شعبيات - (((( سـد مأرب ))))

سد مأرب

ثلاثيــني تعدّت والهقــــاوي خانها التعبيـــر
انّوخ هقــــوتي تاره ... وأشد ركابـها تاره

انوّخـــها واشّد ركابها .. وبعيـر بأثر بعيـر
واشوف الوقت يطحنّي رحاه بجـاير اقداره

وابوي يقول .. قدّر .. كلّ شي بها لزمن تقدير
ترى من هدّ داره ... قلّ عند الناس مقداره

يابوك الحرّ حرٍّ والعصـيفيـــر اسمه عصـيفيــــر
وانا خابرك حرٍّ تفهم المقصــــــود بإشاره

ترى طير الرخم يابـوك ماهو من حرار الطـير
ولو يعجبك في حومــه .. وجنحانه .. ومنقاره

ولو جاك من اعاصير الزمان المر( شبه اعصير)
ترفّع خل عنك هــروج ابو نواس واخبــاره

نسيت أيـام كنّا .. لاظمـينا نشــرب من البـير
سقى ذاك القليب اللي تصافق ماه بحجـاره

حفـرناه بيــدينا .. كلّبــينا .. عــودنا وصغـير
زمان ٍ كان فيه الجار .. يفدي بـوْلده .. جـاره

ليا اشتّد الهجــير نقول .. هين تاليته عصيــر
رجال ٍ ما جزعنا من عجـاج الوقت وغبـاره

وعزّ نفوسنا كنه يقول .. اللي يصير يصير
على العزّه مفاطـــيم .. وعلى الأقدار صبّاره

تكون بفمك تمره .. والنصيب يســوقها .. للغير
كذا .. طبع الزمان اقشر .. كذا .. الأيام دواره

زمان ٍ عقّب النشمي على المركى بنافخ كيــر
وتشوف اللي يبيعون الدجاج اليوم صقاره

وانا .. رجل ٍ لمح برق ٍ .. فـهلّل واكثر التكبير
وصلّى عالرسول احمد .. نبي الله ومخـتاره

جهره النوض واستبشـر يباسه بالمطر والخير
بذاك الصيف .. واثر اكثر.. بروق الصيف غدّاره

لقى ثـروة شبـابه بأيد حظًّ يعشق التبذير
رمى باحلى سنيـنه للهمـوم وكثـرة اسفــــاره

غرس نخل الصفاري بأرض ناس ٍ يزرعون شعير
وفي جني الرطب عيّوا عليه يجنّي ثمــــاره

وانا مانيب من يسكت على ضيم الغبينـه ميـر
اشوف ان الحصاني هالزمان تناطح نمـــاره

يقولون العرب .. خلّ التعجّل واحسن التفكــير
وانا راسي لعب فيه الصداع وشتت افكـاره

ولو هدّتـك ياقلبي سنيــن الهم والتعــــــزير
تحمّل .. لاتكدّر ..( سدّ مآرب) هدّتــــه ... فاره

بسيطه ياذنوبي لو تخونك شرهة التكفـــير
عسى ضيم السنين اللي مضت بالعمر كفاره

ثلاثيني تعدت ... حلم .. ماحصّلت له تفسيـــر
انّوخ هقــــوتي تاره ... وأشد ركابـها تاره

محمد الدحـــيمي