الأرض فيها ناس ما تشبه لـ .. ناسي=ودّي أطير اليوم عنها قبل بكره ..!

لو الحجر مثل البشر يملك إحساس=أمدى درج بابك يملّ إنتظاري!
كل يوم أجي واراقب الدرب .. والياس=يطعن فـ ( خاصرتي ) وييبس خضاري!
وأقاومه بالحب .. وبـ / قوة الباس=وأطيّر أسراب الأمل في مداري
وإن هبّني من يمّ غيبتك نسناس=غنّيت من غبني .. وزايد مراري!
لا عاد لي قلبٍ .. ولا عاد لي ناس=ما دامك إحساسي .. وناسي .. وداري !

يا صاحبي .. والبرد واقف على الباب=أنا هنا بارد .. وخايف .. ومنهك!
أبي الدفا .. وأتذكر وجيه الأصحاب=ما ألقاه حتى أذكر تفاصيل وجهك!!

يا عمّي لا تقول إنّك حزين=يا شين الحزن لا خان الوقار!
اشوفك من بعد طول السنين=تعيش اليوم لحظة إنكسار!
واحس بداخلك جرحٍ مكين=عسى ما أنت بـ ( ضحيّة ) إنتظار؟!!

يجوز اسوّي كل شي فـ ( غيابك )=لكن أرد الدمع .. لا يمكن يجوز!
واللي غسل ضيق الخفوق بـ ( رحابك ) = ما شي غير الدمع في بعدك يفوز!!

الرسالة الأصلية كتبت بواسطة همس الشواطئ (مشاركة 260397) يطيب لي التصفح هنا .. فـ هنا بوح متميز وبطعم آخر !! فـا لتعذر مقاطعتي .. همس

لو البحر يدري عن الحب وشلون ..=تسدّ عن كثره .. حلاوة قليله!
ما اوعز إلى موجه من أمواجه تمون ..=على نصف هذا الخفوق .. وتزيله!!

هنا لـ ( الصمت ) صوت وحضن وانفاس وعيون وروح=هنا لـ ( الحكي ) نبضٍ وجل ، هنا لـ ( الصدر ) تنهيدة!
هنا يا حضرة الكرسي تموت قلـوب ، تحيـا جـروح=ولا تبرح مكانـك لـو يعيـد الحـزن بـك عيـده!
هنا وان قلت يا حظـك ليـا مـرّك فـرح ومـزوح=اقـول: الله فـي عونـك علـى الحـزن ومواعيـده!

شفني وأنا فـ ( عيوني ) الحزن ساكن=وإن لمتني .. مانيب حمل الملامة!
تبيني افرح؟ .. ودّي أفرح .. ولكن=ما به فرح يكفي لـ ( نصف ) إبتسامة!!

في غيبة إحساس المحبة وش يصير؟=لو نطفي الشمعة ، ونجلس فـ ( ديجور ) ؟!
اللي تحمّل موتة الحس من غير..=داعي ,، بيقدر يحتمل غيبة النور !!

يا صاحبي لو طال درب المعاناه=لا ينكسر قلبك .. وتفنى عزومك!
كلٍ وله همٍ كبيرٍ قد أضناه=شف همّ غيرك .. تصغر أكبر همومك!!

لو إن ما لي حسّ .. ما عشت في ضيق=ولا قلت لإحساس الحزن داخلي .. بسّ!
لا تصبّ لي لو شفتني يابس الريق=صب الفرح .. مابي الحزن .. طاااالبك حسّ!!

يا دافية صمت .. وحديث .. ومشاعر=ما للشتا لا من حضرتي مداهيل ..
فـ ( ضلوع ) من حبّك! .. ولا صار شاعر=الا بعد ما أغرقه قلبك .. مواصيل !

بين فرحٍ فقيد .. وبين حزنٍ وليد=آتشتّت بعادٍ .. وآتجمّع بعاد!
أجمع الناس في قلبي .. وقلبي وحيد=وأشعل النار في روحي .. وروحي رماد!!

وانا طفل .. قبل السهر والتناهيد=وقبل الحزن يصبح لـ / قلبي .. طبيعه!
قبل احبس الدمعه ليا طرّوا العيد=وقبل اسكب الدمعه .. بليّا ذريعه!
كنت استطيع افرح .. بليّا مواعيد=واليوم في موعد فرح .. ما أستطيعه!!

في عيد ميلادك .. أهنّي بك العمر؟=ولاّ أهني خافقك .. طال عمرك ؟!
كل عام وإنتي شيخة البيض والسمر=وقلبي على كيفك .. وشفّك .. وأمرك !

ما يترك الحبّ في عين المحبّ الحشيم=غير السهر ، والحزن في صوته وخافقه !
يااااا ليت لي قلبٍ مصدٍ عيوفٍ لئيم= لا مرّه الحب لوّح له .. ولا رافقه !!

ودّي أكتب ما يضايقني .. لقيت=ما يضايقني كتبني .. وإنتهى !
لين جفّت دمعتي في صدر بيت=وإنجبر قلبي في عجزه .. وإلتهى !
وإقتنعت إني لو أرضى .. ما أكتفيت=كل يومٍ لي طموح .. ومُشْتهى !!

ما عاش مـن حُبـك ، يمـوت=مـن بعـد مـا مـات الوفـا !
يـا ليتهـا زلّـة ، وتـفـوت=لكنّـهـا طعـنـة خـفـى !
مـا أمكنتهـا عشـان أمـوت؟=مـا عـاد ابـي منهـا شفـا !
لا تعتـذر ، مـا عـاد صـوت..=عـذرك .. بيمنعـنـي الجـفـا!
بعد الحكـي ، قبـل السكـوت=صنتك .. وخنت أنت .. وكفى !

لا شفتني زعلان .. لا تبتسم لـي=إعقد حجاجك وإنتظر لين افضفض!
عن الزعل يا صاحبي شوف كم لي=ودّي أعبّر .. وإبتسامتك ترفـض!!

حزين يا محمّد ومكسـور خاطـر=من الزمن والناس والحظ والحـب!
واقف على درب السعادة .. وناطر=يمرّني قلبٍ .. ولا مرّنـي قلـب !!
يمطر على قلبي من الفقـد ماطـر=واعوّد ادراجي .. وحيدٍ ومتعب !!

ماهو غريب تنام وانـت متضايـق=غيرك عجز لا ينام من شدة الضيق!
وغيرك يجيه الليل هـادي ورايـق=وينام لو هو ظالـمٍ لـ / المخاليـق !
صدّق .. تراها كلبوهـا حقايـق=في هالزمن ما عاد به صعب تصديق!!