الوقت يكـشـف لك الاوراق
ويـــبان لـك .. كــل متلـون
لو اتـقن الصدق، والاخلاق
يـومـيـن والـثـالـث .. يهون

انت يوم ارخصت حبي سم هجـرك كـبرياء
والا انا رغم المحبـه، ما اتحرى منك جيـه

ما طعنت، الا خـفـوق ٍ ماعـطاك، الا الولا
واحتضنت اخر جروحك لانها اخر هديه

بس انا مالوم قلبي لو عشق .. هالانطـواء
عاد من يقنع خفوقي؟بعدك ان الناس حيه

وانت مالك ذنب لاوالله.معاي الذنب جا
جيتك وذنبي معاي بصحبتي، ضمن المعيـه

يوم جيتك جاء معاي بصحبتي صدق ونقا
لكن الموت الحمـر، قفيت مطموس الهويـه

كنت حلم، وحلم يسوى.. بس لله البقاء
ولابقا بعدك.. اهميه..لتحقيق..البقيـه

ولا تحسب الجـرح منك هزني بالحيل..لا
كل ما هنالك انــــــــه (ضيق الدنيا عليه)

عن سواتك بقلبي لاتسولف .. مطمه
والله انها مطمه .. لكن .. الله كريم
يكفي اني معك مابين مبدا .. وذمه
ويكفي اني بعينك غصب عنك عظيم

العيون اللي تشوف المستـقيم.. مربع
صد.. لا تفتح لها صدرك ولابيبانك

كل صاحب..صاحبه لازم معاه يقبع
والاوادم.. بعضهم عرفه يقلل شانك

والنعيم الهالك اللي..بالذنوب مشبع
انتبه من مغرياته.. لاتهز .. ايمانك

ارض ربك.. واترك المتـتبعه.. تتبع
لاتخاف من البشر ترى العدو لسانك

يقسى الزمن واقسى معه والذل يقبله الذليل
اللي ليا شاف اليدين اللي معاها.. باسها

رغم الشقا ياصاحبي مازلت انا مثل النخيل
الشامـخات.. اللي تموت وماتـنـزل راسها

بنات فكري خلت الشعر مرموق
وحطت لها في ساحة الشعر رايه

والشعر عمره مارفع هامتي فوق
اخلاقي اللي رافعه .. مستوايه

والله اني مالقيت اصدق.. من العفويه
والصراحه مكلفه .. لكن.. تريح بالي
عشرتن ماهي على وضح النقا..ملويه
جو.. ماتـرتاح له نفسي .. ولا يحلالي
ومع سواد قلوبكم..تبا.. لحسن النيه
كان ردت للكاعه..يصعب استغـفالي
بـس ماعودتها مبطي .. على الدونيـه
القمم تروق لي .. واللي يبي .. يرقالي
وآقعك ماله شغل.. باحلامك الورديه
تملك الدنيا بها .. وترد منها .. خالي

في شوفتك مكتفي ولا انتظرتك تبوح
اشيا كثيره بصدري لاحضرت تهدى

وماني على جيتك لو هي منايه لحوح
كم رغبةٍ عقبت للي تبعـها .. ردى

كـان التودد، يزيل من الخفوق الجـروح
انا لجل حشمتي قلبي بكبره.. فدى

ركـاب العـزايم .. ماعليها مـن الـ هوهو
ونعمه من الله.. فقد من فقده.. يربّح

تـجله، تحـشمـه، تكـرمـه، الردي هو هو
تمسيـه بالجـزله .. على الهـزلـه يـصبّـح

انا اشهد اني على فالي.. وقلبي نظيف
وبرغم هذا عجزت ارضي غرور البشر
أما على كيفهم تمشي .. وهذا كليف
والا تحمل عتبهم.. والزعل.. والقشر
‍‍‍‍ ‍‍ ‍‍ ‍‍ ‍‍ ‍‍ ‍‍ ‍‍ ‍‍ ‍‍ محمد بن سبيِّل

القشر حظ التعيس ومكسبه، يالطيف
اللي عليها من الحراس .. تسعة عشر
اي والله انك نظيف ولك مكان ٍمنيف
تطيح دونه.. مشاريه الحوش والدشر
‍‍‍‍ ‍‍ ‍‍ ‍‍ ‍‍ ‍‍ ‍‍‍‍ ‍‍ ‍‍ ‍‍ ‍‍ ‍‍ ثاني العرد

الإمـعـة.. مع كل الآراء ينساق
لـه ذمـةٍ تاسع .. والامثال حيه
التافهين الـلي على ذمـة "التاق"
هويـة اللي فـاقـديـن .. الهـويـه

سـبحـانـه اللي مايضللـه .. الاعـلام
شف حكمتـه وشلـون الايـام.. فرّت

نفس الوجيه اللي تخاوت على الشام
الـيـوم شفها.. من بعـضها .. تبرّت

ياصاحبي ..لو قالو الناس للناس
قل ليتها من بعضها .. مستريحه
في هالزمن ما عاد الامثال مقياس
صح المثل.. يوم الاوادم صحيحه
يجيك من بعض الاوادم وجع راس
في هالـزمن بيض النـوايـا شحيحـه
عنز مشاريهك على.. قوة الباس
تـتعبك.. لكن في تعبها.. مريحه

الطيب بصدورالنشامى ماهو صدورالبيوت
مـا عزت قصور العفون الفاخـره .. سكانها
راحت مجالسهم لك الله من نصيب العنكبوت
مـن قلـة الدايج نسـج خيطـه.. على بيبانها

الساعه الفايتـه ماهيب لك ساعه
والمقبلـه .. وقتت وقـفـة عقاربهـا
لاتامن المقبله واحرص على الطاعه
مايندرى يمكن انت تكون صاحبها