شعبيات

شعبيات (http://www.sh3byat.com/vb//index.php)
-   قوافي البوح (http://www.sh3byat.com/vb//forumdisplay.php?f=13)
-   -   صــــــوت و صــــــدى (http://www.sh3byat.com/vb//showthread.php?t=21465)

خالد العروي 07-01-2017 22:21

صــــــوت و صــــــدى
 


بألوان شعبيات طابت أوقاتكم

الصوت


تتاوق مقدرة شعري على محبارها واتوق
دفاترها على كسب المعارف حيت الطاري

تراسل من له بحصف القصايد والشموخ اسبوق
كفو حامل لواء الموروث قدوة ريشة احباري

ابو فراس خالد له بساحات الجزال ابروق
سحاب الوسم من يمه بروقه تجذب الساري

وهبه الله هجوس تصنع من المفردات اعذوق
شهادة حق تثبتها ملامح دهشت القاري

ليا انسابت حروفه في سموع اهل اللبق والذوق
بيان السحر يوعز لليدين اتصفق اجباري

تندى في بساتين الخوالد للعروق اعروق
تحت ظل العوارف لي فخر يوم انقد افكاري

ليا مني تقهويت الهجوس الصادق المصدوق
مصادرها تحمسني عليه اورد اخباري

تسابق سبق ابكاري على صفحة نقاء واتسوق
على من له بصدر المحترم منزل ومقداري

نتايج ما كسبته في ثنايا جولتي بالسوق
وثلثين الضرر في شرهة البايع على الشاري

قنوات الفضاء كثرت على ظهر الشعر من فوق
تربح في وحلها من منابع نهره الجاري

ثلاث ارباع ما ينشر هزل في وجهها المسلوق
خشيم القرش يخرس مسمع الناقل عن الزاري

على كثر الوسايل ما لقينا ما يسد احلوق
قبل لأعلن عزوفي ردني عزمي على اصراري

تلمحت الجزيله بالغياهب دمها محروق
تنادي يامونس وحشتي عن ظلم تجاري

تعال وصافح اكفوفي عهد كفو العهود اوثوق
لسان الشعر امانه وانت ميرادي ومصداري

انا مالي سوى صدق المشاعر يا عزيزي طوق
تحملت الامانه فوق ثقل الحمل باوزاري

ياخالد كبرت الدعوى وذا سارق وذا مسروق
لو اثياب الغنيمه ما كست من هزلها العاري

قبل ما اصدق القايل تبين ف اعوجاج اشدوق
لسان الشعر ما ينطق عوج في عين معياري

تدرعم حيرة الناطق ولا يدري عن النمطوق
عيونه غشت اسموعه ولاون الطلق ناري

ابسمع دقة الطارق ويطرشني غثاء المطروق
ويمنعني تواضع شعره اللي حطه ايساري

يا خالد رحلتي والعلم لا لاحق ولا ملحوق
مأسي والمأسي تحتسب من دبره الباري

زمان العام تبحث لهفة العاشق عن المعشوق
وتكشف ما كتب من هو عن الانظار متواري

وزمان اليوم مع كثر المنابر وازدياد البوق
تزاحم للقصايد والحصيله مالها طاري

خلاصت قولنا جعل القصيد اللي سمعت ايروق
وترضى ذايقة شعرك على عذري ومعذاري


عزيز مفلح المرواني


الصــــــــــــــــــــــــــــــــــــــــــدى

هلا بالشعر من غر القصيد اللي سناه يفوق
شعاع الشمس من خلف السحاب لنوره يباري

هلا به ومن جابه ومن بعد الغروب شروق
لفا به وارتوى به كل عوداً ناحلاً باري

شعر من فوق يرقا للمعاني بالخيال لفوق
شعر يجبر عموم الصمت يصمت جل وإكباري

هلا بك ياعزيز لا نخيت الشعر جا لك شوق
وهو الشعر نفسه لا انتخا في شعرك يماري

إلى جالك مثل هب النسايم يحتفي برفوق
كأن حروفه تكلم بعضها شوفي اختاري

يريح البال صال وجال يمحي كل جرح وعوق
وكل الشعر يفخر لانتهض لشعارك يجاري

إلى مني قريت من القصيد الناسخ الملصوق
ارجع ذايقة شعري لشعرك يوزن فكاري

ترتب للفكر مبدأ تفكر خارج الصندوق
خيالك لا طرالك ما اعترف بحدود الاسواري

ولا ادري يابو جاسر كان فيه من البشر مخلوق
يؤيد ما يصير وما يدور.. إلا على طاري

تراه احيان ما ندري عن اللي يعجبه ويشوق
له الشعر الجزيل أو الهزيل العاري الهاري

تعود إلى الجهود وللحشود وكل من له ذوق
ولولا الذوق تلقى كل سلعه دمها الذاري

تحس الشعر بعض احيان من بعض البشر مخنوق
ولا نقلي عليه اللوم لانه ماهو بداري

نلوم اللي يصفق من حماسه لا حضر مصفوق
تقادح بالشرار يديه مدري ليه يا ناري

يصفّق ليه يغري بالمصافق يا صفقه العوق
يبي يزيد البلا ؟ ليته عن الانظار متداري

وبعضهم من مرارات الليالي والفراق يذوق
يبي ريح الفرح يرمي شراعه من على الصاري

يهدي قبل لا تاصل علي المهياف حد الموق
من عيونه عن عيون الخلايق جهده يداري

وفيه اللي يردد كل فكره لين يصبح بوق
تذكر يوم كان النوكيا أصلي وهنقاري

ولا تعتب ولا تتعب ياكيف تعبي المشقوق
من اعداده الي احفاده على هذا العمل ضاري

ترى ماهو جديد اللي ترى يا صاحبي مسبوق
لو اعدد من اصناف البشر ياطول مشواري

بلاهم خلّهم يارحم أبوك ابي اسمع الطاروق
ابا ارجع للقصيده واعزف الحاني على أوتاري

ابا استمتع بروح الشعر لان الشعر فيه فروق
عجايب في ترانيمه يحرك صامت أحجاري

أجدني كل ما قلت القصايد تنتشي وتفوق
لمثلك ينحني عذب القصيد وتفخر اشعاري

لمثلك ينحي كل القصيده وقده الممشوق
وذا رايي واعذاري وتوقيعي واقراري

خالد عبيان العروي

نورة العجمي 06-03-2017 19:55

رد : صــــــوت و صــــــدى
 
وطابت ايامك وقصيدك
صح لسان الصوت والصدى


الوقت المعتمد في المنتدى بتوقيت جرينتش +4.
الوقت الان » 15:05.

Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع ما يكتب في الموقع يعتبر حقوق محفوظة لموقع شعبيات- شبكة الاقلاع