنفسي .. جريح ..!

لا تجيني
وحزنك مكدّرك مرّه
تحسب ان أبوي ورّثني عصا موسى
واقدر اعتقك من حزنك
وحزنك اضرّه

مو صحيح
ان اللي يرسم ضحكته للناس دايم
من وراهم ما يطيح
مو صحيح
ان اللي يفتح نافذة بيته
يدور شمس
يمكن يدوّر ريح
يمكن يبيها تقلعه لآخر مكان
وينفض اوجاعه
يا علّه يستريح ..!

لا تجيني
وحزنك مكدّرك مرّه
تحسب ان السعد بيدي
بس اعيي
والفرج مخفيه في درجي
مع اطيابي وشيي
والدقايق بأصبعي اقعد افرّه

اقول لك حاجه ولا تزعل علي
يا انت متفائل بي مرّه

وانا نفسي مبتلش والله فيني !!

(:

وللمطر الحديث الأعمق
طالما كان يخلّد احاديث تُشعر القلب بالنبض وعدم التوقّف
وإن مُنيت الأيام بـ التوقّف .. يبقى منهمر بمحبّه !

ترفّق .. يا خلف طيي
............... كسرت اصابع ايديي

لجل ما اذخر بحاجه
............. كبيره .. ولو صغر شيي

توقّعتك .. قبل لا القاك
............. ولقيتك من حسن غيي

وانا اللي ماسعى للحب
............. زمن مرّ .. وانا اعيي

ولكن مدري شلون انت
.............. قدر قلبي ... لك يحيي

صحيح .. تحبّني واجد
............... ولكن .... مو ابد زيي

انا .. وصّلت في فتره
.............. اشوف الموت متهيي

ولو كلٍ خذاله درب
............... مصيرك يا بعد حيي

تشوف وجيه كل الناس
............ بتذكر وجهي من ضيي

لانك شمس ولو تسطع
............ يظل السر ... في فيي !

الله لا يعيد الليالي اللي فاتت
.................. مدري وش اللي حدني لشوفة البيت !!

مرت علي وجيه واجساد ماتت
.................. وابكاني ان الحي ابقى من الميت

ما كل عين ٍ لا دنى الليل باتت
.................. وما كل خطوه تنخطي بياهلا جيت

بعض القلوب لفرقا الأحباب حاتت
.................... ما ترجهنّ إلا على قرايه وزيت

يا بيت وهمومي مع الوقت آتت :
................... اُكله .. وانا بين الرجا والتواقيت

لو المدى يقتات مبطي إقتاتت
.................. عليك هقواتي إلى قلت لي ابطيت

صرت احزن لشوف الشجر لا تحاتت
..................... احسّه اقرب صوره لفقدت الميت !

في الصباح
وفي مثل هذا الوقت تحديداً

كان يغرّد ..
كان يجعل من الطريق المؤدي الى المطار
طريق يؤدي الى حاله من الضحك قد يلحق الشك مُطلِقها
والمسؤل عن إطلاقها و ايضاً الشاهد على ذلك " المارّه " ..!

حاله قد تجعل الطائرات تطفأ محركاتها وتستمع لما يقول
فهو يجيد زرع الإبتسامه .. وخلق نفسه بأشكال عدّه .
برغم فارق البعد عن الحد .

لكن هو عجيب فعلاً
كنت لا استغرب ان اقوم ذات صباح وأجد خريطة الرياض
ومساكنها و ساكنيها .. متغيّره
فما يملكه من إحساس رقيق وصوت ضحك مرتفع
وبعث احاديث جديده " استغباء " بعضها ممتع جداً
و " حلاوة " البعض الآخر مملّه جداً
وتصوير ما يجول بالخاطر بشكل يرفع الضغط تاره
وتاره اخرى يخلق للقلب جناحين للتحليق عالياً
.. فهو حقاً .. مجموعة إنسان
ويستطيع فعل ذلك ان اراد ..!؟

يمتلك كمية هائله من " الغرابه " و " طيب النفس "
و " الحبابه " لن يأتي الزمن بمثله ابداً !


حاولت اليوم وانا اسلك نفس الطريق الذي ذكرت
ان التفت يميناً ويساراً .. هل اسمع شيء ..؟

فتحت نافذة السياره
وسمعت صوت .. اشعة الشمس ..!؟

فعرفت عندها انه ذهب بنزهه الى السماء .!

فكرة كتابه ليس بالضروره ان تكون مقنعه
لكن يبقى من الفاظها النطق العفوي وليس المعنى الأصلي !

ماهو خطاك إلا خطا الوقت الأغبر
............... وانت اعرفك من خلقتك راعي اعذار

هالحين انا اللي سيء اللللله واكبر
................. ما تدري ان الكذبه حبالها قصار

ما كني اللي كنت اداريك واصبر
................ اثرك صغير وفعلتي فعلة كبار

قل ما تبي وانت بحقايقك اخبر
............... وباكر ذنوبي تشعل بصدرك النار

ما ينكسر صعبه مع الوقت يجبر
............... وخذها نصيحه ما تعلّق بمسمار :

من يحسد الطيّب على طيبه ادبر
............... ومن يحلف بربه وهو كاذب حمار ‍!

صدق شفتك


صدق بانت لي ملامحك .. وعرفتك ‍

وانا لي مدّه تصوّر

اجلس بروحي وانا مهدود ظنّي

كيف اذا قابلتك .. واقفيت عنّي

ابقى واقف في مكاني

واذكر انّي ما وصفتك ..‍




صدق شفتك

صدق لمّيت الورود اللي بخدّك

وانثنى لون الهدب

واشقاه ودّك

والوله يمّك خذاني

وادري انّي ماني قدّك ‍..‍


ما خذيت من السنين إلا الثواني

وما خذيت من الحنين إلا الأماني

وانت لو طالعت حدّك :

شفتني اطرف لك عيون السوالف

لا نوت عينك تنام

واعرف ان الليل طيّب .. ما يخالف

والسهر مملي كلام

مملي وجاء يشتكي

من كثر ما كان ناطر

ودّه ان الناس تسكت .. او تموت

لا بغيت انت تحْكي ..



بس طلبتك ؟

تكفى خــلّك لا تروح

........ ما شبعت للحين منّـك

خايف ان رحت الجروح

......... ترجع وتسألني عنّك


وانا ما صدّقت شفتك

هذا انا
للحين عايش
ما تغيّر
شي فيني

من فضل ربي
آتنفس
وآكل
وأشرب
وأنام


واصحى
بعد الساعه سبعه
اقطف الرزق
بيديني

وارمي
كل لحظه
تمرّ
من الزمن
وافشي السلام ..!!

كرمالك
كنت
ابخبي !؟




.......... ما ابي تزعل علي !

وين اريّح بالي وين
وانت لك مليون عين
وما تشوف .!!

إن قلبي لو سلى عنّك :
لقاك ..!

وإن عمري
لو تبي
منّه :
فداك

وش وراك ؟
لاقي ٍ واحد يحبّك
لو
تغيب
شوي
عنّه
فزّت ضلوعه و جاك ..!!


انت نفسك

لو تبي ترجع لنفسك

راح تلقاني .. مكاني

واللي يعشق حتى لو قالو : يعاني

يكفي انّه ما تعب من أي شي

والهوى لو تختلي فيه الأماني

انجبو إحساس حي ..!؟


ظنّك انسى

لو نفظني البرد

قولك : قبل لا تغفى .. تدف


أو ابنسى

حيّك المليان ورد

وكل مكانٍ حظـّنا منه .. الصدف




وضحكت جنون السوالف

ورفعت حجاج الزعل

كم حلفت .. وإنت حالف

من على الثاني سأل ..!


والسفر :

وحكاية الشوق بيدينا


والبحر :

والطاوله اللي تحترينا


والشوارع :

كيف اذا مرّيت هادي

ودّك امرّه عَجل ..!!



يا قريب

وانا احسّك تاخذ النبض وتروح

وإن تمغـّط صبحنا ترجع تجيبه ..!


يا بعيد

وليلنا اللي كل مواعيده وضوح

صار يصافحني ونظراته غريبه


وانا اعرفه زين لامنّه تضايق

يبقى ساكت / ما يتكلم

لو سمع نبض يتألم

يمكن عشانه ما تعوّدني لحالي

لنّه يفرح لا جمع غالي بغالي

كيف وهو شايفني

وحمولي كثيره

والوله لاعب بحالي ..!؟














من يقول ان الرحيل اجساد بس

لو فتح صدري لقى كلّه جروح

ولا قدر يحصي عدد

من غلاة اللي فقد

ورب موسى ما احسّه بس روح

لولا خوف الله

قلت بـ ايش احس ..!!

ما تغيّر

ما تغيّر

واللي مثلي ينقتل مليون مرّه

ولكن انّه ما يتغيّر !

تصدّق اني البارحه فكرت أهج

لأبعد ابعد من غيابي

لأضيع أضيع من سرابي

صرت اشوف ان المدى لو يصفي يوم

باقي الأسبوع عج


خاطري ارتاح من كذب الرفاقه

ولعبة القرب و نفاقه

والتضحيات اللي بلا موعد تجيني

وانا ما اعرف اتخيّر !

وما اتغيّر


مشكله لا كان عقلك مو معاك

تحس كل خطوه مرايه

تعكسك للي وراك

تفضحك لكن بصدق

وتلعب بحسبة مساك

وآخرتها اما تعيش بحسرتك

أو قلبك يموت وتدج !

تصدق اني صرت امل من ادنى حاجه

صرت امل من الأغاني

من السفر

من حبي للفجر

من الأماني

من وجهي لا بان انحراجه

ودّي اتجرّد من افكاري الكثيره

واتبع اسلوب .. المراجه (:

جايز تشنّص معاي

وبعده اقدر اتغيّر ..!!

صباح الدمدمه .... والبال !

وبوسه تثاوبت ..... وهبال

وصوت من السهر طايح

وعيون معلّقه بحبال ...!!


واسم صرت انطقه .... عادي

تظن .. لمن به انادي ..!

بصوت ٍ يشبه طيوفك

حزين ... وطيّب .......... وهادي !!



صباح الذاكره الزينه

وحبيبي البارحه وينه

وفكر عاشق ..

وطرب هايم

وسفرك

وتعبك الدايم

وكرمالك بروتانا ..!

وفرحنا بـ : بعضنا .. اشقانا


وبحر جدّه

وسوالف ليل منهدّه

ومدير الكنز و الزحمه

وغلانا من يجي قدّه ..!


صباح الجيّه والروحه

وطريق يطول : وش نوحه

حبيبي الخـُبر .. من وين

تنبّه ..!؟

لو تجي لوحه ..!


تراني ما ادل وينه

انا الشي الوحيد اللي ادلّه زين

خفوق حبيّبي وعينه ..!؟


صباح اغرب مقاهي الكون

وشفاوتنا .. ووضع مجنون

وتعارف ناس

وتلخبط كم راس براس

وتحليل المواقف ... كيف

نحللها على المضمون ..!؟

ورسايل حسّها ... معـــ زوف

وعجوز وروجها المكروف

وحكي ماله سنع .. وإنصات

وشاشه .. والزمن وقفات

كأنا ما اجتمعنا إلا

عشان نودّعه بسكات ..!؟



صباح اول مطر جانا

ومسى حامد ........ وممشانا

وشارعنا المـُعظـّم .. فيك

وحنين ارهق ... هدايانا !!





يا غافي !

.. و ... ( الحنين ) اللي رسمك

بداخل اوصافي ..!


سألني .....!؟

حتى لو تضحك

وتتهرب عن اطرافي

اببقى عارفٍ ......... وش فيك !

لأنك ما تبي حزنك يبان

وتنكسر .. بيديك

تبي تعشق كذا بسكوووووت

وتخلّي الخافي .... بـ الخافي ..!

اجمل اللحظات و اسعدها بأرخص ثمن !
كان ذلك جزئية من تخليد صورة الحب البسيط جداً وغير المتكلف والخالي من مرغمات العصر
عندما كانا على مقربة ٍ من رصيف ذلك الشارع الجميل والمكتظ بالعشّاق والذي توشحت جدرانه
بالرسومات لألتقاط الصور بجانبها !
وقفا لدقائق وهما ينظران وقبل ان يفاجئهما المصوّر بطلب التقاط صوره طلباً للرزق
سبقه بزمن ذلك العاشق وطلب منه وهو يرتدي اقل ما يجعله انيق بذات الرسومات التي تحيط به
والحقيقه التي سوف يضع يده من خلفها ..!
عند الإنتهاء من التقاط الصوره في ثوانٍ ولحظة توثيقها في الهواء
طلب المصوّر منهما خمسة دراهم معدودة
فتم شراءه لمكانه ولكل ما احاط به تلك اللحظه من صدق و حب وحياة متحرّكه
استطاع المصوّر تثبيتها بثمن ٍ بخس ..

الكثيرون يجهلون المعنى الحقيقي لشراء السعاده وفلسفة الثراء العاطفي !

سرير لهفه .. وشمعتين .. وحُقن تفكير ومواجع
......... وشبّاك .. علـّق دمعة الخشيه.. يبيها ما تطيح


لوّنت وجه البخت ..مابي ينكشف ويصير فاجع
........اثر البشر ..مثل الورق ..مرهونه احلامه بريح


ادري بأن الوقت راح .. لو كذبت وقلت راجع
........ الله يسامح .. كل غزّه بـ الجسد .. قامت تصيح


صحيح انك منكسر ياقلبي ..بس حاول تشاجع
......... كم من عذول ٍ باع عمره .. لجل يلقاني جريح


دام الهموم ابلغت .. افرق ما بينه بالمضاجع
......... مابك مكان ٍ ما لمْسه الضيق .. وازراه المطيح ..!

قال ايش


قال لا هزّك حنينك

علّم همومك : تعيش !


ما درى بأن الغلا لا طاح ....... طااااح

حتى لو يقعد يغنّي :

المسافر راح ..... راح



يا زمن لا تقول ليش :

ما علّمك تشبع جراح

إلا طيبي ..... وحسن ظنّي


ولاّ اجل يا كثر ناس ٍ

قدّرتها وكانو كديش !!

عضّيت خدّك .. ماني قاصد اجرحه !
.............. شفته مورّد ... قلت يا متباهيه :

ما ناقص إلا .. ينخلق لك اجنحه
............. عشان احلف .. انك فراشه زاهيه !

يكتبني فيك احساس نومك وأمسحه
............. وأكتبك فيني .. إني مهبول وداهيه ؟

لن اللي في قلبي .. عيوني تفضحه
............. واللي يحب ... دايم عيونه ساهيه !

في هالزمن زلات .... لكن يدمحه :
............... إني رغم .. كل الوجيه .. الواهيه

قادر أتلّ القلب .. واشقى , وانصحه
............. بس ما تكون هموم صدري راهيه

فجأه اعترض لي خدّك ومن يلمحه
............. بيموت لو ما عضّه .. وإنتي لاهيه !!

قلت لك :

لا قلت لك وقّف

تحدّاني .. وأمش !؟


وقلت لك

لا قلت لك : لا تلتفت لي

التفت .. من دون رمش ..!؟


مشتهي اشوف الفضاء بأحساس عكس

امّا انّا نشقلبه

او على بعض نتشقلب !؟


خلنا نبدأ نجرّب

كيف نتعاند .......... ونتحرّك جميع !

خلنا ندوّر بعضنا

وإن لقينانا ......... نضيع ؟


اهدني فصل الشتاء

من دون برد

وانا بتنافض من الحر .. وأزكّم !؟


اهتف لفصل الربيع

الموت ورد

وانا بجمع لك خضار الأرض كلّه

ونترك الغيمه .. تحكّم !؟



ش احنا خسرانين يعني

لو عصرنا فكرنا الشاطح عصر

لا انت اول من يأشر بأصبعه

ويبغز مداه !

ولاني اول من يصرّ

يخلق من الضحكه شفاه !؟

كسر الخواطر فلا يحتاج تجبيره
.............. إن ما تشافى مع الايام ما يشفى

وشله تطوّل بحكيك دامها قصيره
.............. مانيب مثل اول ادمح زلتك وارفى

لجل آتعايش معك عيشتني بحيره
............. ولو ما احترامي لك وترديدك لتكفى

ولو ما الشواهد على وقفاتي كثيره
............. ما ارتّب انه تحسن حالتك و اجفى

اخفيت نبلي واشياء صعب تفسيره
................ والحين جيت بتبيّن كل ما يخفى

مشكلتك انك خلطت الجد بالغيره
............ واحرقت نفسك لجل تحرقني وتطفى

ومشكلتي اني احفظ الود و الجيره
............ وما احب اسولف بظهر الآدمي لـ اقفى

انا هديتك وطن تتنعم بخيره
............. يوم انك اوّل حزين وعايش بمنفى

انا اللي صج الزمان بعمق تفكيره
............... وعلمك كيف الحمامه لا بردت تدفى

تجمع جناحينها من آخر الديره
............... وتظم باقي جسدها الأبيض و تغفى

حاسبت نفسي لأن الغلطه كبيره
................. اني بلحظه فتحت القلب للملفى !!

ادري والله انّك حبيّب

بس هذا الوقت ماهو وقت

انت كيفك .. وانشالله طيّب !؟



هذي كلمه مثلها مثل السلام

لو تمر بشارع الكل بيقوله

لو دخلت بمجلس ومحدٍ يعرفك

كل من فيه بيقوله ؟

يعني ماله نكهة الماضي

ولا صدق الكلام !

ومن يحدد فيها قدره .. عند من حوله

بيشيّب ...!؟




خذ نصيحه .. إن بغيته

ولاّ إرميها وروح

هذا وقت ان شفت نفسك تايه

أو راسك يفوح

مخطي لو مابك حكيته

تعلّم انك تخفي عن نفسك .. بنفسك

او إذا وصّلت حدّك

فضفض لنفس الجروح !؟


لانها لا يمكن تطلّع سوالفك لأحد

او تضحك بوجهك

ومن خلفك تعيّب


وادري والله انّك حبيّب



يا كثير الطيبه

والنفس القريبه

خايف يجيك اللي جاني

يوم سر القلب بحته

كان ما قدّامي بعده إلـ احد امرين :

يا اموت الين اموت

يا اعيش الين اموت

وحقق الله الثاني .. والأول مسحته !



وهذا انا قدّام عينك يا حبيّب

بس تكفى لا تصير زيّهم وتقول كيفك


لاني والله ماني طيّب !

تـكـس .... تـكـس

لو سمحت إن كنت فاضي

ابغى توديني على دربك لبكرى

وترجع ترجعني لأمس


ودي اشوف ان كانها بتفرق معاي

بس خلك مصحصح عدل

وأنا بخليني متغاضي

ونعيش هالأحساس عكس ..!




تـكـس ... تـكـس

عديت من هذا الرصيف لحد عندك

وما استغرق الممشى ثواني

بس كنّي ما تحرّكت ابد

واللي تحرّك لك مكاني

ما مرّتك حاله تصير ايام عايش

بس عيشتك من دون نفس


إلا اسألك

لا صار مشواري بعيد

وما معي منّي سوى شكلي

وتصبيرة سوالف

والضيقه ملعونة كديد


هاه قلّي بتوديني يا ساعي الشوارع

او هقوتك تضرب على المشوار اكس ..!


اوكيه اجل بنزل هنا ؟




اممممممممم






























































تـكـس


تـكـس

الحقيقه اني نويت احكي حقيقه
............. ما بقى فيها مشاريه و طلايب

كل نفس ٍ لو مواريها طليقه
............ ما خذت وقت ٍ تشفـّى بالقرايب

من يعرف العيب ويميّز طريقه
............ ما يفوته قولة : أذهن للنوايب

ذاك علم ٍ لو تناقله الخليقه
........... ما ذكر حي ٍ يسولف للسحايب

يا معنّي نفسك ونفسك رقيقه
........... لا تخلّي محجر العينيـن رايب

وش يفيدك قولتك: نشّفت ريقه
........... او بغثـّه بالحكي لوم ونشايب

او عشقته لجل يدعونك عشيقه
......... او خذيته بالحجج طيب وغصايب

وانت تدري .. خلّني اكمّل دقيقه؟
......... وانت تدري بأن غيرتك السبايب

من يغط بشكّه اتحدّى تفيقه
......... لو صحى ترجع تباغته المصايب

الغلا ما ينوخذ باية طريقـه
......... كان ما لك من تنهّـاده عجايب

لا تلـفّ ضلوعك .. وكنّك تعيقه
.......... اما تلـّه .. ولا عـلّـمت الهبايب

كم رفيق ٍ حضـّره غيبة رفيقه
.......... ولو تدقق بـ النظر تلقاه غايب

الحياه دروس لا قسته عميقه
.......... بين قصـّاف العمر وسلوم شايب

واحدٍ لو تاخذه للضيق ضيقه
.......... او نساه الدرب واقصته الحسايب

او تحمّل بالخفا ما لا يطيقه
.......... او تجـلّد صبره .. وشـدّ الركايب

يقلع عيونه : ولا تبتل غريقه
.......... لغير خشية ربـّه وموت الحبايب

ولاّ كانه جت على الدنيا بحريقه
........... كل نفس يحوشها بـرد ولهايب ..!

وانت يا الخفّاق وشبك تنوجع وتمص دمّي
................ ليت لك نبض ٍ يلمّك لـ اشتكيت من القهر

كان ما ولّيت وجهي للحنين وزاد همّي
.................. وكان ما قـلّبت نفسي بين يدّين السهر

كم تعيزم فيك ضلع ٍ للعنا وقرّبك يمّي
................... وكم تمرّك من سنين وإنت عدّاد الدهر

يا الكبير اللي نبت لك اجنحه بكيفي وكمّي
................. وش خذيت من البساطه غير طعنات الظهر

إن بغيت تطير هذي فرصتك والدرب فمّي !
.................. وانت حدد يا تموت بأول او تالي الشهر !!

.. لو ما أبيك ..


" ما تشوف "
ضلوع صدري .. ثلّجت
وهي تحتريك ..!

" ما تشوف "
الناس ماتت في عيوني
واختفت !؟

" ما تشوف "
الكلمه لامن جيت ابنطقها
وقفت !؟

انت اكبر مشكله عندك حبيبي
( ما تشوف )
................... الله يهديك ..!!

من يقول النوم بيدي لا نوت عيني تنام
......... وداخل عيوني حبيب ٍ صاحي وحارب منامه


والعشق كنّه دقايق لـ اكتمل وقته تمام
......... دقّت اجراس الخفوق وطار من ضلعي حمامه



والهيام اللي تسولْفه القصص ماهو هيام
......... لو يسولف عنه صدري زاد تقويسة هيامه


سامح الله طول دربي وبيـّح الله العظـام
.......... يوم جيت اشيل نحفي وأطلب الله السلامه !!