يامداهيـل الغـلا والجـود وأسـرار المعانـي=أشتعل جمر القصيـد وفـاح ريـح الشاذليـه
ماكتبتك من فـراغ ولا قريتـك مـن لسانـي=سافري بي سافري بـي ياللحـون السامريـه
بارك الله في وفـاه وبـارك الله فـي زمانـي=الزمان اللي منحني مـن عطـاه أغـلا هديـه
في عيونه زود شوق وثـورة أحـلام وأمانـي=وفي خفوقه حس مرهف بّعثر الاحساس فيّـه
جيت لاهب النسيم العذب لو ماحـدن دعانـي=أسبق الخطـوه وشوقـي مستهيـم الراعبيـه
صوتها قبل أنتبـه (ياهيـه) بالغفلـه خذانـي=والتفت مجنون ليلى؟ ويـن ليلـى العامريـه
ساقني مع نبـرة الصـوت وترانيـم الاغانـي=وأحتويته كلمتين . ونبضتين . وصـدق نيـه
ساقني عطر الشمال وصوت شيـخٍ مرحبانـي=أعشق التاريخ من شأنه عسـى أيامـه مدّيـه
له مع الموعد حضور وله مع الهاجس مكانـي=كل ماشب الغـرام وضاقـت الدنيـا الفضيـه
أرتويته مثـل ماهـو فـي معانيـه أحترانـي=أكتبـه صـوتٍ يمثـل ذات والنيـه مطـيـه
أن قريتـه ماكتبتـه وأن كتبنـي ماقـرانـي=كن نبـض قلوبنـا خـارج نطـاق الجاذبيـه
أذكره في كل لحظـه مانسيتـه لـو نسانـي=له من أشواقي سلام وله من أعماقـي تحيـه
دام علمني بوصله كيف ؟ وش يعني التفانـي=له علّي انه يعيـش بخافقـي عيشـه هنيّـه
الحبيب اللي عطاني نبـض قلبـه وأحتوانـي=هام بي صوب النجوم وصرت لنجومه ضحيـه
يستحق أعطيه قلبـي مثـل ماقلبـه عطانـي=يستحق أعطيه كلي زود مـن فـوق العطيـه
هو طموحي في حياتي .. هو بعد عمري حناني=والله أنـه فـي عيونـي ساكـنٍ ذيـه وذيـه
مالكٍ روحي وفكـري مامعـه بالقلـب ثانـي=عايشٍ داخل أعروقي ولكثـر أشعـاري هويـه
الله اللي لي هـداه .. والله اللـي لـه هدانـي=ماغدى بالحب أنانـي كثـر مابـه نرجسيـه
داعبيّه بريحة الشيح الخضر والزعفراني = سولفي له ياذعاذيع الشمال الموسّميه
قولي أني مانسيته ساكنٍ حدب المحاني = يرتوي نزف الخفوق ودمعة الفرقا عصيّه
ماشربت الصبر لو مالشوق من كأسه سقانـي=شربةٍ تقطع ضماي وتفـرض الموعـد علّيـه
وكل شكري للحبيـب وكـل حبـي وأمتنانـي=دامه أعطاني بحبه .. عـن سـواي الاولويـه

الوفا في هالزمن عابر سبيل = والجفا في هالزمن راعي محل
وأن لقيت المال في كف البخيل = الكرم عن ظاهر الدنيا رحل
غربة الاحساس والصبر الطويل = يستفز البوح من حلمٍ نحل
ضاع دربي مالقيت الا دليل؟ = في أديارٍ لا ربيع ولا مَحل
كنت أموت بصمت وضلوعي تشيل = صوت حزني والزمن طين ومُحل
الرحيل أحيان مايعني .. الرحيل؟ = لاغدى العالم على كوكب زحل
كل ماعيني غفت في جنح ليل = مبرد الذكرى لها مر وكحل
الطعون زناد والهاجس فتيل = والاماني كنها شوكة نحل
الوفا هذا الزمن جداً قليل = قطرةٍ طاحت على هامة محل
غربتي غربة مشاعر (ياخليل) = في زمانٍ غيّر أسمه وأنتحل
كل وجه أشوف له وجهٍ بديل = كل مابرّقت في وجهٍ رحل
الوفا في هالزمن عابر سبيل = والجفا في هالزمن راعي محل