شعبيات - ألا ياصايمٍ لله ما يكفي العطش والجوع

[poet font="Simplified Arabic,4,purple,bold,normal" bkcolor="transparent" bkimage="" border="none,4,gray" type=0 line=200% align=center use=sp length=0 char="" num="0,black" filter=""]
الا ياصـايمٍ للـه ما يكفـي العطش والجـوع = ما دامك طـالب للخير دلّ الخير ودروبه
صيامٍ ما وراه إيمان ولـو تخلص ترى مرجوع = اساسه والعزى واهي ولا تنفع به التوبه
يبي لك تفهم لأصـله ولا تنسى الشعب وفروع = بشهـادة لا إلاه إلا إلاهٍ نجهـل غيوبه
إلاه النـاس خالقهم وغيـره خـادع ومخدوع = فلا له من ولد أو بنت او زوجه ومحبوبه
وتؤمن بالمـلائك والكتب والرسل بالمجموع = بلا تفـريق او تمييز فكلٍ كان منـدوبه
وتفهم يـومك الآخر وبعث وحشر دون ارجوع = وحسابٍ يكشف الخافي تمنى وقتك هروبه
وتؤمن بالقـدر خيره وشره بالرضا عن طوع = فمهما صار لك محفوظ في الواح مكتوبه
وأدنى هالشعب إنك تشيل من الدرب مجـدوع = يضر اللي مشى غافل ولا يدري عن خطوبه
ومن الإيمان حسن الخلق ولا يقبل ردي اطبوع = تواضع يا فتى فالكبر في نيران برتوبه
ثـلاثة ما يناظـرهم إله العرش يـوم الـرّوع = ولا حتى يزكّيهم وكلٍ تكشف ذنوبه
اشيمط زاني أو عـايل ومستكبرٍ ولـو به جوع = ومن حط الإله بضاعته بايمـان مكذوبه
ولا هـو مؤمنٍ من غش يصرّف فـاسد المبيوع = ومن يمكر ومن يغدر ذنوبه ويّ محسوبه
وترى النمّـام ما يدخل من الجنة فتر أو بـوع = لأنه مصدرٍ للشر بنقل الكذب من صوبه
وترى المسلم هو اللي يحفظ لسانه من الممنوع = ويدّه دوم يقصرها وعن الزلات معضوبه
وترى المسلم يحب الناس بلا مصلوح في الموضوع= يحيّي الغير بالتسليم ولا يعطي حد جنوبه
واذا من تستحي إيمـان فيه الخير بالمجموع = ولكن لاحيا في الدين تفهّم كل مطلوبه
وحق الجـار لا تهمل ولو من جيرته ملذوع = تقوم بواجبه لله ولا يثنيك عذروبه
وتغض الطرف عن أهله ولو شفت الحيا منزوع = ولا تشبع وهو جايع ولو طاولك بحروبه
وحق الضيف إيمــانٍ فخلك بالكــرم مطبوع = يجي والرزق بضفافه مدام النار مشبوبه
وصـل رحمك ولا تهجر قريبك لـو بدا باللوع = فقلبك دايمٍ يسمح ولا تحرص على عيوبه
وخـلّ النصح منهاجك بكلمـه فعلها مسموع = بلا تانيب أو قسوه ولو حاولت بصعوبه
على المعروف دلّ الغيـر وخلك دايمن ينبـوع = تحب لهم مثل نفسك وكلٍ تدري مشروبه
وتنهاهم عن المنكـر بصوتٍ ينقبل بخشـوع = وتبقى دايم القـدوه بلا زلّه ولو نوبه
ولا تظـلم ترى المظلوم دعاءه للسما مرفوع = فكم من ظـالمٍ يلقى بحياته ذل وعقوبه
ولا تقرب نفاق وكذب وخللك للصدق مدفوع = ترى ما ضرّنا مثل المنافق يخـدع اسلوبه
يقـول امجامله واقـول عـاده سمّهـا منقوع = خداع وتغطيه للحق ومدح العيب والكوبه
ولا تخلف إذا عاهدت ولا تواعـد على ممنوع = ولا تخـون الأمـانه ردهـا بالعـدّ محسوبه
ولا ترشي وتسترشي مثل من يسرق الموجوع = خفافيشٍ تمص الدم وتنام الليل مقلوبه
ولا تحـرم حـدٍ حقّه تبي (واوٍ) كمـا المتبوع = ترى سرّ التأخر (واو) مدام اليوم ملعوبه
وقول الـزور لا تقرب ولو اغـروك بالمدفوع = كبيره عند رب البيت يامن كثرت ذنوبه
وسبع موبقه احـذر ترى فيها الهـلاك يروع = فأعظمها شرك بالله ولو بالمزح ولعوبه
ومنها السحر لا تقبل تـرى من صدّقه مخدوع = ويمكن يدخلك في الشرك إذا آمنت بكذوبه
وقتـل النفس دام الله يحرّمهـا بـلا مشروع = بأية حق تقتلها أخذك ابليس في صوبه
ولا تـرابي ولا تسعى بربا تبحث عن المنقوع = حرام المال يسحق لك حلال وتلحقك حوبه
ولا تاكل حقـوق يتيـم لأنه قاصرٍ مقطـوع = فخاف الله في الإيتام يكفي اليتم وندوبه
وبالك تـرمي المحصن وتقذفهـا بكل شنـوع = وهي مسكينةٍ غافل عن الزلات محجوبه
وترىالإيمـان يتقـادم مثل ثوبٍ بـدا برقوع = فجدد دوم إيمانك بفعل الخير ودروبه
وترى بين الرجل والشرك وبينه والكفر اركوع = إذا يترك صلاته عمد كفر بالله ومندوبه
يقول الدين في قلبي خـدع غيره وهو مخدوع = نسي ربّه ولا فكـّر كما العـايش بغيبوبه
يظنه خـالدٍ بالكـون قـوي الباس هالجربوع = ولو تنغزه شوكه قـال ياربي ترى التوبه
فلا تغـتر يبن آدم مصيرك في بالقبر موضوع = مثل من راح ما عـوّد غدا للـدود انهوبه
بوسط القبر يبدا الدرب ذهاب ما وراه رجـوع = حيـاةٍ ثانيـه تبـدا وكلٍ واضحٍ صوبـه
حسابك جاهـزٍ مكتوب تحصد زرعك المزروع = فليش الخير ما تزرع مادام الأرض بخصوبه
تعيش السعد بالدنيا مصيرك عارفه بخضـوع = تعرفك عابـرٍ جسرٍ ولا تحتاط لعيوبه
تطيح اليوم أو باكر مثل من طاح قبل اسبـوع = فلا احدٍ سائلٍ عنّك ولو كفّنك من ثوبـه
مع الأيـام ينسونك ولو يبكي عليـك اجموع = إذا ما لك ذكر طيب فنجمك زلّ بغروبه

[/poet]