شعبيات - حداني على الضلع الموالي وسهر الليل

السلام عليكم ورحمة الله وبركاته
أحبتي:036:
أرجوا أن تجدوا فيها مايعفيني من طول فترة الغياب..

حداني على الضلع الموالي وسهر الليل
سحابٍ تزاحم شاقني نوض براقه

حساس الرعد كنه ليا أنقض ركض الخيل
على كاس عاهل دولة الحزم سباقه

أخيله قريب وزان مسراي إله بالحيل
أمد النظر مشتاق والبيد مشتاقه

عسى ماطره يسقي قرى نجد لين تسيل
جميع الشعاب وكل وادٍ على الساقه

ثلاثين ليله والمطر ينهمر بالحيل
يعم الحيا في نجد وتربع أشناقه

يفز الربيع اللي يرد العرب لاتحيل
يقولون عقبه في الضحى تشبع الناقه

علشان بدوٍ مالهم في البلاد إمثيل
زحول الرجال اللي من القل منضاقه

طوتهم سنينٍ كلبوهن عجاف وحيل
يموت الحلال وطيب العشب ماذاقه

رزقهم ولي العرش مامد مد بخيل
نثر في مفالي نجد من فايض أرزاقه

وسلامتكم
محمد بن ناصر الثبيتي
الوشم