كرهتني بالقصايد وانت ما تدري = اني كرهت الشعر جدا ً على شانك
أهديتك أعذب قصايد بعثرت عمري=مابين سكر كرزك وحلو رمانك
وأهداب عين ٍ لما قالت معي تسري ؟ =سريت والموت توي يسكن اجفانك
وعين ٍ بحرها ينوي موجه بغدري=ابحر بها واتحدى موج طوفانك
وصوت ٍ يردد قصيدي كنه القمري= الله ما احلى القصيد ان جا على لساانك
وجديل كنه يصب بكاستي ...... =لا من نثره الهبوب وداعب امتانك
واهديتني هجر كنه يمتحن صبري=يا كيف ابصبر على بعدك ونسيانك
لو كنت تدري وش يخبي قفص صدري=يمديه لان الحديد اللي بوجدانك
مواكب الشوق داخل مهجتي تسري=متبختره تستظل بوارف اغصانك
وخيل الغلا دكت الخفاق من بدري=كم فاح من جريها فلك وريحانك
والحب طفل ٍ لسانه يلهج بشعري=لعيون ضحكك / دلعك / افراحك / احزانك
ميدانه عروقي اللي جوفها مبري= من طول وقفة خفوقي عند بيبانك
طول غيابك وعذرك ما حشم قدري=وانا حبيبك // ولاني باصغر اخوانك
رغم اني اهواك وانك دايما ً تطري=ماني مقرب قرابيني لغفرانك
وكانك مصمم توردني على قبري=حذراك يمكن كفوفك تنسج اكفانك
واللي خلق هالغلا اللي في دمي يجري=اني لخليك تلعن جد هجرانك