ياعلاوي نجد علك مراديم السحاب= ديرةٍ فيها تربيت يوم اني صغير
ياطبيب النفس شنهو علاج الاكتئاب= اعطني وصفة اعلاجه ترى وضعي خطير
عشت في غربة حقايق وفي وضع اغتراب= والتجارب علمتني على شي كثير
استفدت من الذيابه ومن نبح الكلاب= واستفدت من الرغا واستفدت من الهدير
ولاكسبت الا معرفة عزيزين الجناب = ولاخسرت الامعرفة عديمين الضمير
اقترب لا مقترب شين بعض الاقتراب = ابتعد لا مابتعد شي في حقي كبير
ياسؤالٍ كل ماطرحك ملقالك جواب = مالي الا الصبر واهل الصبر توعد بخير
وصف خلان الرخا مثل ضحضاح السراب = يفرح العطشان شوفه يحسب انه غدير
والردي لو هو ولد عم لاتحسب له احساب= كم عزيزٍ ذله الوقت بضيافة حقير
والدروس انواع تطبيق والا بأنتساب= بس انا اللي طبّق الدرس قدام المدير

الرسالة الأصلية كتبت بواسطة الأسير هذه رائعه من روائع الشاعر الكبير سعد بن جدلان فأنا اعشق هذا الشاعر كثيرا