جرحين في قلبي غدى كيدهن كيد
يـاعـيـد فــقــد الـلـي عليهم .. وعـيـنا

اقصى مداها فرحتي فيك .. ياعيد
هي هالصلاه .. ولاقضينا .. قضينا

ما احتقرت احد كثر من يستلذون الهوان
واللي على لا شي .. لا قامت ترز نفوسها

واهل التلون ، والمنافق ، والدني ، والهيلمان
واللي ليا سمعت خبر ، راحت تدربي روسها

ياتايه الراي مشخال الرجال الضغوط
وركايب الهـم .. لامـن حطت رحـالهـا

تفرق طريق المعالي ، عن طريق الهبوط
ومنهو تمركت عليه .. ومن تمركى لها

فرسان وقت الرخا .. مردها للسقوط
يوم الشدايد معاها .. تطلع .. رجالها

ماتعودت من صغري على الراحه
وكل حاجه بحب خشوم .. مابيها

الفرج بالسما .. والصبر : مفتاحه
وخالق الروح .. لايمكن .. يخليها

بالفلسفه .. ماتمتلي يالمترف بطون الجياع
اللي مدى احلامهم ماجاوزت حد الكفاف

مالك لوا ياللي تقول الحاجه ام الاختراع
هذا مثل والا الوكاد "الحاجه ام الانحراف"

لاصار ربك .. عن اللي تنطقه راضي
لاتحسب حساب من يزعل ومن يرضا

الكبر اذمـه .. واكـرهــه .. واتـبـناه
لا اوشـك الـواطي .. علي يـتـجـســر

والهــرج ، لامنك تجـاوزت .. معناه
فهمه : على حسب النوايا .. يفسر

يطيب فهمه .. عند من طاب مرباه
واهـل المـكـســر .. يـفـهـمـونــه مكسـر

الـلـي يبي قربي .. مـن القلب حياه
ومـن زان لـه درب المفارق .. ميسـر

اللي خشيت مفارقـه .. ذقت فرقاه
ومـاعــاد بـــه شي ٍ .. عليـه .. اتحـسـر

من لاحرص يكسب من الخالق رضاه
حتى اليـســير .. ليا بــغــاه .. يـتـعـســر

اللي يخاف من الطويلات ويهاب
ينزل وماله بالطويلات .. حاجه

العذر ياللي متت جوع وماتهيالك رغيف
الله يفـرج .. هم ربعي .. لاتـزود همهم

ياليت همي مثلهم دوريك ياعبداللطيف
اللي على هم الصداره .. محرقينن دمهم

التجـربـه .. آخـر قياس العلاقات
عندك قبل خوض التجارب بصيره

تلقى الصغار .. يكبرون الصغيرات
وتهون .. بعيون الكبار .. الكبيره

ولاشفت منهو تستفزه .. تفاهات
هذا هو اللي عنك فرقاه .. خيره

خـسارتـه .. ماتتـنـتمي للخـسارات
الـلـي على سمـعـــه .. ركـابــه مغـيره

ياصاحبي بعدك منعت التلفات
فقدك .. لحق حتى على ذكرياتي

خلاني اكره لايجي ذكر مافات
مع انه .. اجمل مرحله في حياتي

ياللي على البال مامريت !!
لاتـنـفعل .. كلهــم .. غـرو

لانك معـزب .. وراعي بيت
ماكنت من ضمن من مرو

المشتهي يستخدم الوقت معلاق
وتصير عنده كل عوجا .. سويـه

شماعةٍ واللي ورى ، فقد الاخلاق
موتت قلوب الناس، والناس حيه