غزو السهر بالعين نوّخ ركابه = وعقّل مطايا غزوته وسط الاحداق
تسعين ليلة مي عيني شرابه = وزاده وجع قلبي وهمي والارهاق
طوّل !! ومزّق طول بالي ثيابه = وحزني لوى لضلوعي أعناق واعناق
ضايق ..!! لا والله فوق ضيقي كآبه = كن الأسى خيمة وغربالي رواق
صعبة أشوف شموس حلمي تشابه = تمرها عيني .. ملامح بلا اشراق
وصعبة يموت الفال باول شبابه = كيف العزا .. والصبر ما عاد ينطاق
بالامس كانت ( مسحة الوجه ) .. لابه = ياما ثنت من دون عربان ونياق
ما ساومت لو مزهب الوقت مابه : = غير المديد .. وضمّر الجيش .. وفراق
واليوم ( وجه السالفة ) وش بقى به = لا غاض عدوانه ولا سر الاخلاق
وش حال .. سم .. أبشر .. وقولة هلا به = البال وسمه .. والغلا نوض برّاق
وش حال مركى المرجلة .. والذرابه = وصفر الدلال اللي شذا هيلها فاق
إلى هنا ..! يبقى ( الثنا ) في غيابه = راسٍ تهافت يمه قلوب واذواق
وكانه على ( جرح العشم ) .. وين بابه ؟ = جاه الوفا لرضاه يصغر وينساق
كم لي وانا أنهب عز نفسي نهابه = واقهر مطايا رغبتي دون الاشواق
شعري .. شعوري .. لهفتي .. والكتابه = قامت تعاتبني على هجر الاوراق
ليه الظما .. والحس يبرق سحابه ؟! = ليه الهجر والحرف يوله ويشتاق ؟!
وأنا .. بلا صدري تحوفه ذيابه = وتنازعه سحم المشاريه لا راق
أبعدت عن نجر القصيد وزهابه = من خوف تجذب دنة النجر بوّاق
مبطي ..! على حطة يدين الرتابه = لا شفت صبح ..! ولا تعزويت بـ اشفاق!
تسعين ليلة .. والطواري حرابه = يا عونة الله .. ما بقى شي ما ضاق !!

للرائع : فهد الأحمد

,,