تسأل.. وأنا ياخوك عن حال ذا الجيل=ماني براضي دام زاد إغتصاصه
بالشر والفتنة وكذب الأقاويل=والمعمعه.. و إن كان تبغى الخلاصه
الجيل حاله ذا الزمن زايد الميل=ساد البلا والوضع فيه إختباصه
ماهوب وقت (ن) كان فيه الحلاحيل=تشيل حمل جبال رغم الخصاصه
عشرة زمان اللي عليها الرجاجيل=عاشت وكل إنسان يعرف خلاصه
واليوم في ذا الوقت صارت تهاويل=بين القرايب مثل ضرب الرصاصه
دنيا كفى الله شرها والمجاااهيل=اللي لها حبل الردى وإنقصاصه
تصفى على طينة هل القال والقيل=والطير فيها صار سهل إقتناصه
إن جيت للعشره وقرب المواصيل=في المجتمع ضاعت وضاع ارتصاصه
زادت على ذا الجيل موضه وتذليل=وأصبح سلوك الغرب شرط إقتماصه
اللبس ملبوس االرجال المشاكيل=سعره رخيص(ن) وسط سوق الرخاصه
شباب يلبس ضيقات البناطيل=والثوب والغتره تزيد إنتقاصه
يصبغ على وجهه كحول ومحاليل=والشعر قصه من خبير القصاصه
في الحلق سلساله وفي اليد منديل=والرمش كثر الظل زوًد حصاصه
يسري مع الأصحاب لي جرهد الليل=وإن جاء نهار اليوم زاد إنجعاصه
والشاشه اللي كل ساعه مواويل=رقص(ن) وهزة راقصه وإرتقاصه
تعلم الورعان رقص المهابيل=وتفتح على الشيطان باب الهياصه
والكيف.. كيف الكيف؟؟ ذا الوقت بالحيل=أصبح شراب الهاي حلو إمتصاصه
أحد(ن) يبهر دلة البن والهيل=وأحد(ن) من الوسكي يعبي قلاصه
والتاجر اللي وسط سوق الغرابيل=يخسر إلي منه يزود إحتراصه
بعض العرب في البيع مثل المخابيل=يترك حلاله والحرام إختصاصه
هذي بعض الأحوال دون التفاصيل=بينت لك حال الزمن وإنخباصه
أطلب عسى الله في الليالي المقابيل=يزين في حال الدهر واغتصاصه

كافية ووافية يا ابن حليلان ..
مظاهر العفانة في كل مكان نراها ونسمعها ..

أحد(ن) يبهر دلة البن والهيل
..................... وأحد(ن) من الوسكي يعبي قلاصه

قصيدة اجتماعية وكم نحتاج كثيراً لـ مثلها هذه الأيام .. فهي خير ما نوجه إليه بلاغة الألسن وابداع الأقلام
كـ العادة تكتب لـ تحصد الإعجاب ..

تحياااتي

قصيدة رائعه اخي محمد

لا تحكي سوى الواقع...ولكن اسأل الله ان يثبتنا على طاعته انه سميع الدعاء

صح الله لسانك ملايين على ما خطت يمناك

فائق احترامي

اللبس ملبوس االرجال المشاكيل **سعره رخيص(ن) وسط سوق الرخاصه
شباب يلبس ضيقات البناطيل** والثوب والغتره تزيد إنتقاصه
يصبغ على وجهه كحول ومحاليل **والشعر قصه من خبير القصاصه
في الحلق سلساله وفي اليد منديل** والرمش كثر الظل زوًد حصاصه
يسري مع الأصحاب لي جرهد الليل **وإن جاء نهار اليوم زاد إنجعاصه


تصوير جزل لحال هالشباب المايص الله يهديهم
كلمات في الصميم أخي الكريم..
الف صح الله نبضك الراقي..
دمت بخير..
جل التحايا..