قرب اكثر
أريد اكفر
بكل من حولي
الخلايق كلها
دهشتي وكومة ذهولي
اتعرى من ذنوبي
وم الخطايا آتطهر

اتركني في حضنك.. أرتل أمنياتي
انسى همي
أنسى كل شي في حياتي
غير وجودك
انت وحدك ما تذكر

قرب اكثر
اريد اشعل بك ظلام الليل واسهر
واحتفل بك ليله وحده
نور إيمان ويقين
خلني اغرق في بخورك في عطورك
وبوجودي خلني أشعر

اسقني من شهدك الي
البحر لو ذاقه يسكر
ضمني لحظه...
في عيونك في جنونك
اريد انسى كل عذابي
اريد انسى غربتي حتى ف ثيابي
اريد اكسر
قيدي الي علقه وقتي ببابي
اريد منه لحظه وحده آتحرر

تدري اني .. بين ايديك
انسى عمري وكل سنيني
انسى أحزاني .. عذابي.. أنيني
وايقن اني
وانت قربي .. كل شي فيني يتغير
اي وربي
تصدق اني في وجودك
أصير احلى ... أصير اصغر

قرب اكثر
تعبت وآنا في غيابك اشرب المر
وامشي وحدي في دهاليز المدينه
حتى ضحكاتي ف مداها
تصدق انها موحشه صارت حزينه
قرب اكثر
تعبت وآنا في بعادك..
أقنعه هالصبر يصبر

ليه تهجر
ليه صدك في خفوقي جرحه يكبر
قرب اكثر
اشتعل بك وانطفي بك
وبزحمة انفاسك ادفا.. وآتدثر

ومهما ضاق الكون فينا
مهما دنيانا الحزينه
صارت اصغر
نحس عالمنا كبير
جنه أزهار وطيور
ونحس انه صار أحلى صار أكبر

ما تصور
كيف هالدنيا بدونك.. لما تهجر
ولا تصور
تكون قربي ومن قيودك آتحرر
متناقضه بتقول؟ عادي
مو بكيفي صرت اكرر
صورة الأنثى الضعيفه
اليظللها وجودك
مو يقولوا: (ظل راجل ولا ظل حيطه)
حتى لو ظله مكسر!؟

بس تدري ... قرب اكثر
اريد اهمس لك بكلمه
ما اريدك
ما اريدك
ما اريدك
ما اريد البس حنانك
ظلم داريته عداله
وكلما داريته يكبر

قرب اكثر
اريد احكي لك حكايه
كلها ذل ومهانه
كان بطلها ... يوم قلبك
يصب لي كاس الخيانه
اشربه وانتشي به
كان علقم ... واقول سكر

قرب اكثر
شوف قلبي... ما تغير
لا وربي... ما تغير
ما راح ادعي لك ولا ادعي عليك
بس اقول:
روح مع الي علموك كيف تقسى
روح يمكن اقدر انسى
كيف غدرك فيني أثر

ابعد اكثر
روح واتركني لحالي
الله اقوى بس عليك
روح سامحتك ولكن
بس تذكر
قوة الله... منك ومني ومنهم
متيقنة بتكون أكبر...