(ياحنيش)
يا حنيش شغّل وامسك الخطّ ياحنيش
يامقسمي سعد الخوي وسناده


قم شغّل الموتر ولاتنشد لويش
صاحبك من المغرب وقهوته ساده


وجبلي قلم حبر معاه الخراطيش
وابشر بقيفانٍ على ايش وأده


واذا جهمنا الحين .. نوصل مغابيش
ومافيه حيّ مات مدرك مراده


وعلى الحدود ان جيت نقطه وتفتيش
ترى الخوي خبرك لنا فيه عاده


يرقى سنود وشش ياراسي وشيش
ارقد وكبّر تحت راسك وساده


رجلٍ تهينه .. لو تبخششه بخشيش
ورجلٍ تبخششه بزمام وقلاده


ياحنيش عادت بي الجروح المخاشيش
كني بسوق الزلّ ادوّر نجاده


وحظي على ماقالوا بمصر مافيش
ان قلت حظي قل : يامال القراده


واللي زهق مالكهرباء يسحب الفيش
ياشييييييييييخ لأابو الصيف لأبو براده


ياحنيش والله قفلت قفلة الشيش
يعني كذا بالمختصر للإفاده :


اللي ذبحني بالمراض العكاريش
ماعاد لي ببلاد ماهي بلاده


نجلاً ذبحني لحظها ماهو الميش
علمني اش معناة كلمة إباده


عنقاً الى من خصرها مال بشويش
انا بوجهك .. يالطيف بعباده


كن نحرها نحرابيض الصدروالريش
لاتل مسباقه بلحظة هداده


فيها وهي تروي العروق المعاطيش
براءة الطفل الغرير بمهاده


لبيش ياللي لاعت القلب لبيش
لبيش ياشرب الدحيمي وزاده


شاعر عيونش من قروم ٍ مداغيش
شاعر عظيم ويستحق الإشاده:)


من صغر سنّه بالشقا والمحانيش
ماشبع من ماما .. ولا شاف داده


يا أكسجيني كيف من دونش اعيش
جيتش وانا من الحزن عندي شهاده


ياظالمتني في سماع المحاريش
ماكل ظالم صار نومه عباده


يخطيش يااللوامه اللوم يخطيش
ماني بلّوامش .. ولاهيب عاده


لكن .. يا دلوعتي .. يااجمل الطيش
ياغادتي مايشبهش أي غاده


تمايلي .. ياحلوتي .. ينعنبيش
في ذمتي انش تفرقين بزياده


والله ولو دونش طوابير لأجيش
يانوم عين متيمش .. يارقاده


دنيا بدونش في عيوني ضنك عيش
والله .. ماتسوى جناح الجراده